ଗଛ କାଟିବା ଅନୁମତି ଦେବାକୁ ନେଉଥିଲେ ହାତଗୁଞ୍ଜା, ଭିଜିଲାନ୍ସ ହାତରେ ବନ୍ଧା ହେଲେ ଫରେଷ୍ଚ ଗାର୍ଡ ଓ ଜଗୁଆଳି

Published: Monday, December 11, 2023, 19:12 [IST]

ଝାରସୁଗୁଡ଼ା: କ୍ଷେତ ଖାଉଥିଲା ବାଡ଼ । ଜଙ୍ଗଲ ସୁରକ୍ଷାରେ ନିୟୋଜିତ ଥିବା ଫରେଷ୍ଟ ଗାର୍ଡ଼ ଗଛ କାଟିବାକୁ ଅନୁମତି ଦେବାକୁ ନେଉଥିଲେ ଲାଞ୍ଚ । ଲାଞ୍ଚ ନେବା ବେଳେ ମାଡ଼ି ବସିଲା ଭିଜିଲାନ୍ସ ।

ଗଛ କାଟିବାକୁ ଅନୁମତି ଦେବାକୁ ଲାଞ୍ଚ ନେଇ ଭିଜିଲାନ୍ସ ଜାଲରେ ପଡ଼ିଛନ୍ତି ବନ୍ଧବାହାଲ ବନଖଣ୍ଡର ମହିଳା ଫରେଷ୍ଟ ଗାର୍ଡ ଓ ଜଗୁଆଳି । 15 ହଜାର ଟଙ୍କା ଲାଞ୍ଚ ନେଉଥିବା ବେଳେ ଧରିଛି ଭିଜିଲାନ୍ସ । ଧରାପଡିଥିବା ମହିଳା ଫରେଷ୍ଟ ଗାର୍ଡ ଜଣକ ନାଁ ଝରଣା ସାହୁ ଏବଂ ଜଗୁଆଳି ସଞ୍ଜୟ ବାରିକ ବୋଲି ଜଣାପଡ଼ିଛି ।

ଏନେଇ ରାଉରକେଲା ଭିଜିଲାନ୍ସ ଅଫିସରେ ଏକ ମାମଲା ରୁଜୁ କରାଯାଇଥିବା ବେଳେ ଅଧିକ ତଦନ୍ତ କରୁଛନ୍ତି ରାଉରକେଲା ଭିଜିଲାନ୍ସ ଟିମ୍ ।

ସୂଚନା ଅନୁସାରେ, ଘର ଅଗଣାରୁ ଗଛ କାଟିବାକୁ ଅନୁମତି ଦେବା ଓ ସମସ୍ତ ସୁବିଧା ସୁଯୋଗ ଯୋଗାଇଦେବା ପାଇଁ ଜଣେ ଅଭିଯୋଗକାରୀ ଶ୍ରୀମତି ସାହୁଙ୍କ ପାଖକୁ ଯାଇଥିଲେ । ଶ୍ରୀମତି ସାହୁ ଅଭିଯୋଗକାରୀଙ୍କ ଠାରୁ 15 ହଜାର ଟଙ୍କା ଲାଞ୍ଚ ମାଗିଥିଲେ । ଏନେଇ ଅଭିଯୋଗକାରୀ ଭିଜିଲାନ୍ସର ଦ୍ଵାରସ୍ତ ହୋଇଥିଲେ । ଆଜି ଯେତେବେଳେ ଅଭିଯୋଗକାରୀ ଶ୍ରୀମତି ସାହୁ ଓ ଶ୍ରୀ ବାରିକଙ୍କୁ ଟଙ୍କା ଦେଉଥିଲେ ସେତେବଳେ ପୂର୍ବରୁ ଯୋଜନା କରି ଛକି ବସିଥିବା ଭିଜିଲାନ୍ସ ଟିମ୍ ଚଢାଉ କରିଥିଲା । ସେମାନଙ୍କ ଠାରୁ ନଗଦ ଟଙ୍କା ଜବତ କରିଥିଲା ଟିମ୍ ।

ଗିରଫ ପରେ ଶ୍ରୀମତି ସାହୁଙ୍କ ବାସଭବନ ସମେତ 2ଟି ସ୍ଥାନରେ ଚଢାଉ କରିଛି ଝାରସୁଗୁଡା ଭିଜିଲାନ୍ସ । ଏହି ପ୍ରସଙ୍ଗରେ ଏକ ମାମଲା ରୁଜୁ ହୋଇ ଆଗାମୀ ତଦନ୍ତ ଜାରି ରହିଛି ।

Published On December 11, 2023