ରୋହିତଙ୍କ ପଦ ଯିବା ପଛରେ କଣ ରହିଛି ପ୍ରକୃତ କାରଣ, ତାଙ୍କ ସ୍ଥାନ ନେବେ କି ସୁଶାନ୍ତ

Updated: Friday, June 9, 2023, 20:05 [IST]

ଭୁବନେଶ୍ୱର: ବର୍ଷେ ତଳେ ହୋଇଥିଲେ ମନ୍ତ୍ରୀ । ହଠାତ୍ ବାହାର ରାସ୍ତା ଦେଖାଇଦେଲେ ନବୀନ । ମନ୍ତ୍ରିମଣ୍ଡଳରୁ ବାହାର କରି ଓଡ଼ିଶା ରାଜନୀତିରେ ହଟଚମଟ ସୃଷ୍ଟି କଲେ ନବୀନ ପଟ୍ଟନାୟକ । ଅରୁଣ ସାହୁଙ୍କ ସ୍ଥାନରେ ମନ୍ତ୍ରୀ ହୋଇଥିବା ରୋହିତଙ୍କ ପଦ ବର୍ତ୍ତମାନ ଅତନୁଙ୍କ ପାଖକୁ ଯାଇଛି ।

ରେଢାଖୋଲରୁ ଦୁଇ ଥରର ବିଧାୟକ ହେବା ପରେ ଠିକ୍ ବର୍ଷେ ତଳେ ମନ୍ତ୍ରୀ ଆସନରେ ବସାଇଥିଲେ ନବୀନ । କଣ ହେଲା ଯେ ହଠାତ୍ ନେଇଗଲେ ମନ୍ତ୍ରୀ ପଦ । ଉଚ୍ଚଶିକ୍ଷା ମନ୍ତ୍ରୀ ଥିବା ରେଢ଼ାଖୋଲ ବିଧାୟକ ରୋହିତ ପୂଜାରୀଙ୍କୁ ନବୀନ ତାଙ୍କ କ୍ୟାବିନେଟରୁ ବିଦା କରିଛନ୍ତି । ତେବେ ସାଧାରଣ ନିର୍ବାଚନର କିଛି ମାସ ପୂର୍ବରୁ କାହିଁକି ରୋହିତ ପୂଜାରୀଙ୍କୁ କ୍ୟାବିନେଟରୁ ହଟାଇଦେଲେ ନବୀନ ? ତାଙ୍କ ସ୍ଥାନରେ କାହାକୁ ଦେବେ ପରବର୍ତ୍ତୀ ଦାୟିତ୍ୱ ?ମନ୍ତ୍ରୀ ପଦ ଯିବା ପଛରେ କଣ ରହିଛି ପ୍ରକୃତ କାରଣ ? ତେବେ ଆସନ୍ତୁ ଜାଣିବା ରୋହିତ ପୂଜାରୀଙ୍କ ମନ୍ତ୍ରୀ ପଦ ଯିବା ପଛରେ କଣ ହୋଇପାରେ କାରଣ....

କୁହାଯାଉଛି ଉଚ୍ଚଶିକ୍ଷା ମନ୍ତ୍ରୀ ଭାବେ ରୋହିତଙ୍କ ପ୍ରଦର୍ଶନ ସେତେଟା ଭଲ ନଥିଲା । ତେଣୁ ତାଙ୍କୁ ଏଥିରୁ ବାଦ୍ ଦିଆଯାଇଥାଇପାରେ ବୋଲି ରାଜ୍ୟ ରାଜନୀତିରେ କଳ୍ପନା କରାଯାଉଛି । ଏପରିକି ନବୀନଙ୍କ ଅଧିକ ଆଶା ଥାଇପାରେ, ତାହା ପୂରଣ କରିବାରେ ସେ ବିଫଳ ହୋଇଥାଇପାରିଥାନ୍ତି ବୋଲି ମଧ୍ୟ ନିଜେ କହିଛନ୍ତି ରୋହିତ । କିନ୍ତୁ ସେ ନିଜେ ତାଙ୍କର ବେଷ୍ଟ୍ ଦେଇଥିବା କହିଛନ୍ତି ରୋହିତ ।

