ଅଧା ବାଟରେ ସରିଗଲା ପେଟ୍ରୋଲ, ନାବାଳକକୁ ବନ୍ଧା ପକାଇ ଅପହରଣକାରୀ ଛୁ'

ଦେବଗଡ଼: ଆପଣ କୁଆଡ଼େ ଯାଉଥିବା ବେଳେ ଅଧା ରାସ୍ତାରେ ଗାଡ଼ିରୁ ପେଟ୍ରୋଲ ସରଗଲେ ଆପଣ ବିରକ୍ତ ହେବା ସ୍ୱଭାବିକ । ଅଧା ବାଟରେ ଏମିତି ହେବା ଆପଣଙ୍କୁ ହଇରାଣ ହେବା ଭଳି ଲାଗିବ ନିଶ୍ଚୟ । କିନ୍ତୁ ଦେବଗଡ଼ ଜିଲ୍ଲାରୁ ଏମିତି ଏକ ଘଟଣା ବିଷୟରେ ଖବର ଆସିଛି, ଯେଉଁଥିରେ ଅଧା ବାଟରେ ଗାଡିରୁ ତେଲ ସରିଯିବାରୁ ଜଣେ ନାବାଳକ ବର୍ତ୍ତିଯାଇଛି । ଅପହରଣକାରୀ ନାବାଳକକୁ ଦୋକାନରେ ବନ୍ଧା ପକାଇ ଛୁ ହୋଇଯାଇଛି ।

ଅଧାବାଟରେ ଗାଡ଼ି ଧୋକା ଦେବାରୁ ଅପହରଣ ଉଦ୍ୟମ ପଣ୍ଡ ହୋଇଯାଇଛି । ବାଟରେ ଗାଡ଼ିରୁ ତେଲ ସରିଯିବାରୁ ଏକ ଦୋକାନରେ ତେଲ ପକାଇଥିଲା ଅପହରଣକାରୀ । ପରେ ପାଖରେ ଟଙ୍କା ନଥିବାରୁ ନାବାଳକଙ୍କୁ ଛାଡ଼ି ଟଙ୍କା ଆଣିବାକୁ ଯାଉଛି ବୋଲି ଯାଇଥିଲା । କିନ୍ତୁ ଆଉ ଫେରିନଥିଲା । ପରେ ପୋଲିସ ନାବାଳକକୁ ଉଦ୍ଧାର କରି ପରିବାର ଲୋକଙ୍କୁ ହସ୍ତାନ୍ତର କରିଛି ।

ସୂଚନା ଅନୁସାରେ, ନାବାଳକଙ୍କ ମା' ଦେବଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଗତ 5 ଦିନ ହେଲା ଚିକିତ୍ସିତ ହେଉଛନ୍ତି । ନାବାଳକ ଜଣକ ମା' ପାଖରେ ରହି ଦେଖାଶୁଣା କରୁଥିଲେ । ଗତକାଲି ମଧ୍ୟାହ୍ନ ସମୟରେ ଜଣେ ଅଚିହ୍ନା ବ୍ୟକ୍ତି ଉକ୍ତ ନାବାଳକଙ୍କୁ ତାଙ୍କ ମାମୁଁର ପରିଚୟ ଦେବା ସହ ବିଭିନ୍ନ ପ୍ରଲୋଭନ ଦେଖାଇ ଡାକି ନେଇଥିଲେ । ନାବାଳକଙ୍କୁ ଘରକୁ ନେଇ ଯିବାକୁ ବ୍ୟକ୍ତି ଜଣଙ୍କ କହିଥିଲେ । ନାବାଳକଙ୍କ ଜଣଙ୍କ ତାଙ୍କ କଥାରେ ରାଜି ହୋଇଯାଇଥିଲେ । ହେଲେ ସେ ବ୍ୟକ୍ତି ଜଣଙ୍କ ନାବାଳକଙ୍କୁ ତାଙ୍କ ଘରକୁ ନନେଇ ଅନ୍ୟତ୍ର ନେଇ ଯାଉଥିଲେ ।

କୁଣ୍ଢେଇଗୋଳା ଥାନା ଅନ୍ତର୍ଗତ କଂଟାବାହାଳ ଗାଁ ନିକଟରେ ଅପହରଣକାରୀର ଗାଡ଼ିରୁ ପେଟ୍ରୋଲ ସରି ଯାଇଥିଲା । ନିକଟରେ ଏକ ଦୋକାନରେ ଅପହରଣକାରୀ ଜଣଙ୍କ ପେଟ୍ରୋଲ ପକାଇଥିଲେ । ତେଲ ପକାଇ ସାରିବା ପରେ ଦୋକାନୀ ଜଣଙ୍କ ତାଙ୍କୁ ପଇସା ମାଗିଥିଲେ । ହେଲେ ଅପହରଣକାରୀ ପାଖରେ ଟଙ୍କା ନଥିବାରୁ ସେ ବିଭିନ୍ନ ବାହାନା କରିଥିଲା । ଶେଷରେ ଅପହରଣ କରି ନେଉ ଯାଉଥିବା ନାବାଳକଙ୍କୁ ଦୋକାନରେ ଛାଡ଼ି ପଇସା ଆଣିବାକୁ ଘରକୁ ଯାଉଛି ବୋଲି ଅପହରଣକାରୀ କହିଥିଲା ।

ବହୁ ସମୟ ଧରି ଅପହରଣକାରୀ ନ ଆସିବାରୁ ଦୋକାନୀ ଜଣକ ଗ୍ରାମବାସୀଙ୍କୁ ଡାକିବା ସହ ପୋଲିସ ଓ ଶିଶୁ ସୁରକ୍ଷା ବିଭାଗକୁ ସୂଚନା ଦେଇଥିଲେ । ଶିଶୁ ସୁରକ୍ଷା ଅଧିକାରୀ ଓ ପୋଲିସ ପହଞ୍ଚି ନାବାଳକଙ୍କୁ ପଚରାଉଚରା କରିଥିଲେ । ପରେ ନାବାଳକଙ୍କୁ ପରିବାର ଲୋକଙ୍କୁ ହସ୍ତାନ୍ତର କରିଥିଲେ । ଏନେଇ ନାବାଳକର ମା' ଥାନାରେ ଅଭିଯୋଗ କରିଛନ୍ତି ।

English summary

kidnapper flew away tie up minor boy in deogarh district