20 ହଜାର ଟଙ୍କା ବଦଳାଅ... 300 ଟଙ୍କା ମଜୁରୀ ନିଅ.. ବଡ଼ ବଡ଼ିଆଙ୍କ ଗୋଲାପୀ ନୋଟ୍ ବଦଳାଇବାକୁ ଲମ୍ବା ଲାଇନ୍

Published: Tuesday, October 31, 2023, 14:53 [IST]

ଭୁବନେଶ୍ୱର: ବଡ଼ ବଡିଆଙ୍କ ଗୋଲାପୀ ନୋଟ୍ ବଦଳାଇଲେ ମିଳୁଛି ମଜୁରୀ । 20 ହଜାର ଟଙ୍କାର 2000 ଟଙ୍କା ବଦଳାଇଲେ ମିଳୁଛି 300 ଟଙ୍କା ମଜୁରୀ । ସେଥିଲାଗି ଭୁବନେଶ୍ୱର ରିଜର୍ଭ ବ୍ୟାଙ୍କ ଆଗରେ ଦେଖିବାକୁ ମିଳିଛି ଲମ୍ବା ଲାଇନ୍ । ଘଣ୍ଟା ଘଣ୍ଟା ଧରି ଲାଇନ୍ ରେ ଛିଡ଼ା ହେଉଛନ୍ତି ଲୋକ ।

ବିଶେଷ କଥା ହେଲା ଟଙ୍କା ବଦଳ କରିବାକୁ ଆସିଥିବା ଲୋକମାନଙ୍କ ମଧ୍ୟରେ ପ୍ରାୟ ରହିଛନ୍ତି ଦିନ ମଜୁରିଆ ଏବଂ ବସ୍ତି ବାସିନ୍ଦା । ବ୍ୟାଙ୍କରେ ଅକ୍ଟୋବର 7 ତାରିଖ ଯାଏଁ ଟଙ୍କା ବଦଳାଇବାର ଶେଷ ସୀମା ଥିବା ବେଳେ ଆରବିଆଇରେ ଏବେ ଏହି ଟଙ୍କା ବଦଳାଇବା ବ୍ୟବସ୍ଥା ଜାରି ରହିଛି । ତେବେ ଟଙ୍କା ବଦଳାଇବା ପାଇଁ ହଠାତ୍ ଏଭଳି ଗହଳକୁ ନେଇ ସନ୍ଦେହ ବଢିବାରେ ଲାଗିଛି । 2000 ଟଙ୍କା ଅଚଳ ହେବା ନେଇ ଆରବିଆଇ ଘୋଷମା କରିବାର ବହୁ ପୂର୍ବରୁ ବ୍ୟାଙ୍କ କିମ୍ବା ଏଟିଏମ୍ ରେ 2000 ଟଙ୍କିଆ ନୋଟ୍ ଦେଖିବାକୁ ମିଳୁନଥିଲା । କିନ୍ତୁ ହଠାତ୍ ଏତେ ପରିମାଣର 2000 ଟଙ୍କିଆ ନୋଟ୍ କେଉଁଠୁ ଆସିଲା ସେ ନେଇ ପ୍ରଶ୍ନ ଉଠୁଛି ।

ଗତକାଲି ଅଧିକାଂଶ ବସ୍ତି ବାସିନ୍ଦା ଟଙ୍କା ବଦଳ ନେଇ ଆରବିଆଇ କାର୍ଯ୍ୟାଳୟ ବାହାରେ ଲାଇନ୍ ଲଗାଇଥିଲେ । ଆଉ ଆଜି ପୁଣିଥରେ ଲୋକଙ୍କ ଗହଳି ଦେଖିବାକୁ ମିଳିଛି । ଏହି ଘଟଣାକୁ ନେଇ RBI ଭୁବନେଶ୍ୱର ଆଞ୍ଚଳିକ କାର୍ଯ୍ୟାଳୟ ନିର୍ଦ୍ଦେଶକ କହିଛନ୍ତି, କେନ୍ଦ୍ର ସରକାରଙ୍କ ନିର୍ଦ୍ଦେଶାନୁଯାୟୀ, 2 ହଜାର ଟଙ୍କିଆ ନୋଟ ବଦଳ ଓ ଜମା ପାଇଁ ବ୍ୟବସ୍ଥା ଅଛି । ତେଣୁ ପ୍ରତିଦିନ ଏଠାକୁ ପାଖାପାଖି 2 କୋଟି ଟଙ୍କାର 2 ହଜାର ଟଙ୍କିଆ ନୋଟ ଆସୁଛି । ସେଥିରୁ ପ୍ରାୟ 95 ଭାଗ ବଦଳ ହେଉଛି ଓ ମାତ୍ର 5% ଜମା ହେଉଛି ।

ଟଙ୍କା ବଦଳ କରିବାକୁ ଆସିଥିବା ଲୋକ ଏ ସବୁ ତାଙ୍କର ନ ହେଲେ ମଧ୍ୟ ବଡ଼ ବଡ଼ିଆ ବାବୁଙ୍କ ଟଙ୍କା ବଦଳାଇବାକୁ ଲାଇନ ଲଗାଇଛନ୍ତି ବୋଲି ବସ୍ତିବାସିନ୍ଦା ମାନେ ପ୍ରତିକ୍ରିୟା ରଖିଛନ୍ତି । 20 ହଜାର ଟଙ୍କା ବଦଳାଇଲେ ଅସଲି ମାଲିକଙ୍କ ଠାରୁ ମିଳୁଛି 300 ଟଙ୍କା । କିଛି ବ୍ୟବସାୟୀ ଲୋକଙ୍କ ଜରିଆରେ ନୋଟ ବଦଳାଉଥିବା ଜଣାପଡିଛି । ଏପରିକି କେତେ ଲୋକ ନୋଟ୍ ଅଚଳ ହୋଇଥିବା ନେଇ ଜାଣି ନଥିବା ବୋଲି କହିଛନ୍ତି । ତେବେ ହଠାତ୍ ଆରବିଆଇ ରେ ନୋଟ୍ ବଦଳ ନେି ଖବର ପାଇବା ଏବଂ ଏତେ ପରିମାଣର 2000 ଟଙ୍କିଆ ନୋଟ୍ ସାଧାରଣ ଗରିବ ଖଟିଖିଆଙ୍କ ପାଖରେ କେଉଁଠୁ ଆସିଲା ସେ ନେଇ ପ୍ରଶ୍ନ ଉଠୁଛି ।

Published On October 31, 2023