ଏ କି ବିଚିତ୍ର ବଜାର ! ରାତି ସାରା ଖୋଲେ ପରିବା ପସରା, ସକାଳୁ ଖାଁ ଖାଁ

ଦୂର ଦୂରାନ୍ତରୁ ଆସନ୍ତି ବେପାରୀ ଓ ଚାଷୀ । ଖୋଲିଦିଅନ୍ତି ପରିବା ପସରା । ମୂଲଚାଲ ଚାଲେ... କିଣାବିକା ବି ଚାଲେ... । ଏମିତି ରହିଥାଏ ପରିବା ହାଟର ଦୃଶ୍ୟ । ଆପଣ ଭାବୁଥିବେ ସବୁ ପରିବା ହାଟରେ ତ ଏହା ଏକ ସାଧାରଣ କଥା, ତେବେ ଏହାକୁ ଆଲୋଚନା କରିବା ଭଳି କଣ ଅଛି ? ହଁ ଆଜ୍ଞା ! ଏ ପରିବା ହାଟ ନିଆରା । ଯାହା ବିଷୟରେ ଜାଣିଲେ ଆପଣ ବି କହିବେ ଏ କି ବିଚିତ୍ର ହାଟ !

ଏଠି ରାତି ସାରା ଖୋଲେ ପରିବା ହାଟ । ଜମେ ଗ୍ରାହକଙ୍କ ଭିଡ଼ । ରାତିର ଘନ ଅନ୍ଧାରରେ ଚାଲେ ପରିବା ଦର ମୂଲଚାଲ । ସତେଜ ପରିବା ଟିକେ ପାଇବା ପାଇଁ କାହିଁ କେତେ ଦୂରରୁ ଆସନ୍ତି ଗରାଖ । ଏମିତି ଏକ ହାଟ ବସେ ବଲାଙ୍ଗୀର ଜିଲ୍ଲାର ଚନ୍ଦନବାଟି ଗାଁ ରେ ।

ସନ୍ଧ୍ୟା ଗଡ଼ି ରାତି ହେଲେ ଏଠି ଭିଡ଼ ଜମାନ୍ତି ପରିବା ବେପାରୀ । ଜଣ ଜଣ କରି ପରିବା ବେପାରୀ ସାଇକେଲ, ଗାଡ଼ିରେ ବୋହିଆଣନ୍ତି ସତେଜ ପରିବା । ରାତି ସାରା ପସରା ଖୋଲି ବସନ୍ତି । ଖାଲି ବେପାରୀ ନୁହଁ, ଗ୍ରାହକଙ୍କ ଭିଡ଼ ଦେଖିଲେ ଆପଣ ବି ଆଶ୍ଚର୍ଯ୍ୟ ହେବେ । ଦିନର କର୍ମବ୍ୟସ୍ତ ଜୀବନ ପରେ ରାତିରେ ବିଶ୍ରାମ କରିବା ସମୟରେ ପରିବା କିଣିବାକୁ କାହିଁ କେତେ ଦୂରରୁ ଆସନ୍ତି ଲୋକ । ସକାଳୁ ସକାଳୁ ବଜାର ପୂରା ଖାଲି ।

ସବୁଠି ଦିନରେ ପରିବା ବଜାର ବସୁଥିବାବେଳେ ଚନ୍ଦନଭାଟିର ଏହି ପରିବା ହାଟ ରାତିରେ ବସେ । ପ୍ରତିଦିନ ପ୍ରାୟ 2 ହଜାର ଲୋକ ଏହି ପରିବା ହାଟ ଉପରେ ନିର୍ଭର କରନ୍ତି । ଆଖପାଖ 25ଟି ଗାଁରୁ ଚାଷୀ ନିଜ ଜମିରୁ ପରିବା ଆଣି ସିଧାସଳଖ ବଜାରରେ ବିକ୍ରି କରନ୍ତି । ଆଉ ତଟକା ପରିବା କିଣିବାକୁ ଚାହିଁଥାନ୍ତି ଗ୍ରାହକ । ବିଶେଷ କରି ଦେଶୀ ପୋଟଳ, ଜହ୍ନି, ବାଇଗଣ, କୁନ୍ଦୁରି, କୋବି ଓ ଟମାଟୋର ଏହି ବଜାରରେ ଚାହିଦା ଅଧିକ । ସ୍ଥାନୀୟ ଚାଷୀ ସିଧାସଳଖ ନିଜ ବାଡି ପରିବା ବିକ୍ରି କରୁଥିବାରୁ ଦର ବି ସାଧାରଣ ବଜାରଠାରୁ ଟିକିଏ କମ ରହିଥାଏ, ଯାହାକି ମହଙ୍ଗା ବଜାରରେ ଗ୍ରାହକର ପକେଟ୍ କୁ ସୁହାଇଥାଏ ।

ବଲାଙ୍ଗୀର ସହର ଠାରୁ 10 କିଲୋମିଟର ଦୁରରେ ଚନ୍ଦନଭାଟି । ଗାଁର ମୂଖ୍ୟରାସ୍ତା କଡରେ ନିତିଦିନ ଏଭଳି ପନିପରିବା ହାଟ ବସେ । ନିଜେ ଚାଷୀ ପରିବା ଆଣି କରିଥାନ୍ତି ବିକ୍ରି । ଦୀର୍ଘ 20 ବର୍ଷ ଧରି ଏହି ବଜାର ଏଠାରେ ରାତି ସାରା ବସେ । ରାତି 2 ଟା ରୁ ଆରମ୍ଭ ହୋଇ ଭୋର 4 ଟା ପର୍ଯ୍ୟନ୍ତ ଚାଲିଥାଏ କିଣାବିକା । ସରହରର ବ୍ୟବସାୟୀ ଠୁ ଗାଁର ଓ ଅନ୍ୟ ଜିଳ୍ଲାରୁ ବ୍ୟବସାୟୀ ଆସି ନେଇଥାନ୍ତି ଏଠାରୁ ପନିପରିବା । ତେବେ ସିଧାସଳଖ ନିଜ ଉପାର୍ଜିତ ପନିପରିବା କୁ ବିକ୍ରି କରିବେଶ ଦୁଇ ପଇସା ଲାଭ ପାଇଥାନ୍ତି ସ୍ଥାନୀୟ ଚାଷୀ ।

English summary

Night Vegetable market At ChandanBhati Of Bolangir