ନୂଆଦିଲ୍ଲୀ ଆଇ. ଆଇ. ଟି. ଏଫ୍ ରେ ଗ୍ରାହକଙ୍କ ମନ ଜିଣୁଛି ଓଡ଼ିଶା ମହିଳା ଏସ୍ଏଚଜିର ଉତ୍ପାଦ

ପ୍ରଗତି ମୈଦାନରେ ହେଉଥିବା ଏହି ଜାତୀୟ ସ୍ତରର ବାଣିଜ୍ୟ ମେଳାର ଓଡ଼ିଶା ପାଭିଲିଅନ୍ ରେ ସ୍ଥାନ ପାଇଛି ପଞ୍ଚାୟତିରାଜ୍ ଓ ପାନୀୟ ଜଳ ବିଭାଗର ଓରମାସ୍ ଷ୍ଟଲ୍ । ଓଡ଼ିଶାର ଏହି ଷ୍ଟଲରେ ମହିଳା ସ୍ୱୟଂ ସହାୟକ ଗୋଷ୍ଠୀମାନଙ୍କର ଉତ୍ପାଦ ବିକ୍ରି ହେଉଛି ।

ନୂଆଦିଲ୍ଲୀ : ଜାତୀୟ ରାଜଧାନୀରେ ଅନୁଷ୍ଠିତ ଭାରତ ଅନ୍ତର୍ଜାତୀୟ ବାଣିଜ୍ୟ ମେଳା(India International Trade Fair)ରେ ଗ୍ରାହକଙ୍କ ମନ ଜିଣୁଛି ଓଡ଼ିଶାର ଜିନିଷ । ପ୍ରଗତି ମୈଦାନରେ ହେଉଥିବା ଏହି ଜାତୀୟ ସ୍ତରର ବାଣିଜ୍ୟ ମେଳାର ଓଡ଼ିଶା ପାଭିଲିଅନ୍ ରେ ସ୍ଥାନ ପାଇଛି ପଞ୍ଚାୟତିରାଜ୍ ଓ ପାନୀୟ ଜଳ ବିଭାଗର ଓରମାସ୍ ଷ୍ଟଲ୍ । ଓଡ଼ିଶାର ଏହି ଷ୍ଟଲରେ ମହିଳା ସ୍ୱୟଂ ସହାୟକ ଗୋଷ୍ଠୀମାନଙ୍କର ଉତ୍ପାଦ ବିକ୍ରି ହେଉଛି । ମହିଳା ଏସ୍ଏଚଜିଙ୍କ ଦ୍ୱାରା ପ୍ରସ୍ତୁତ କାଗଜ କାମ, ପଟ୍ଟଚିତ୍ର, କାଇଁଚ ଘାସ, ସବାଇ ଘାସ ଉତ୍ପାଦ ସବୁ ଗ୍ରାହକଙ୍କୁ ଆକୃଷ୍ଟ କରୁଛି । ଏହା ବ୍ୟତୀତ ଏହା ସାହାଯ୍ୟରେ ଓଡ଼ିଶାର ଉତ୍ପାଦ ଜାତୀୟ ସ୍ତରରେ ପହଞ୍ଚିବାରେ ସହାୟକ ହୋଇଛି ।

ଓଡ଼ିଶା ପାଭିଲିଅନ୍ ରେ ସ୍ଥାନ ପାଇଥିବା ଷ୍ଟଲରେ କେନ୍ଦୁଝରର ଅଦରକାରୀ କାଗଜରୁ ପ୍ରସ୍ତୁତ ସାମଗ୍ରୀ, ପୁରୀର ପଟ୍ଟଚିତ୍ର, ଜଗତସିଂହପୁରର କାଇଁଚ ଘାସରୁ ତିଆରି ସାମଗ୍ରୀ ଓ ମୟୂରଭଞ୍ଜ ର ସବାରୁ ଘାସ ସାମଗ୍ରୀ ଆଦି ବିକ୍ରି ହେଉଛି । ଷ୍ଟଲ୍ ଗୁଡିକରେ ଗ୍ରାମୀଣ ମହିଳା କାରିଗରଙ୍କ ହାତ ତିଆରି ଘର ସାଜସଜ୍ଜା ସାମଗ୍ରୀ ଓ ଡେକୋରେଟିଭ୍ ସାମଗ୍ରୀ ବିକ୍ରି ହେଉଛି । ବଜାର ଠାରୁ କମ୍ ଦରରେ ମିଳୁଥିବାରୁ ଗ୍ରାହକଙ୍କ ଭିଡ଼ ଜମୁଛି । ଏହା ସହିତ ଓଡ଼ିଶାର ଉତ୍ପାଦ ପ୍ରତି ଅନ୍ୟ ରାଜ୍ୟର ଗ୍ରାହକ ମଧ୍ୟ ଆକୃଷ୍ଟ ହେଉଛନ୍ତି ।

ନଭେମ୍ବର 14 ତାରିଖରୁ ଆରମ୍ଭ ହୋଇଥିବା ଏହି ମେଳାକୁ ପ୍ରଥମ ଦିନରେ ଓଡ଼ିଶା ପାଭିଲିଅନ୍ କୁ ପଞ୍ଚାୟତିରାଜ୍ ଓ ପାନୀୟ ଜଳ ବିଭାଗ ମନ୍ତ୍ରୀ ପ୍ରଦୀପ କୁମାର ଅମାତ ଉଦଘାଟନ କରିଥିଲେ । ଏହି ଅବସରରେ ମାନ୍ୟବର ମନ୍ତ୍ରୀ ଓରମାସ ତରଫରୁ ଖୋଲି ଥିବା ସମସ୍ତ ଷ୍ଟଲ୍ ବୁଲି ଦେଖିଥିଲେ । ପ୍ରଗତି ମୈଦାନ ରେ ଏହି ମେଳା ନଭେମ୍ବର 27 ତାରିଖ ପର୍ଯ୍ୟନ୍ତ ଚାଲିବ ।

English summary

Odisha SHG Products shines at IITF Delhi