ବଙ୍ଗୋପସାଗରରେ ଘୂର୍ଣ୍ଣିବଳୟ, 26 ରେ ଲଘୁଚାର... 29 ରେ ଅବପାତ

ଭୁବନେଶ୍ୱର: ଦକ୍ଷିଣ-ଆଣ୍ଡାମାନ ସାଗର ଏବଂ ଏହାର ପାର୍ଶ୍ୱବର୍ତ୍ତୀ ଅଞ୍ଚଳରେ ସୃଷ୍ଟି ହେବ ଘୂର୍ଣ୍ଣିବଳୟ । ଏହାର ପ୍ରଭାବରେ 26ତାରିଖ ସୁଦ୍ଧା ଦକ୍ଷିଣ ଆଣ୍ଡାମାନ ସାଗର ଏବଂ ଏହାର ପାର୍ଶ୍ୱବର୍ତ୍ତୀ ଅଞ୍ଚଳରେ ଲଘୁଚାପ କ୍ଷେତ୍ର ସୃଷ୍ଟି ହୋଇପାରେ । ଏହା ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତି କରିବା ସହିତ ଅଧିକ ଘନୀଭୂତ ହୋଇ ଦକ୍ଷିଣ-ପୂର୍ବ ବଙ୍ଗୋପସାଗର ଏବଂ ଏହାର ପାର୍ଶ୍ବବର୍ତ୍ତୀ ଆଣ୍ଡାମାନ ସାଗରରେ 29ତାରିଖ ବେଳକୁ ଅବପାତରେ ପରିଣତ ହେବା ସମ୍ଭାବନା ରହିଛି । ଏ ନେଇ ଭୁବନେଶ୍ୱର ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି ।

ତେବେ, ସମ୍ଭାବ୍ୟ ଅବପାତ ବାତ୍ୟା ରୂପ ନେବ କି ନାହିଁ ତାହା ସ୍ପଷ୍ଟ ହୋଇ ପାରିନାହିଁ । କିନ୍ତୁ, ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ କହିଛନ୍ତି, ବିଭିନ୍ନ ମଡେଲ ଆକଳନରୁ ଜଣାପଡୁଛି ଯେ, ସମ୍ଭାବ୍ୟ ଅବପାତଟି 30 ତାରିଖ ବେଳକୁ ବାତ୍ୟା ରୂପ ନେଇପାରେ । ତେବେ ଏହାର ପ୍ରଭାବ ଓଡ଼ିଶା ଉପରେ ପଡ଼ିବାର ସମ୍ଭାବନା ନାହିଁ ।

ଏହା ଦକ୍ଷିଣ ଦିଗକୁ ଗତି କରିବା ପରେ 26 ତାରିଖ ବେଳକୁ କେନ୍ଦ୍ରୀୟ-ଦକ୍ଷିଣ ବଙ୍ଗୋପସାଗର ଅଞ୍ଚଳରେ ଲଘୁଚାପ କ୍ଷେତ୍ରରେ ପରିଣତ ହେବାର ସମ୍ଭାବନା ରହିଛି । ଏହାପରେ କ୍ରମାଗତ ଭାବେ ଘନୀଭୂତ ହୋଇ ପ୍ରାୟତଃ ଉତ୍ତର ଦିଗରେ ଡିସେମ୍ବର 1 ପର୍ଯ୍ୟନ୍ତ ଗତି କରିବ । ପ୍ରାଥମିକ ଆକଳନରୁ ଜଣାପଡୁଛି, 28 ରେ ଅବପାତ ଏବଂ 30 ରେ ବାତ୍ୟା ସୃଷ୍ଟି ହୋଇପାରେ । ସମ୍ଭାବ୍ୟ ବାତ୍ୟାର ନାମ 'ମିଚାଙ୍ଗ' ରହିବ ଏବଂ ଯାହାର ନାମକରଣ ମିଆଁମାର ଦେଇଛି ।

ଡିସେମ୍ବର 2 ରେ ଉତ୍ତର-ପୂର୍ବ ଦିଗରେ ଗତି କରି ବାଂଲାଦେଶର ଦକ୍ଷିଣ ଉପକୂଳରେ ସ୍ଥଳଭାଗ ଛୁଇଁବା ସମ୍ଭାବନା ରହିଛି । ସମ୍ଭାବ୍ୟ ବାତ୍ୟା ପ୍ରଭାବରେ ଓଡ଼ିଶା ଉପରେ ବର୍ଷା କି ପବନ ହେବ ନାହିଁ ।

ଉପକୂଳ ଓଡ଼ିଶାରେ ଡିସେମ୍ବର 1 ପର୍ଯ୍ୟନ୍ତ ସର୍ବନିମ୍ନ ତାପମାତ୍ରା ଅପରିବର୍ତ୍ତିତ ରହିବ ଏବଂ 2 ରେ ରାତି ତାପମାତ୍ରା କମିବାର ସମ୍ଭାବନା ରହିଛି । ଆଭ୍ୟନ୍ତରୀଣ, ଦକ୍ଷିଣ ଓ କେନ୍ଦ୍ରୀୟ ଅଞ୍ଚଳରେ ଡିସେମ୍ବର ପହିଲାରୁ ରାତି ତାପମାତ୍ରା ପ୍ରାୟ 3 ରୁ 4 ଡିଗ୍ରୀ ପର୍ଯ୍ୟନ୍ତ ହ୍ରାସ ପାଇବ । ଉତ୍ତର ଆଭ୍ୟନ୍ତରୀଣରେ 2ଡିଗ୍ରୀ ରାତି ତାପମାତ୍ରା କମିବାର ସମ୍ଭାବନା ଥିବାରୁ ଡିସେମ୍ବର ପହିଲାରୁ ସାରା ରାଜ୍ୟରେ ଶୀତ ବଢ଼ିବ ବୋଲି ସେ କହିଛନ୍ତି ।

ରାଜ୍ୟର ପାହାଡ଼ିଆ ଏବଂ ସମତଳ ଅଞ୍ଚଳଗୁଡ଼ିକରେ ରାତି ତାପମାତ୍ରା ହ୍ରାସ ପାଇଛି । ଆଗକୁ 2 ରୁ 3 ଡିଗ୍ରୀ ପର୍ଯ୍ୟନ୍ତ ସର୍ବନିମ୍ନ ତାପମାତ୍ରା ଆହୁରି ଖସିବାର ସମ୍ଭାବନା ଥିବାରୁ ଶୀତ ବଢ଼ିପାରେ ।

English summary

Weather update: Low Pressure forms over bay of Bengal