ଏହା ବାଦ୍ କୁହାଯାଉଛି, ରୋହିତ ପୂଜାରୀ ଓ ଉଚ୍ଚଶିକ୍ଷା ବିଭାଗର ସଚିବ ବିଷ୍ଣୁପଦ ସେଠୀଙ୍କ ମଧ୍ୟରେ କୁଆଡ଼େ ପଡ଼ୁ ନଥିଲା । ଯାହାକି ବିଭାଗର ପ୍ରଦର୍ଶନକୁ ଖରାପ କରିଥିଲା । ମନ୍ତ୍ରୀ ଓ ସଚିବଙ୍କ ମଧ୍ୟରେ ସମନ୍ୱୟ ଅଭାବରୁ ଗୋଟିଏ ଫାଇଲ୍ କାମ ପାଇଁ ଦୀର୍ଘ ସମୟ ଲାଗୁଥିଲା । ତେଣୁ ମନ୍ତ୍ରୀପଦ ଯିବା ପଛରେ ଏହା ବି କାରଣ ହୋଇପାରେ ବୋଲି କୁହାଯାଉଛି ।

ବିଶେଷକରି ନବ ଦାସଙ୍କ ହତ୍ୟା ପରେ ପୂଜାରୀଙ୍କ ସାଂଗଠନିକ କାର୍ଯ୍ୟ ଓ ପ୍ରତିଶ୍ରୁତି ଦଳୀୟ ନେତାଙ୍କ ନଜରକୁ ଆସିଥିଲା । ଏପରିକି ପଶ୍ଚିମ ଓଡ଼ିଶାରେ ବିଜେଡିର ଶକ୍ତିଶାଳୀ ଗୋଷ୍ଠୀ ପୂଜାରୀଙ୍କୁ ବିରୋଧ କରୁଥିଲେ । ଝାରସୁଗୁଡ଼ା ଉପନିର୍ବାଚନରେ ବି ବିଜେଡି ରୋହିତ ପୂଜାରୀଙ୍କୁ ଷ୍ଟାର ପ୍ରଚାରକ ତାଲିକାରେ ସ୍ଥାନ ଦେଇ ନଥିଲା । ତେଣୁ ଦଳ ତାଙ୍କୁ ପ୍ରମୁଖ ଦାୟିତ୍ୱରୁ ହଟାଇ କର୍ମୀଙ୍କୁ ସନ୍ତୁଷ୍ଟ କରାଯାଇଥାଇ ପାରେ ବୋଲି ମଧ୍ୟ କେତେକ ରାଜନୈତିକ ବିଶେଷଜ୍ଞ ମତ ପ୍ରକାଶ କରିଛନ୍ତି ।

କିଛି ଦିନ ପୂର୍ବରୁ ରୋହିତ ପୂଜାରୀ ଦେଇଥିବା ବିବଦୀୟ ମନ୍ତବ୍ୟ ମଧ୍ୟ ଦଳ ମୁଖିଆଙ୍କୁ ଅସନ୍ତୁଷ୍ଟ କରିଥାଇପାରେ ବୋଲି ମଧ୍ୟ କୁହାଯାଉଥିଲା । ରାଜନେତା 60 ବର୍ଷ ବୟସରେ ଅବସର ନେବା ଉଚିତ୍ । ଯାହାକି ବିବାଦ ସୃଷ୍ଟି କରିଥିଲା । ତାପରେ ପୂଜାରୀ ସ୍ପଷ୍ଟ କରି କହିଥିଲେ, ସେ ତାଙ୍କ ନିର୍ବାଚନ ମଣ୍ଡଳୀକୁ ନେଇ ଏଭଳି ମନ୍ତବ୍ୟ ଦେଇଛନ୍ତି । କିନ୍ତୁ ପୂଜାରୀଙ୍କ ଏଭଳି ମନ୍ତବ୍ୟ ହୁଏତ ଶାସକ ଗୋଷ୍ଠୀକୁ ଅସନ୍ତୁଷ୍ଟ କରିଥିଲା ।

ଏ ସବୁକୁ ବାଦ୍ ଦେଲେ ନିକଟରେ ହୋଇଥିବା ମନ୍ତ୍ରିମଣ୍ଡଳ ପରିବର୍ତ୍ତନରେ ଭଟ୍ଟଲି ବିଧାୟକ ସୁଶାନ୍ତ ସିଂହଙ୍କୁ ସାମିଲ୍ କରା ନ ଯିବାକୁ ନେଇ ପଶ୍ଚିମ ଓଡ଼ିଶାର ଅନେକ ନେତା ବିରୋଧ କରିଥିଲେ । ଏହା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟି ଆଲୋଚନା କରିଥିଲେ ସୁଶାନ୍ତ ସିଂହ । ରୋହିତ ପୂଜାରୀଙ୍କୁ ବର୍ତ୍ତମାନ ଆସନରୁ ହଟାଇ ସେ ସ୍ଥାନରେ ସୁଶାନ୍ତ ସିଂହଙ୍କୁ ବସା ଯାଇପାରେ ବୋଲି ମଧ୍ୟ ଚର୍ଚ୍ଚା ହେଉଛି ।