ଗାୟକଙ୍କୁ ଦେଇଥିଲେ ନକଲି ନୋଟ୍, ପୋଲିସ୍ କରିଦେଲା ପର୍ଦ୍ଦାଫାସ୍
ବଲାଙ୍ଗୀର: ଅଷ୍ଟ ପ୍ରହରୀ ନାମଯଜ୍ଞରେ ଗାୟକଙ୍କୁ ଡାକିଥିଲେ । ପାଉଣା ବାବଦକୁ ଦେଇଥିଲେ ନକଲି ନୋଟ୍ । ଗାୟକଙ୍କୁ ନକଲି 500 ଟଙ୍କିଆ ନୋଟ ଦେବା ଦୁଇ ଜଣଙ୍କୁ ମହଙ୍ଗା ପଡ଼ିଛି । ଏହା ପରେ ବନ୍ଧା ହେଲେ ଅଭିଯୁକ୍ତ ଓ ତାର ସହଯୋଗୀ ।
ବଲାଙ୍ଗୀର ପାଟଣାଗଡ଼ରେ ଏପରି ଏକ ନକଲି ନୋଟ୍ କାରବାରର ପର୍ଦ୍ଦାଫାସ୍ ହୋଇଛି । ଗିରଫ ଅଭିଯୁକ୍ତ ମାନେ ହେଲେ ପାଟଣାଗଡ଼ ଥାନା ଭଇଷା ଗାଁର ବରୁଣ ପାନୁଆନ ଏବଂ ଦେଓଗାଁ ଥାନା ବୁଡ଼ାବାହାଲ ଗାଁର ରୋହିତ ବସ୍ତିଆ ।
ସୂଚନା ଅନୁସାରେ, ଗତ 2 ଦିନ ତଳେ ଭଇଷା ଗାଁରେ ଅଷ୍ଟ ପ୍ରହରୀ ନାମଯଜ୍ଞ ଚାଲିଥିଲା । ଏହି ସମୟରେ ଜଣେ ଗାୟକ ନାମଯଜ୍ଞରେ ଗୀତ ଗାଉଥିଲେ । ବରୁଣ ପାନୁଆନ ସେଠାରେ ଉପସ୍ଥିତ ଥିଲେ । ଗାୟକଙ୍କ ଗୀତ ତାଙ୍କୁ ଭଲ ଲାଗିଥିଲା । ସେ ଖୁସିରେ ତାଙ୍କୁ 2ଟି 500 ଟଙ୍କିଆ ନୋଟ୍ ଦେଇଥିଲେ । ଘରେ ଯାଇ ଦେଖିଲା ବେଳକୁ 2ଟି 500 ଟଙ୍କା ନକଲି ଥିଲା । ଏନେଇ ଗାୟକ ଜଣଙ୍କ ଘଟଣା ବିଷୟରେ ସ୍ଥାନୀୟ ସରପଞ୍ଚଙ୍କୁ ଜଣାଇଥିଲେ ।
ସରପଞ୍ଚ ଏନେଇ ପାଟଣାଗଡ଼ ଥାନାରେ ଅଭିଯୋଗ କରିଥିଲେ । ପୋଲିସ ଖୋଳତାଡ଼ ଆରମ୍ଭ କରିବା ସହ ବରୁଣ ପାନୁଆନଙ୍କୁ ଉଠାଇ ଆଣି ପଚରାଉଚରା କରିଥିଲା । ପୋଲିସ ଆଗରେ ବରୁଣ ସବୁ ଗୁମର ଖୋଲିଥିଲେ । ଏହି ଘଟଣା ତା ସହଯୋଗୀ ରୋହିତ ସଂପୃକ୍ତ ଥିବା ବରୁଣ ପୋଲିସକୁ କହିଥିଲେ । ପରେ ପୋଲିସ ରୋହିତ ଓ ବରୁଣଙ୍କ ଘରେ ଚଢ଼ାଉ କରିଥିଲା । ଚଢ଼ାଉ ବେଳେ 274 ଟି 500 ଟଙ୍କିଆ ନୋଟ୍ ଜବତ କରିଥିଲା ।ଏହାର ମୂଲ୍ୟ 1 ଲକ୍ଷ 37 ହଜାର ଟଙ୍କା ହେବ । ଏହାସହ କମ୍ପୁଟର ଓ ପ୍ରିଣ୍ଟର ମଧ୍ୟ ଜବତ କରିଛି ପୋଲିସ୍ । ପୋଲିସ ଉଭୟଙ୍କୁ ଗିରଫ କରି କୋର୍ଟ ଚାଲାଣ କରିଛି ଓ ଏହି ଚେର କେଉଁଠିକି ଲମ୍ବିଛି ତାର ତଦନ୍ତ କରୁଛି ।
Click it and Unblock the Notifications
Sign in with Google