ଧାନକିଣା ସମ୍ପର୍କରେ ଆସନ୍ତା କାଲି ବିବୃତ୍ତି ରଖିବେ ବିଭାଗୀୟ ମନ୍ତ୍ରୀ

ବୈଠକ ପରେ ବାଚସ୍ପତି ରୁଲିଂ ଦେଇ ଆସନ୍ତା କାଲି ଧାନ କିଣା ସମ୍ପର୍କରେ ବିଭାଗୀୟ ମନ୍ତ୍ରୀ ବିବୃତ୍ତି ରଖିବା ନେଇ ନିର୍ଦ୍ଦେଶ ଦେଇଛନ୍ତି । ଏଥିସହିତ 7ଦିନ ପରେ ଧାନକିଣାରେ ଅଗ୍ରଗତି ନେଇ ପୁଣି ଥରେ ଗୃହକୁ ଅବଗତ କରାଇବେ ବୋଲି ବାଚସ୍ପତି ନିର୍ଦ୍ଦେଶ ଦେଇଛନ୍ତି ।

Published: Friday, February 19, 2021, 19:14 [IST]

ଭୁବନେଶ୍ୱର : ଶୁକ୍ରବାର ଥିଲା ରାଜ୍ୟ ବଜେଟ୍ ଅଧ୍ବେଶନର ଦ୍ୱିତୀୟ କାର୍ଯ୍ୟ ଦିବସ । ଗୃହ କାର୍ଯ୍ୟ ଆରମ୍ଭରୁ ବିରୋଧୀ ଦଳ ଚାଷୀ ଅସନ୍ତୋଷ ଓ ଧାନକିଣା ଅବ୍ୟବସ୍ଥା ନେଇ ହଟ୍ଟଗୋଳ କରିଥିଲେ । ଏଥିଲାଗି ବାଚସ୍ପତିଙ୍କୁ ଆଜି ଦୁଇ ଥର ଗୃହକୁ ମୁଲତବୀ ଘୋଷଣା କରିବାକୁ ପଡ଼ିଥିଲା ।

ଏହା ପରେ ଗୃହ ପରିଚାଳନା ନେଇ ବାଚସ୍ପତି ସର୍ବଦଳୀୟ ବୈଠକ ଡ଼ାକି ଆଲୋଚନା କରିଥିଲେ । ବୈଠକ ପରେ ବାଚସ୍ପତି ରୁଲିଂ ଦେଇ ଆସନ୍ତା କାଲି ଧାନ କିଣା ସମ୍ପର୍କରେ ବିଭାଗୀୟ ମନ୍ତ୍ରୀ ବିବୃତ୍ତି ରଖିବା ନେଇ ନିର୍ଦ୍ଦେଶ ଦେଇଛନ୍ତି । ଏଥିସହିତ 7ଦିନ ପରେ ଧାନକିଣାରେ ଅଗ୍ରଗତି ନେଇ ପୁଣି ଥରେ ଗୃହକୁ ଅବଗତ କରାଇବେ ବୋଲି ବାଚସ୍ପତି ନିର୍ଦ୍ଦେଶ ଦେଇଛନ୍ତି ।

ଆଜି ଗୃହରେ ପ୍ରଶ୍ନକାଳ ଆରମ୍ଭରୁ ଚାଷୀ ଓ ଧାନମଣ୍ଡି ପ୍ରସଙ୍ଗ ଉଠାଇ ବିରୋଧୀ କଂଗ୍ରେସ ଓ ବିଜେପି ହଟ୍ଟଗୋଳ କରିଥିଲେ । ଗୃହର ମଧ୍ୟଭାଗକୁ ଆସି ପ୍ଲାକାର୍ଡ ଧରି ନାରାବାଜି ଲଗାଇଥିଲେ । ସେପଟେ ଗୃହରେ ହଟ୍ଟଗୋଳ ନେଇ ପ୍ରତିକ୍ରିୟା ରଖିଛି ବିଜେଡି । ପେଟ୍ରୋଲ ଡିଜେଲ ଦର ବୃଦ୍ଧି ପାଇଛି, କେନ୍ଦ୍ର ସରକାର କମାଉନାହାଁନ୍ତି । ସେଥିପାଇଁ ବିଜେପି ଏଭଳି ହଟ୍ଟଗୋଳ କରୁଥିବା ବିଜେଡି ଅଭିଯୋଗ କରିଛି ।

ବିଜେଡ଼ିକୁ ଜବାବ ଦେଇ ମଣ୍ଡିରେ ଧାନ ପଡ଼ି ରହିଥିବା ବିଜେପି କହିଛି । ଶୀଘ୍ର ଧାନ ଉଠାଇବା ସହ ଚାଷୀଙ୍କ ସମସ୍ୟାର ସମାଧାନ କରିବା ନେଇ ଦାବି କରିଛି ବିଜେପି ।

ଗୃହ ଅଚଳାବସ୍ଥା ନେଇ ବିଜେଡି ବିଧାୟକ ଦେବୀ ମିଶ୍ର କହିଛନ୍ତି, ପ୍ରଶ୍ନକାଳକୁ ବାତିଲ କରିବା ଠିକ୍ ନୁହେଁ । ଏହି ପ୍ରସଙ୍ଗକୁ ବିଧାନସଭାର ଅଲଗା ଫୋରମରେ ଉଠାଇବାର ସୁଯୋଗ ରହିଛି ବୋଲି ସେ ପରାମର୍ଶ ଦେଇଛନ୍ତି । ଓଡ଼ିଶା କୃଷିଜାତ ଓ ପଶୁ ସମ୍ପଦ ବିପଣନ ଅଧ୍ୟାଦେଶ ଅପରାହ୍ନ ଅଧିବେଶନରେ ଉପସ୍ଥାପିତ ହୋଇଛି ।

Published On February 19, 2021