ଓଡ଼ିଶା ପାଇଁ ସତର୍କ ଘଣ୍ଟି... ପଶ୍ଚିମବଙ୍ଗରେ ନିପା ଭାଇରସ ! କଣ ରହିଛି ଏହାର ଲକ୍ଷଣ ?

Updated: Wednesday, September 20, 2023, 22:18 [IST]

କରୋନା ଠାରୁ ମାରାତ୍ମକ ନିପା ଭାଇରସ । ଓଡ଼ିଶାର ପଡ଼ୋଶୀ ରାଜ୍ୟ ପଶ୍ଚିମବଙ୍ଗରେ ଦେଖିବାକୁ ମିଳିଛି ସଂକ୍ରମିତ ବାଦୁଡ଼ି । ଏହା ପରେ ଓଡ଼ିଶା ପାଇଁ ସତର୍କ ଘଣ୍ଟି ହୋଇପାରେ । ଚଳିତ ବର୍ଷ କେରଳରେ ଏହାର ସଂକ୍ରମଣ ଅଧିକ ଦେଖିବାକୁ ମିଳିଛି । କେରଳର କୋଜିକୋଡେରେ ଦୁଇ ଜଣଙ୍କର ମୃତ୍ୟୁ ହୋଇଥିବା ବେଳେ ନିପା ସଂକ୍ରମଣ ମୋଟ୍ 6 କୁ ବୃଦ୍ଧି ପାଇଛି । ଆଇସିଏମଆର୍ ରିପୋର୍ଟ ଅନୁସାରେ କରୋନାର ମୃତ୍ୟୁ ହାର 2 ରୁ 3 ପ୍ରତିଶତ ରହିଥିବା ବେଳେ ନିପାର ମୃତ୍ୟୁ ହାର 40 ରୁ 70 ପ୍ରତିଶତ ରହିଛି ।

ତେବେ କରୋନାଠାରୁ ଏହି ଭାଇରସ୍ ଅଧିକ ଭୟଙ୍କର । 100 ଜଣ ଆକ୍ରାନ୍ତଙ୍କ ମଧ୍ୟରୁ 40-70 ଜଣଙ୍କ ମୃତ୍ୟୁ ହେବାର ଆଶଙ୍କା ରହିଛି । ବିଶ୍ୱ ସ୍ୱାସ୍ଥ୍ୟ ସଂଗଠନ ସୂଚନା ଅନୁସାରେ ଏହି ଜୀବାଣୁର କୌଣସି ଉପଶମ କିମ୍ବା ଟିକା ନାହିଁ, ତେଣୁ ଏହାକୁ ରୋକିବା ପାଇଁ ଏକମାତ୍ର ଉପାୟ ହେଇଛି ସଚେତନ ରହିବା ।

ନିପା ଭାଇରସ ଦେଶରେ ବାଦୁଡିମାନଙ୍କଠାରୁ ମଣିଷକୁ ସଂକ୍ରମିତ ହେଉଛି । ବର୍ତ୍ତମାନ ସୁଦ୍ଧଆ 10 ଟି ରାଜ୍ୟରେ ଏହି ଭାଇରସରଉପସ୍ଥିତି ଚିହ୍ନଟ ହୋଇସାରିଛି । ପରିସଂଖ୍ୟାନ ଅନୁଯାୟୀ, ଭାରତରେ ନିପାର ପ୍ରଥମ ମାମଲା 2001 ରେ ପଶ୍ଚିମବଙ୍ଗରେ ଦେଖିବାକୁ ମିଳିଥିଲା । ସେଠାରେ 2007 ରେ ଦ୍ୱିତୀୟ ଥର ଲୋକେ ଆକ୍ରାନ୍ତ ହୋଇଥିଲେ । କିନ୍ତୁ ଏହା ପରେ, 2018 ରେ ତୃତୀୟ ଥର ପାଇଁ କେରଳରେ ନିପା ମାମଲା ରିପୋର୍ଟ ହୋଇଥିଲା ଯେଉଁଥିରେ 16 ଜଣଙ୍କର ମୃତ୍ୟୁ ହୋଇଥିଲା ।

ସେବେଠାରୁ ନିପା ସଂକ୍ରମଣ ଚାରିଥର କେରଳରେ ବ୍ୟାପିଛି । ଏହା 19 ଜଣଙ୍କ ଜୀବନ ନେଇଛି । ତେବେ କେରଳ ବ୍ୟତୀତ ତାମିଲନାଡୁ, ଗୋଆ, କର୍ନାଟକ, ମହାରାଷ୍ଟ୍ର, ବିହାର, ପଶ୍ଚିମବଙ୍ଗ, ଆସାମ, ମେଘାଳୟ ଏବଂ ପୁଡୁଚେରୀରେ ସଂକ୍ରମିତ ବାଦୁଡି ଦେଖିବାକୁ ମିଳିଛି ।

