ସମୟ ଆସିଲେ ଖୋଲାଯିବ 4 ଦ୍ୱାର, ସରକାର ଜାଣିଶୁଣି ଲୋକଙ୍କୁ ହଇରାଣ କରୁନାହାଁନ୍ତି

Published: Saturday, July 22, 2023, 19:09 [IST]

ଭୁବନେଶ୍ୱର: ଶ୍ରୀମନ୍ଦିରର 4 ଦ୍ଵାରା ଖୋଲା ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ଶ୍ରୀମତୀ ମଲ୍ଲିକ । ଆବଶ୍ୟକ ହେଲେ ନିଶ୍ଚିତ ଭାବରେ 4 ଦ୍ୱାର ଖୋଲାଯିବ । ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାମ ଚାଲିଥିବାରୁ ଶ୍ରୀମନ୍ଦିର 4 ଟି ଯାକ ଦ୍ଵାର ଖୋଲାଯାଇପାରୁ ନାହିଁ । ଭକ୍ତମାନେ ଯଦି 4 ଦ୍ଵାର ଦେଇ ଯିବେ ସେଥିରେ କେହି ଆହତ ହେବାର ସମ୍ଭାବନା ରହିଛି । ତେଣୁ ଉଚିତ ସମୟ ଆସିଲେ ନିଶ୍ଚୟ 4 ଦ୍ଵାରା ଖୋଲାଯିବ । ସରକାର ଜାଣି ଶୁଣି ଲୋକଙ୍କୁ ହଇରାଣ କରୁନାହାନ୍ତି ।

ସୂଚନାଯୋଗ୍ୟ, ଏହା ପୂର୍ବରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଥିଲେ ଯେ ମହାପ୍ରଭୁଙ୍କ ସହ ଭକ୍ତମାନଙ୍କ ପ୍ରତ୍ୟକ୍ଷ ଭାବାବେଗ ଯୋଡ଼ି ହୋଇରହିଛି । ହଜାର ହଜାର ବର୍ଷ ପୂର୍ବରୁ ମହାପ୍ରଭୁଙ୍କୁ ଶୃଙ୍ଖଳିତ ଭାବରେ ଦର୍ଶନ କରିବା ପାଇଁ ଶ୍ରୀମନ୍ଦିରରେ ଚାରି ଦ୍ୱାର ଦର୍ଶନର ବ୍ୟବସ୍ଥା କରାଯାଇଥିଲା । ଶ୍ରୀମନ୍ଦିର ପ୍ରଶାସନ ଏହି ପ୍ରସଙ୍ଗରେ ସମ୍ବେଦନଶୀଳ ହୋଇ ସମସ୍ତଙ୍କ ସହ ଆଲୋଚନା କରି ଶ୍ରୀମନ୍ଦିରର ଚାରି ଦ୍ୱାର ଖୋଲିବା ପାଇଁ ପଦକ୍ଷେପ ନିଅନ୍ତୁ । ଏପରିକି ଗତକାଲି ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ମଧ୍ୟ ଗଜପତି ମହାରାଜଙ୍କୁ ଚିଠି ଲେଖି 4 ଦ୍ୱାର ଖୋଲିବା ପ୍ରସଙ୍ଗରେ ଉଲ୍ଲେଖ କରିଥିଲେ ।

ଅପରପକ୍ଷରେ 5-ଟି ସଚିବ ସମ୍ବିଧାନିକ ନିୟମ ଭଙ୍ଗ କରୁଥିବା ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଅଭିଯୋଗ ଉପରେ ମଧ୍ୟ ଜବବା ଦେଇଛନ୍ତି ରାଜସ୍ୱ ମନ୍ତ୍ରୀ ପ୍ରମିଳା । ଶ୍ରୀମତୀ ମଲ୍ଲିକ କହିଛନ୍ତି, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ 5-ଟି ସଚିବ କାମ କରୁଛନ୍ତି । ମୁଖ୍ୟମନ୍ତ୍ରୀଙ୍କ କାର୍ଯ୍ୟଧାରାକୁ କାର୍ଯ୍ୟକାରୀ କରି ଆସୁଛନ୍ତି । ସେ କୌଣସି ଦଳୀୟ କାର୍ଯ୍ୟକ୍ରମରେ ଯୋଗ ଦେଉନାହାଁନ୍ତି । କୌଣସି ଦଳୀୟ ପତାକା ଧରୁ ନାହାଁନ୍ତି । ତେଣୁ ସମ୍ବିଧାନ ଭାଙ୍ଗିଲେ କେଉଁଠି ?

Published On July 22, 2023