ଡିଏନ୍ ଗ୍ରୁପ୍ ଆଇଟି ରେଡ୍ : କୋଟିଏ ଟଙ୍କାର ଜାଲ୍ ନୋଟ୍, ତଦନ୍ତ କରିବ ଇଡି

Updated: Friday, July 7, 2023, 12:50 [IST]

ଭୁବନେଶ୍ୱର: ଡିଏନ୍ ଗ୍ରୁପ ଉପରେ ଦ୍ୱିତୀୟ ଦିନ ଧରି ଆଇଟି ରେଡ୍ ଜାରି ରହିଛି । ଆୟକର ବିଭାଗର 7ଟି ଟିମ୍ ଏହି ଚଢାଉ ଜାରି ରଖିଛନ୍ତି । ଏହି ସମୟରେ ପ୍ରାୟ ଏକ କୋଟି ଟଙ୍କାର ଫେକ୍ ନୋଟ୍ ମିଳିଥିବା ସୂଚନା ମିଳିଛି । ଏକ୍ସପର୍ଟମାନେ ଜାଲ୍ ନୋଟ୍ ଚିହ୍ନ କରି ମେସିନରେ ଟଙ୍କା ଗଣୁଛନ୍ତି ।
ଏପରିକି ଏହି ଚଢାଉରେ 100 କୋଟି ଟଙ୍କାର କ୍ୟାସ୍ ରିସିପ୍ଟ ମଧ୍ୟ ଆଇଟି ହାତରେ ଲାଗିଛି । ଏହାକୁ ନେଇ ଅଧିକ ଖୋଲତାଡ଼ କରୁଛନ୍ତି ଅଧିକାରୀ । ଏ ନେଇ ଆୟକର ବିଭାଗ ପକ୍ଷରୁ ସୂଚନା ମିଳିଛି ।

ଅପରପକ୍ଷରେ 30 କୋଟି ଟଙ୍କା ୟୁନିଟ-4 କ୍ୱାର୍ଟରରୁ ଜବତ କରିଛି ଆଇଟି ବିଭାଗ । ଏହା ପରେ ଏହି ମାମଲାର ତଦନ୍ତ କରିବ ଇଡି ।

ଟିକସ ଫାଙ୍କିବା ଅଭିଯୋଗରେ ଗତକାଲି ବ୍ୟବସାୟିକ ପ୍ରତିଷ୍ଠାନ ଡିଏନ୍ ଗ୍ରୁପ ଉପରେ ଚଢାଉ କରିଥିଲା ଆୟକର ବିଭାଗ । ଆୟକର ବିଭାଗର 7 ଟି ଟିମ୍‌ ଡିଏନ୍‌ ଗ୍ରୁପ ସହିତ ଜଡ଼ିତ ବ୍ୟକ୍ତିମାନଙ୍କୁ ପଚରାଉଚରା କରୁଛନ୍ତି । ଡିଏନ୍‌ ଗ୍ରୁପରର ମାଲିକ ଓ ସହଯୋଗୀଙ୍କ ସମେତ ଅନ୍ୟମାନଙ୍କୁ ପଚରାଉଚରା ଜାରି ରହିଛି ।

ସଂସ୍ଥାର ଭୁବନେଶ୍ୱର ନୂଆପଲ୍ଲୀସ୍ଥିତ ମୁଖ୍ୟ କାର୍ଯ୍ୟାଳୟ ସମେତ 23 ଟି ସ୍ଥାନରେ ଚଢ଼ଉ କରାଯାଇଛି । ୟୁନିଟ୍-4 ପୋଷ୍ଟାଲ କଲୋନିରେ ରହୁଥିବା ସଂସ୍ଥାର କର୍ମଚାରୀ ଚନ୍ଦ୍ରଶେଖର ପଣ୍ଡାଙ୍କ ଘରୁ ନଗଦ 30 କୋଟି ଟଙ୍କା ମିଳିଛି । ତିନୋଟି ଟ୍ରଙ୍କ ଓ ଗୋଟିଏ ଆଟାଚିରେ ଥିବା ଟଙ୍କା ଜବତ କରାଯାଇଛି । ଏତେ ପରିମାଣର ଟଙ୍କା ମିଳିବା ପରେ ସାଧାରଣରେ ଆଲୋଡ଼ନ ସୃଷ୍ଟି ହୋଇଥିଲା ।

ଡିଏନ୍ ଗ୍ରୁପ୍ ମାଲିକ ଜଗଦୀଶ ପ୍ରସାଦ ନାୟକଙ୍କୁ ଆୟକର ଅଧିକାରୀମାନେ ନଗଦ ଟଙ୍କା ସମ୍ପର୍କରେ ପଚରାଉଚରା କରିଛନ୍ତି ।