ନିପା ଭାଇରସ୍ ପଶୁମାନଙ୍କଠାରୁ ମଣିଷକୁ ବ୍ୟାପିଥାଏ । ଏହା ଏକ ଜୁନୋଟିକ୍ ଭାଇରସ୍ ଯାହା ମଣିଷଠାରୁ ମଣିଷକୁ ବ୍ୟାପିପାରେ । ବାଦୁଡିକୁ ନିପା ଭାଇରସର କାରଣ ବୋଲି କୁହାଯାଏ । ତେବେ ଏହି ରୋଗ ମାଲେସିଆର ଏକ ଗାଁ ନାମରେ ନାମିତ ହୋଇଥିଲା । ଏହାର ପ୍ରଥମ ମାମଲା ଏଠାରେ ମିଳିଥିଲା ।

ନିପା ଭାଇରସ୍ କ'ଣ :

ନିପା ଭାଇରସ୍ ହେଉଛି ଏକ ଜୁନୋଟିକ୍ ରୋଗ, ଯାହା ପଶୁମାନଙ୍କଠାରୁ ମଣିଷ ପର୍ଯ୍ୟନ୍ତ ବ୍ୟାପିଥାଏ । ଏହା ବିଶେଷ ଭାବରେ ବ୍ୟାଟ୍ସ ଅର୍ଥାତ୍ ବାଦୁଡ଼ି ମାଧ୍ୟମରେ ବ୍ୟାପିଥାଏ । କିନ୍ତୁ ଏହା ବ୍ୟତୀତ ଏହା ଘୁଷୁରି, ଛେଳି, ଘୋଡା, କୁକୁର ଏବଂ ବିଲେଇଙ୍କ ମାଧ୍ୟମରେ ବିସ୍ତାର ହୋଇପାରେ । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏହା ବାୟୁ ମାଧ୍ୟମରେ ବିସ୍ତାର ହୁଏ ନାହିଁ କିନ୍ତୁ କୌଣସି ବସ୍ତୁ କିମ୍ବା ଇନ୍ଧନଯୁକ୍ତ ବୁନ୍ଦା ମାଧ୍ୟମରେ ବିସ୍ତାର ହୋଇପାରେ ।

କିପରି ବିସ୍ତାର ହୁଏ ନିପା ଭାଇରସ୍ ?

ସଂକ୍ରମିତ ଫଳ ଖାଇବା କାରଣରୁ ନିପା ଭାଇରସ୍ ପଶୁମାନଙ୍କଠାରୁ ମଣିଷକୁ ବ୍ୟାପିଥାଏ । ଯଦି କୌଣସି ପ୍ରାଣୀଙ୍କର ଏହି ରୋଗ ଅଛି ଏବଂ ସେ କୌଣସି ଫଳ ଖାଇଛନ୍ତି, ସେବେ ସେହି ସଂକ୍ରମିତ ଫଳ ଖାଇବା ଦ୍ୱାରା ରୋଗ ମଣିଷକୁ ବ୍ୟାପିଥାଏ । ଏହା ମଣିଷଠାରେ ଦ୍ରୁତ ଗତିରେ ବ୍ୟାପିଥିବା ରୋଗ । ନିପା ଭାଇରସର ସଂକ୍ରମଣ ଜଣେ ବ୍ୟକ୍ତିଙ୍କଠାରୁ ଅନ୍ୟ ଜଣକୁ ସହଜରେ ବ୍ୟାପିପାରେ ।

କଣ ରହିଛି ଏହାର ଲକ୍ଷଣ :

ନିପା ଭାଇରସ ସଂକ୍ରମଣ ପରେ ମସ୍ତିଷ୍କରେ ଫୁଲା ଏବଂ ଏନସେଫାଲାଇଟିସ୍ ଭଳି ବିପଜ୍ଜନକ ରୋଗ ମଧ୍ୟ ହୋଇପାରେ । ଏହାର ଲକ୍ଷଣ ମଧ୍ୟରେ ଜ୍ୱର, ମୁଣ୍ଡବିନ୍ଧା, କାଶ, ଶ୍ୱାସ ନେବାରେ ଅସୁବିଧା ହୋଇପାରେ । ଏହି ସମୟରେ, ଭୟଙ୍କର ବାନ୍ତି ମଧ୍ୟ ହୋଇପାରେ । ଏହାର ଗମ୍ଭୀର ଲକ୍ଷଣ ମଧ୍ୟରେ ପେଟ ଯନ୍ତ୍ରଣା, ବାତ ମାରିବା ଏବଂ କୋମା ସାମିଲ ।

କିପରି କରିବେ ନିରାକରଣ ?

'ବିଶ୍ୱ ସ୍ୱାସ୍ଥ୍ୟ ସଂଗଠନ' ଅନୁଯାୟୀ, ନିପା ଭାଇରସ ପାଇଁ ବଜାରରେ ବର୍ତ୍ତମାନ କୌଣସି ମେଡିସିନ୍ କିମ୍ବା ଟିକା ଉପଲବ୍ଧ ନାହିଁ । ଯଦି ଆପଣ ନିପା ଭାଇରସରୁ ମୁକ୍ତି ଚାହୁଁଛନ୍ତି, ଏହାର ପ୍ରାରମ୍ଭିକ ଲକ୍ଷଣ ଦେଖାଯିବା ମାତ୍ରେ ସମୟ ନଷ୍ଟ ନକରି ତୁରନ୍ତ ଡାକ୍ତରଙ୍କ ସହିତ ପରାମର୍ଶ କରନ୍ତୁ ।