ମଦ ସମ୍ରାଜ୍ୟରେ ମେଗା ଆଇଟି ରେଡ୍: 350 କୋଟି ଜବତ ପରେ ମାଟି ତଳେ ଚାଲିଛି ସୁନା ଖୋଜା

ରାଞ୍ଚି: ମଦ ବ୍ୟବସାୟର କଳା ସମ୍ରାଜ୍ୟର ଆୟକର ବିଭାଗର ଚଢାଉ ପରେ ରାଜ୍ୟସଭା ସାଂସଦ ଧୀରଜ ସାହୁଙ୍କ ଅଡ଼ୁଆ ବଢ଼ିବାରେ ଲାଗିଛି । ଓଡ଼ିଶାର ବିଭିନ୍ନ ସ୍ଥାନରେ ଚଢାଉ ପରେ 350 କୋଟିରୁ ଅଧିକ ଟଙ୍କା ଓ 20 କିଲୋଗ୍ରାମ ସୁନା ଓ ହୀରା ମିଳିଥିଲା । ଏହାର ଗୋଟିଏ ଦିନ ପରେ ଧୀରଜଙ୍କ ଝାଡ଼ଖଣ୍ଡ ଲୋହରଡ଼ଗା ଓ ରାଞ୍ଚିସ୍ଥିତ ଘରେ ପହଞ୍ଚିଛି ଆୟକର ବିଭାଗ । 12 ଜଣିଆ ଟିମ୍‌ ଖୋଳତାଡ଼ ଜାରି ରଖିଛନ୍ତି । ମାଟି ତଳେ ଟଙ୍କା ଓ ସୁନାଗହଣା ପୋତା ଯାଇଥିବା ସନ୍ଦେହରେ ଆୟକର ବିଭାଗ ଜିଓ ସର୍ଭେଲାନ୍ସ ସିଷ୍ଟମ ଦ୍ୱାରା ଅନୁସନ୍ଧାନ ଚଳାଇଛି ।

ମାଟି ତଳେ କିମ୍ବା କାନ୍ଥ ଭିତରେ ଥିବା ସୁନାକୁ ଠାବ କରିବା ପାଇଁ ଏହି ଯନ୍ତ୍ରକୁ ବ୍ୟବହାର କରାଯାଇଛି । ଏହି ଯନ୍ତ୍ର ପ୍ରାୟ 10-15ଫୁଟ୍‌ ଗଭୀରରେ ଥିବା ସୁନା ଓ ଅନ୍ୟାନ୍ୟ ଧାତବ ପଦାର୍ଥ ସନ୍ଧାନ କରିବାକୁ ସମର୍ଥ । ଓଡ଼ିଶାରେ ଧୀରଜଙ୍କ ସମ୍ପର୍କୀୟଙ୍କ ସୂଚନା ଆଧାରରେ ଗୁପ୍ତଧନ ସନ୍ଧାନରେ ଆୟକର ବିଭାଗ ଖୋଳତାଡ଼ କରୁଛି ।

ପରିବାରର 3 ଜଣ ସଦସ୍ୟ ଓ ସିଆଇଏସ୍‌ଏଫ୍‌ ଯବାନଙ୍କୁ ନେଇ ଆୟକର ବିଭାଗ ଧୀରଜଙ୍କ ଘରେ ତଦନ୍ତ ଚଳାଇଛି । ବିଭିନ୍ନ ବିଭାଗକୁ ନେଇ ଏକ ବଡ଼ କମିଟି ଗଠନ କରାଯାଇ ବିଭିନ୍ନ ଦିଗକୁ ନେଇ ତଦନ୍ତ କରାଯିବ ବୋଲି ସୂଚନା ମିଳିଛି ।

ଅନ୍ୟପକ୍ଷରେ ରାଜ୍ୟ ଅବକାରୀ ବିଭାଗ ଧୀରଜ ସାହୁଙ୍କ ବୌଦ୍ଧ ଡିଷ୍ଟିଲାରୀ ଲିମିଟେଡ୍‌ର ଲାଇସେନ୍ସ ବିଷୟରେ ଖୋଳତାଡ଼ ଆରମ୍ଭ ହୋଇଛି । ଲାଇସେନ୍ସ ଓ ଚୁକ୍ତିନାମା ଠିକ ଭାବେ ପାଳନ ହୋଇଛି କି ନାହିଁ, ତାହାର ପୁଙ୍ଖାନୁପୁଙ୍ଖ ଯାଞ୍ଚ କରିବ ବୋଲି ସୂଚନା ମିଳିଛି । ଓଡ଼ିଶା ଅବକାରୀ ଆଇନ ଅନୁଯାୟୀ, ବୌଦ୍ଧ ଡିଷ୍ଟିଲାରୀ ଲିମିଟେଡ୍‌ କାରବାର କରିଛି କି ନାହିଁ ? ମଦ ବିକ୍ରି ଅନୁସାରେ ଶୁଳ୍କ ପଇଠ କରିଛି କି ? ଲାଇସେନ୍ସ ଓ ଚୁକ୍ତିନାମା ଠିକ୍‌ ଭାବେ ପାଳନ ହୋଇଛି କି ନାହିଁ; ବିଭିନ୍ନ ଦିଗ ବିଷୟରେ ବିସ୍ତୃତ ଭାବେ ଯାଞ୍ଚ କରିବ ଅବକାରୀ ବିଭାଗ । ଯଦି କିଛି ତ୍ରୁଟି ନଜରକୁ ଆସେ, କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ବିଭାଗ ପକ୍ଷରୁ କୁହାଯାଇଛି । ଆବଶ୍ୟକ ପଡ଼ିଲେ ବୌଦ୍ଧ ଡିଷ୍ଟଲାରୀର ଲାଇସେନ୍ସ ମଧ୍ୟ ବାତିଲ୍‌ ହୋଇପାରେ ବୋଲି କୁହାଯାଉଛି ।

ସେହିପରି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଏହି ମାମଲାର ଖୋଳତାଡ଼ ଆରମ୍ଭ କରିଛି । ଆୟକର ବିଭାଗର ଅଧିକାରୀଙ୍କ ସହ ଇଡିର ବରିଷ୍ଠ ଅଧିକାରୀମାନେ ଆଲୋଚନା କରିଛନ୍ତି । ଆୟକର ଭବନରେ ଇଡିର ବରିଷ୍ଠ ଅଧିକାରୀମାନେ ପହଞ୍ଚି ଆଲୋଚନା କରିବା ସହ କିଛି କାଗଜପତ୍ର ସାଥୀରେ ନେଇଛନ୍ତି ।

English summary

IT Raid on MP Dhiraj Sahu's Residence in search of Gold at ranchi