ବସ୍ ଭଡ଼ା ନେବା କହି 15 ଶହ ଦେଲେ ଆଡଭାନ୍ସ, ନିଶା ଦେଇ ଲୁଟିନେଲେ 90 ହଜାର

Updated: Wednesday, March 6, 2024, 11:29 [IST]

ଢେଙ୍କାନାଳ: ବସ୍ ଭଡ଼ା ନେବେ ବୋଲି କହି 15 ଶହ ଟଙ୍କା ଦେଲେ ଆଡ଼ଭାନ୍ସ । ତା ପରେ ନିଶା ଦେଇ ଲୁଟିନେଲେ 90 ହଜାର ଟଙ୍କା । ଏଭଳି ଏକ ଅଭିଯୋଗ ଆସିଛି ଢେଙ୍କାନାଳ ଜିଲ୍ଲା ଭୁବନରେ । ପେଟ୍ରୋଲ ପମ୍ପ ନିକଟରେ ନିଶା ଦେଇ ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି ।

ଅଭିଯୋଗ ଅନୁସାରେ, ଦାସ୍ ଆଣ୍ଡ୍ ଦାସ୍ ନାମକ ବସଟି ଯାଜପୁରରୁ ଭୁବନ ଯାଉଥିଲା । ଯାତ୍ରୀମାନଙ୍କୁ ଭୁବନରେ ଓହ୍ଲାଇବା ପରେ, ସେଥିରେ 4 ରୁ 5 ଜଣ ଦୁର୍ବୃତ୍ତ ଚଢ଼ିଥିଲେ । 30 ଜଣ ଲେବର୍ ଯାଜପୁର ଯିବେ କହି 15 ଶହ ଟଙ୍କା ଆଡଭାନ୍ସ ଦେଇଥିଲେ । ପରେ ସିଗାରେଟ୍ ପିଆଇ ନିଶା ଦ୍ରବ୍ୟ ମିଶା କୋଲଡ୍ରିଙ୍କସ ପିଆଇ ଥିଲେ । ବସ୍ ଡ୍ରାଇଭର, କଣ୍ଡକ୍ଟର ଓ ହେଲପର ଅଚେତ ହେବା ପରେ 90 ହଜାର ଟଙ୍କା ଲୁଟିନେଇଛନ୍ତି ଦୁବୃର୍ତ୍ତ ।

ଭୁବନର ଜଣେ ବ୍ୟବସାୟୀ ମୋବିଲ କିଣା ବାବଦକୁ ବସ୍ କର୍ମଚାରୀଙ୍କ ହାତରେ 90 ହଜାର ଟଙ୍କା ଯାଜପୁରର ଜଣେ ଡିଲରଙ୍କ ପାଖକୁ ପଠାଇଥିଲେ । ବସ୍‌ର ସମସ୍ତ କର୍ମଚାରୀ ଅଚେତ ହୋଇଯିବା ଦେଖି ଦୁର୍ବୃତ୍ତମାନେ ସେହି ଟଙ୍କାକୁ ନେଇ ଚମ୍ପଟ ମାରିଛନ୍ତି ।

ସ୍ଥାନୀୟ ଲୋକେ ଡ୍ରାଇଭର, ହେଲପର ଓ କଣ୍ଡକ୍ଟରଙ୍କୁ ଗୁରୁତର ଅବସ୍ଥାରେ ଭୁବନ ମେଡିକାଲରେ ଭର୍ତ୍ତି କରିଥିଲେ । ଏବେ ସେମାନଙ୍କ ସ୍ୱାସ୍ଥ୍ୟବସ୍ଥା ଭଲ ଥିବା ସୂଚନା ମିଳିଛି । ସେପଟେ ଏହି ଘଟଣାକୁ ନେଇ ବସ୍ ମାଲିକ ଭୁବନ ଥାନାରେ ଅଭିଯୋଗ କରିବା ପରେ ପୋଲିସ୍ ତଦନ୍ତ କରୁଛି ।