ସରପଞ୍ଚ ଆନ୍ଦୋଳନ: ଆନ୍ତଃ ମନ୍ତ୍ରୀସ୍ତରୀୟ କମିଟି ପାଖକୁ ଦଲା ଦାବିପତ୍ର, ବିଚାର କରିବେ ସରକାର

ଭୁବନେଶ୍ୱର: 15 ଦଫା ଦାବି ନେଇ ରାଜ୍ୟବ୍ୟାପୀ ଚାଲିଥିବା ସରପଞ୍ଚଙ୍କ ଦାବି ଉପରେ ବିଚାର କରିବେ ସରକାର । ଆନ୍ତଃ ମନ୍ତ୍ରୀସ୍ତରୀୟ କମିଟି ପାଖକୁ ପଠାଯାଇଛି ସରପଞ୍ଚଙ୍କ ଦାବିପତ୍ର । ଏହାର ପୁଙ୍ଖାନୁପୁଙ୍ଖ ନିରୀକ୍ଷଣ କରିବା ପରେ ଆଗାମୀ ପଦକ୍ଷେପ ନିଆଯିବ । ଏ ନେଇ କହିଛନ୍ତି ଅର୍ଥମନ୍ତ୍ରୀ ବିକ୍ରମ କେଶରୀ ଆରୁଖ ।

ରାଜ୍ୟ ସରପଞ୍ଚ ମହାସଂଘ କର୍ମକର୍ତ୍ତାମାନେ ଗତକାଲି ଆରୁଖଙ୍କୁ ତାଙ୍କ ବିଧାନସଭା ପ୍ରକୋଷ୍ଠରେ ଭେଟି ସେମାନଙ୍କ ଦାବି ସଂପର୍କିତ ସ୍ମାରକପତ୍ର ପ୍ରଦାନ କରିଥିଲେ । ଆରୁଖ ସେମାନଙ୍କର ଦାବି ସମ୍ବନ୍ଧରେ ଅବଗତ ହେବା ପରେ ଏହାକୁ ଆନ୍ତଃ ମନ୍ତ୍ରୀସ୍ତରୀୟ କମିଟି ଅଧିକ ନିରୀକ୍ଷଣ କରିବା ପାଇଁ ପଠାଯିବ ଓ ତର୍ଜମା ପରେ ଆଗାମୀ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଥିଲେ ।

ଉଲ୍ଲେଖଥାଉକି, ଗତ କିଛି ଦିନ ଧରି ରାଜ୍ୟବାପୀ ଧାରଣାରେ ବସିଥିବା ସରପଞ୍ଚଙ୍କ ସହ ସରକାରଙ୍କ ଆଲୋଚନା ହୋଇଥିଲା । ଏଥିରୁ କୌଣସି ନିଷ୍କର୍ସ ବାହାରି ନଥିଲା । ଏହା ପରେ ଦାବି ପୂରଣ ଯାଏଁ ଧାରଣା ଚାଲୁ ରଖିବାକୁ ନିଷ୍ପତ୍ତି ନେଇଥିଲା ସଂଘ ।

15 ଦଫା ଦାବି ନେଇ ରାଜ୍ୟବ୍ୟାପୀ ଶତାଧିକ ସରପଞ୍ଚ ରାଜରାସ୍ତାକୁ ଓହ୍ଲାଇଛନ୍ତି । ତ୍ରିସ୍ତରୀୟ ପଞ୍ଚାୟତରାଜ ବ୍ୟବସ୍ଥାରେ ସରପଞ୍ଚମାନଙ୍କୁ ପ୍ରାବଧାନ ଅନୁଯାୟୀ ପୂର୍ଣ୍ଣ କ୍ଷମତା ପ୍ରଦାନ ସମେତ ବିଭିନ୍ନ ଦାବି ନେଇ ରାଜ୍ୟର ଅନେକ ସ୍ଥାନରୁ ସରପଞ୍ଚମାନେ ଭୁବନେଶ୍ୱରର ଲୋୟର ପିଏମଜିରେ ଧାରଣାରେ ବସିଛନ୍ତି । ପାଣ୍ଠି ବୃଦ୍ଧି ଏବଂ ପେନସନ ରାଶି 2350 ରୁ 30 ହଜାର ଟଙ୍କା ବୃଦ୍ଧି କରିବାକୁ ଦାବି ହୋଇଛି ।

ଏହା ଆଗରୁ ଦୁଇ ମାସ ପୂର୍ବରୁ ଏ ନେଇ ଜିଲ୍ଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରିଥିଲେ । ତେବେ ଦାବି ପୂରଣ ନ ହେବାରୁ ରାଜ୍ୟର ବିଭିନ୍ନ ବ୍ଲକ ସଦର ମହକୁମା ଓ ରାଜଧାନୀରେ ବିକ୍ଷୋଭ ପ୍ରଦର୍ଶନ କରିଛନ୍ତି ।

English summary

Sarapanch Strike: Memorandum sent to inter ministerial committee