ଏଥର ବି କାଉଡ଼ିଆଙ୍କୁ ବୋଲବମ୍ ଯାତ୍ରା ମନା, କୋଭିଡ୍ ସ୍ଥିତିକୁ ନେଇ ରାଜ୍ୟ ସରକାରଙ୍କ ନିଷ୍ପତ୍ତି

ପାଣିଭାର ନେଇ ଯାଇ ଶିବ ମନ୍ଦିର ଯାଇପାରିବେନି କାଉଡ଼ିଆ । କରୋନା ସଂକ୍ରମଣକୁ ଦୃଷ୍ଟିରେ ରଖି ରାଜ୍ୟ ସରକାର ଚଳିତ ବର୍ଷ ମଧ୍ୟ ବୋଲବମ୍ ଉପରେ ରୋକ୍ ଲଗାଇଛନ୍ତି ।

ଭୁବନେଶ୍ୱର : ଏଥର ବି କାଉଡ଼ିଆଙ୍କୁ ବୋଲବମ୍ ଯାତ୍ରା ମନା । ପାଣିଭାର ନେଇ ଯାଇ ଶିବ ମନ୍ଦିର ଯାଇପାରିବେନି କାଉଡ଼ିଆ । କରୋନା ସଂକ୍ରମଣକୁ ଦୃଷ୍ଟିରେ ରଖି ରାଜ୍ୟ ସରକାର ଚଳିତ ବର୍ଷ ମଧ୍ୟ ବୋଲବମ୍ ଉପରେ ରୋକ୍ ଲଗାଇଛନ୍ତି । ଶ୍ରାବଣ ମାସ ପାଇଁ ରାଜ୍ୟ ସରକାର ନିୟମ ଲାଗୁ କରିଛନ୍ତି । ଫଳରେ ଜୁଲାଇ ଓ ଅଗଷ୍ଟ ମାସରେ କାଉଡ଼ିଆ ଯାତ୍ରା ବନ୍ଦ ରହିବ ।

ରାଜ୍ୟରେ କୋଭିଡ-19 ସ୍ଥିତିରେ ସୁଧାର ଆସି ନଥିବାର ସରକାର ଏଭଳି ନିଷ୍ପତ୍ତି ନେଇଛନ୍ତି । ରାଜ୍ୟ ସରକାରଙ୍କ ଗାଇଡଲାଇନ୍ ଅନୁସାରେ କାଉଡ଼ିଆମାନେ କୌଣସି ଧାର୍ମିକ ସ୍ଥାନରୁ ଜଳଧରି ଯାତ୍ରା କରିପାରିବେ ନାହିଁ ।

ସୂଚନାଯୋଗ୍ୟ, ରାଜ୍ୟରେ କୋଭିଡ ସଂକ୍ରମଣ ବୃଦ୍ଧି ଯୋଗୁଁ ଗତବର୍ଷ ମଧ୍ୟ କାଉଡ଼ିଆ ଯାତ୍ରାକୁ ରାଜ୍ୟ ସରକାର ବାରଣ କରିଥିଲେ । ଚଳିତ ବର୍ଷ ମଧ୍ୟ ରାଜ୍ୟରେ କୋରନାର ଦ୍ୱିତୀୟ ଲହର କାଳରେ ସଂକ୍ରମଣ ହାର କିଛିଟା କମିଥିଲେ ମଧ୍ୟ ମୃତ୍ୟୁ ସଂଖ୍ୟା ଚିନ୍ତାଜନକ ରହିଛି । ସଂକ୍ରମଣ ନିୟନ୍ତ୍ରଣରେ ନଥିବାରୁ ରାଜ୍ୟ ସରକାର ବୋଲବମ ଯାତ୍ରା ଉପରେ କଟକଣା ଲଗାଇଛନ୍ତି ।

ଚଳିତ ମାସ 25 ତାରିଖ ଠାରୁ ଶ୍ରାବଣ ମାସ ଆରମ୍ଭ ହୋଇ ଅଗଷ୍ଟ 22 ରେ ଶେଷ ହେବ । ଚଳିତ ବର୍ଷ ଶ୍ରାବଣ ମାସରେ ମୋଟ 5ଟି ସୋମବାର (ଜୁଲାଇ 26, ଅଗଷ୍ଟ 1, 8, 15 ଓ 22) ପଡୁଛି । କିନ୍ତୁ ବୋଲବମ୍ ଯାତ୍ରା ସମୟରେ ସାମାଜିକ ଦୂରତା ତଥା କୋଭିଡ-୧୯ କଟକଣାର ଉଲ୍ଲଂଘନ ହେବାର ସମ୍ଭାବିତ ଆଶାକୁ ଦୃଷ୍ଟିରେ ରଖି ସରକାର ଏଭଳି ପଦକ୍ଷେପ ନେଇଛନ୍ତି ।

English summary

Odisha Government Cancelled BolBom Yatra For This Year