ସ୍କୁଲରେ ପିଲା ଶୁଣିବେ ଗପ, ଗାଇଡଲାଇନ୍ ଜାରି କଲା ଓସେପା

Published: Wednesday, December 27, 2023, 21:06 [IST]

ଭୁବନେଶ୍ୱର: ସ୍କୁଲରେ କୁନି କୁନି ପିଲା ଶୁଣିବେ ଗପ । ପିଲାମାନଙ୍କ ଗପ ଶୁଣିବା ଆଗ୍ରହକୁ ଦୃଷ୍ଟିରେ ରଖି ପିଲାଙ୍କ ଶୁଣିବା ଓ କହିବା ଅଭ୍ୟାସକୁ ବିକଶିତ କରିବାକୁ ଅଭିନବ ପଦକ୍ଷେପ ନେଇଛନ୍ତି ସରକାର । କେନ୍ଦ୍ର ସରକାରଙ୍କ ପ୍ରକଳ୍ପ ଅନୁମୋଦନ ବୋର୍ଡ, ପିଏବି ନିର୍ଦ୍ଦେଶ ଅନୁସାରେ ମାର୍ଗଦର୍ଶିକା ଜାରି କରିଛି ଓସେପା ।

ଗାଇଡଲାଇନ୍ ଅନୁସାରେ ପ୍ରାଥମିକ ସ୍କୁଲରେ ପିଲା ଶୁଣିବେ ଗପ । ଗପ ଶୁଣାଇବାର ଦକ୍ଷତା ଥିବା ବରିଷ୍ଠ ବ୍ୟକ୍ତି, ଶିକ୍ଷକ ଓ ଛାତ୍ରଛାତ୍ରୀ ସ୍କୁଲକୁ ଆସି ପିଲାଙ୍କୁ ଗପ କହିବେ । ପିଲାମାନେ କେବଳ ଗପ ଶୁଣିବେ ନାହିଁ ବରଂ ଗପ ଶୁଣିବା ପରେ ମନୋନୀତ ଛାତ୍ରଛାତ୍ରୀଙ୍କୁ ପୁନଃଆବୃତି କରିବାକୁ ସୁଯୋଗ ମିଳିବ । ଏଥିପାଇଁ ସର୍ବାଧିକ 2 ଟି ପିରିୟଡ ଦିଆଯିବ । ପ୍ରଧାନ ଶିକ୍ଷକ, ଶିକ୍ଷକ ଓ ଗୋଷ୍ଠୀ ସଦସ୍ୟ ଅଂଶଗ୍ରହଣ କରିବେ ଏବଂ ସିଆରସିସି କାର୍ଯ୍ୟକ୍ରମର ତଦାରଖ କରିବେ ।

ଏଭଳି କାର୍ଯ୍ୟକ୍ରମକୁ ପ୍ରାଥମିକ ଶିକ୍ଷକ ସଂଘ ସ୍ୱାଗତ କରିଛି । ଗପ ଶୁଣିବା ଓ କହିବା କାର୍ଯ୍ୟକ୍ରମର ପ୍ରସ୍ତୁତିକୁ ଜାନୁଆରୀ ମାସ ପ୍ରଥମ ସପ୍ତାହ ସୁଦ୍ଧା ଶେଷ କରିବାକୁ ଲକ୍ଷ୍ୟ ରଖାଯାଇଛି ।

ଏହା ରାଜ୍ୟର 27 ହଜାର 188 ପ୍ରାଥମିକ ସ୍କୁଲରେ କାର୍ଯ୍ୟକ୍ରମ ହେବ । ପ୍ରତି ସରକାରୀ ପ୍ରାଥମିକ ସ୍କୁଲ ପିଛା 1 ହଜାର ଟଙ୍କା ମଞ୍ଜୁର କରାଯିବ । ଏ ନେଇ ମୋଟ 2 କୋଟି 71 ଲକ୍ଷ 18 ହଜାର ଟଙ୍କା ମଞ୍ଜୁର ହେବ । ତେବେ କାର୍ଯ୍ୟକ୍ରମର କାର୍ଯ୍ୟକାରିତା ଉପରେ ପ୍ରଶ୍ନ ଉଠାଇଛି ଅଭିଭାବକ ସଂଘ ।
ଓସେପା ପକ୍ଷରୁ ଦିଆଯାଇଥିବା ଚିଠିରେ ସ୍କୁଲରେ ମୋଟ 6ଟି ଅଭିନବ କାର୍ଯ୍ୟକ୍ରମ ପାଇଁ ଅର୍ଥ ମଞ୍ଜୁର ହୋଇଛି । ଆଉ ପ୍ରତି କାର୍ଯ୍ୟକ୍ରମ ପାଇଁ ମାର୍ଗଦର୍ଶିକା ଜାରି କରିଛି ।

Published On December 27, 2023