ବରପଦା ଇଞ୍ଜିନିୟରିଂ କଲେଜର ଜମି ଦୁର୍ନୀତି ମାମଲା, ପ୍ରୟାସକାନ୍ତିଙ୍କୁ 18 ଘଣ୍ଟା ମାରାଥନ ଜେରା

Published: Wednesday, March 6, 2024, 7:40 [IST]

ଭୁବନେଶ୍ୱର: ବରପଦା ଇଞ୍ଜିନିୟରିଂ କଲେଜର ଜମି ଦୁର୍ନୀତି ମାମଲା ବଢ଼ିବାରେ ଲାଗିଛି ଭଣ୍ଡାରିପୋଖରୀ ବିଧାୟକ ପ୍ରଫୁଲ୍ଲ ସାମଲ ଓ ପୁଅ ପ୍ରୟାସକାନ୍ତିଙ୍କ ଅଡ଼ୁଆ । ପ୍ରୟାସକାନ୍ତିଙ୍କୁ ଗତକାଲି 18 ଘଣ୍ଟା ଜେରା କରିଛି ଇଡି । ରାତି ସାଢେ 4 ଟାରେ ସେ ଇଡି କାର୍ଯ୍ୟାଳୟରୁ ବାହାରିଥିଲେ ।

ବରପଦା ଇଞ୍ଜିନିୟରିଂ କଲେଜର ଜମି ଦୁର୍ନୀତି ମାମଲା ରେ ପ୍ରୟାସକାନ୍ତି ଗତକାଲି ଦିନ 10 ଟାରେ ଇଡି ଅଫିସରେ ହାଜର ହୋଇଥିଲେ । ଏହା ପରେ ତାଙ୍କୁ ଜେରା କରାଯାଇଥିଲା । ରାତି ସାରା ଇଡିର ତିନୋଟି ଟିମ୍ ଗୁଡ଼ାଇ ତୁଡ଼ାଇ ପ୍ରଶ୍ନ କରିଥିଲେ । ଏହା ସହ ତାଙ୍କ ମୋବାଇଲରୁ ତଥ୍ୟ ଖୋଜୁଛି ଇଡି । ଏପରିକି ଡିଲିଟ୍ ହୋଇଥିବା ତଥ୍ୟ ରିକଭରୀ କରୁଛି ଇଡୁର ସାଇବର ଏକ୍ସପର୍ଟ ଟିମ୍ ।

ଏହା ପୂର୍ବରୁ ଏହି ମାମଲାରେ ବାପା ପ୍ରଫୁଲ୍ଲ ସାମଲଙ୍କୁ ମଧ୍ୟ ଇଡି ଜେରା କରିଥିଲା । ବରପଦା ଇଞ୍ଜିନିୟରିଂ କଲେଜର ଜମି ଦୁର୍ନୀତି ନେଇ ଅଭିଯୋଗ ହୋଇଛି ।
ଏହାପୂର୍ବରୁ ପ୍ରଫୁଲ୍ଲ ସାମଲଙ୍କ ଭଦ୍ରକ ନୂଆବଜାର ସ୍ଥିତ ବାସଭବନରେ ଇଡିର 6 ଜଣିଆ ଟିମ୍ ଚଢ଼ାଉ କରିଥିଲା । ଭଦ୍ରକ ସହରର 6 ଟି ସ୍ଥାନରେ ଓ ଭୁବନେଶ୍ୱରର 4ଟି ସ୍ଥାନରେ ଇଡି ରେଡ୍‌ କରିଥିଲା । ସେଥି ମଧ୍ୟରେ ଭୁବନେଶ୍ୱରର ପଳାସପଲ୍ଲୀରେ ଥିବା ପ୍ରଫୁଲ୍ଲ ସାମଲଙ୍କ ପୁଅ ପ୍ରୟାସକାନ୍ତି ସାମଲଙ୍କ ଘରେ ବି ରେଡ ହୋଇଥିଲା ।
ଚଢ଼ାଉ ବେଳେ ଇଡି ଟିମ୍ ପ୍ରଫୁଲ୍ଲଙ୍କ ପୁଅ ପ୍ରୟାସକାନ୍ତିଙ୍କ ଭୁବନେଶ୍ୱରର ପଳାଶପଲ୍ଲୀ ଘରୁ 10 ଲକ୍ଷ ଟଙ୍କା ସହ ଏକ ଫର୍ଚ୍ୟୁନର କାର୍‌ ଜବତ କରିଥିଲା । ଉକ୍ତ ଗାଡ଼ିଟି ପ୍ରୟାସକାନ୍ତି ଚଲାଉଥିବା ବେଳେ ତାହା ତୃଷ୍ଣା ସ୍କାଏ ସ୍କ୍ରାପର ଲିମିଟେଡ ନାମକ ବିଲଡର ସଂସ୍ଥା ନାଁରେ ଥିବା ସୂଚନା ମିଳିଥିଲା ।
ବରପଦା ଇଞ୍ଜିନିୟରିଂ କଲେଜ ନାଁରେ ଏକ ସୋସାଇଟି ହୋଇଥିବା ବେଳେ ସେଥିରେ ହୋଇଥିବା ଦୁର୍ନୀତିରେ ପ୍ରୟାସକାନ୍ତି ସାମିଲ ଥିବା ଅଭିଯୋଗ ହୋଇଥିଲା । କଲେଜ କର୍ମଚାରୀମାନେ ଦରମା ପାଉ ନ ଥିବା ବେଳେ ଉକ୍ତ ଟଙ୍କାରେ ପ୍ରୟାସକାନ୍ତି ଦାମୀ ଗାଡ଼ି ଚଢ଼ୁଥିବା କର୍ମଚାରୀମାନେ ଅଭିଯୋଗ କରିଥିଲେ । ଏହାପରେ ଇଡି ଏହି ଘଟଣାର ଖୋଳତାଡ଼ ଆରମ୍ଭ କରିଥିଲା ।

Published On March 6, 2024