ଶୀତରେ ଥରୁଛି ସାରା ଓଡ଼ିଶା, କେନ୍ଦୁଝର ସବୁଠୁ ଥଣ୍ଡା ସହର
ଭୁବନେଶ୍ୱର: ହାଡ଼ ଭଙ୍ଗା ଶୀତରେ ଥରୁଛି ଓଡ଼ିଶା । ଅଦିନିଆ ବର୍ଷା ପରେ ଆକାଶରୁ ବାଦଲ ହଟିବା ପରେ ରାଜ୍ୟରେ ବଢିଛି ଶୀତ । ରାତିର ତାପମାତ୍ରା କମିବାରେ ଲାଗିଛି । ଏଥି ମଧ୍ୟରେ ଗତକାଲି 15 ଡିଗ୍ରୀ ତଳେ ରହିଛି 24 ସହରର ତାପମାତ୍ରା ।
ରାଜ୍ୟରେ କେନ୍ଦୁଝର ସବୁଠାରୁ ଥଣ୍ଡା ସହର ପାଲଟିଛି । 9.6 ଡିଗ୍ରୀ ସହ କେନ୍ଦୁଝର ସବୁଠାରୁ ଥଣ୍ଡା ସହର ହୋଇଛଇ । ସେହିପରି ଫୁଲବାଣୀ 10, ଦାରିଙ୍ଗବାଡି 10, କୋରାପୁଟ 10.8, କଟକ 14.8 ଓ ଭୁବନେଶ୍ୱର ତାପମାତ୍ରା 15 ଡିଗ୍ରୀକୁ ଖସିଛି ।
ଭୋର ସମୟରେ ଚାରିଆଡେ ଲାଗି ରହୁଛି ଘନ କୁହୁଡି । ପ୍ରବଳ ଶୀତ ଯୋଗୁଁ ଲୋକେ ସ୍ଥାନେ ସ୍ଥାନେ ନିଆଁ ଲଗାଇ ଉପଶମ ଲାଭ କରୁଥିବା ଦେଖିବାକୁ ମିଳିଛି । ଆଉ ଶୀତ ବଢିବା ସହ ପାର୍କ ଓ ରାସ୍ତା କଡ ଗୁଡିକରେ ଲୋକେ ପ୍ରାତଃ ଭ୍ରମଣ କରୁଛନ୍ତି । ସକାଳୁ ସକାଳୁ ଚା' ଦୋକାନରେ ଭିଡ ଜମୁଛି । ଗରମ ଚା' ପିଇ ଶୀତର ମଜା ନେଉଛନ୍ତି ଲୋକେ । ତେବେ ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡ଼ି ଓ କନ୍ଧମାଳର ଜି. ଉଦୟଗିରି ଅଞ୍ଚଳରେ ଗତକାଲି ଠାରୁ ପ୍ରବଳ ଶୀତ ଲାଗି ରହିଛି । ଏହା ପରେ ଆସନ୍ତା 7 ଦିନ ପର୍ଯ୍ୟନ୍ତ ପାଗ ମୁଖ୍ୟତଃ ଶୁଖିଲା ରହିବ ।
Click it and Unblock the Notifications
Sign in with Google