ଆଜି ଲ୍ୟାଣ୍ଡଫଲ କରିବ ବାତ୍ୟା ମିଗଜୋମ୍, ଓଡ଼ିଶାରେ ପ୍ରବଳ ବର୍ଷିବ

Updated: Tuesday, December 5, 2023, 9:52 [IST]

ଭୁବନେଶ୍ୱର: ଆନ୍ଧ୍ର ଉପକୂଳରେ ସମାନ୍ତରାଳ ଭାବେ ଗତି କରୁଛି ବାତ୍ୟା ମିଗଜୋମ୍ । ନେଲୋର ଓ ମଛଲିପଟନମ୍ ମଧ୍ୟରେ ବାପାଟଲା ଉପକୂଳରେ ଭୀଷଣ ବାତ୍ୟା ଭାବରେ ସ୍ଥଳଭାଗ ଛୁଉଁଛି । ଏହା ପୂର୍ବାହ୍ନ ସୁଦ୍ଧା ସ୍ଥଳଭାଗ ଅତିକ୍ରମ କରିବ । ଲ୍ୟାଣ୍ଡଫଲ ସମୟରେ ପବନର ବେଗ 90-100 କିଲୋମିଟର ରହିବ ।

ଏବା ପ୍ରଭାବରେ ଆନ୍ଧ୍ର ଉପକୂଳରେ ପ୍ରବଳ ବର୍ଷା ସହ ପବନ ବୋହୁଛି । ବାତ୍ୟା ମିଗଜୋମ୍ ପ୍ରଭାବରେ ଆନ୍ଧ୍ର ଉପକୂଳର ବିଭିନ୍ନ ସ୍ଥାନରେ ସ୍ବଳ୍ପରୁ ମଧ୍ୟରୁ ଧରଣର ବର୍ଷା ହେଉଛି । ବାତ୍ୟାକୁ ନେଇ ଆନ୍ଧ୍ରପ୍ରଦେଶରେ ହାଇ ଆଲର୍ଟ ଜାରି କରାଯାଇଛି ।

ବାତ୍ୟା ମିଗଜୋମ୍ ର ପ୍ରଭାବ ସିଧାସଳଖ ଓଡ଼ିଶା ଉପରେ ପଡିବ ନାହିଁ । ରାଜ୍ୟରେ ଏହାର ପ୍ରଭାବ ଦୁଇରୁ ତିନି ଦିନ ରହିବ । ଦକ୍ଷିଣ ଓଡ଼ିଶା ଓ ଉପକୂଳ ଓଡ଼ିଶାର କିଛି ଜିଲ୍ଲାରେ ବର୍ଷା ସମ୍ଭାବନା ରହିଛି । ଗଞ୍ଜାମ, ଗଜପତି, କୋରାପୁଟ, ରାୟଗଡ଼ା, ମାଲିକାନଗିରି ଜିଲ୍ଲାରେ ଅତି ପ୍ରବଳ ବର୍ଷା ସମ୍ଭାବନା ରହିଛି । ଏହି 5 ଜିଲ୍ଲା ପାଇଁ ଆଜି ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି । ନବରଙ୍ଗପୁର, କଳାହାଣ୍ଡି, କନ୍ଧମାଳ, ପୁରୀ ଜିଲ୍ଲାରେ ମଧ୍ୟ ବର୍ଷା ଆଶଙ୍କା ରହିଛି । ଦକ୍ଷିଣ ଓ ଉପକୂଳ ଓ୍ଡ଼ିଶାରେ ପ୍ରବଳ ବର୍ଷା ହେବା ନେଇ ପାଣିପାଗ ବିଭାଗ ଆକଳନ କରିଛି । ଏହି ସମୟରେ ପବନର ବେଗ ଘଣ୍ଟା ପ୍ରତି 50 କିଲୋମଟିର ରହିବ ବୋଲି କୁହାଯାଇଛି । ମୁକାବିଲା ପାଇଁ ଓଡ୍ରାଫ ଓ ଅଗ୍ନିଶମ ବାହିନୀଙ୍କୁ ପ୍ରସ୍ତୁତ ରଖାଯାଇଛି । ଚାଷୀଙ୍କୁ ଫସଲ ସୁରକ୍ଷିତ ରଖିବାକୁ କୃଷି ବିଭାଗ ପକ୍ଷରୁ ମାର୍ଗଦଶିକା ଜାରି କରାଯାଇଛି ।

ବାତ୍ୟାର ପ୍ରଭାବ ତାମିଲନାଡୁରେ ଅଧିକ ଦେଖିବାକୁ ମିଳିଛି । ରବିବାରଠାରୁ ଆଜି ପର୍ଯ୍ୟନ୍ତ ଚେନ୍ନାଇ 500 ମିଲିମିଟର ବର୍ଷା ହୋଇଛି । ଯାହା ଗତ 80 ବର୍ଷର ରେକର୍ଡ ଭାଙ୍ଗିଛି । ବର୍ଷାରେ ଏପର୍ଯ୍ୟନ୍ତ 5ଜଣଙ୍କ ମୃତ୍ୟୁ ହୋଇଛି । 204 ଟି ଟ୍ରେନ୍ ଏବଂ 70 ବିମାନ ବାତିଲ କରାଯାଇଛି । ଚେନ୍ନାଇ ଏୟାରପୋର୍ଟର ରନୱେ ବୁଡ଼ି ଯାଇଛି । ଚେନ୍ନାଇ ସହର ଅନେକ ସ୍ଥାନ ପ୍ରବଳ ବର୍ଷାରେ ବୁଡି ଯାଇଛି । ଆନ୍ଧ୍ର ସହ ତାମିଲନାଡୁ ଏବଂ ପୁଡୁଚେରୀରେ NDRF ଟିମ୍ ମୁତୟନ ହୋଇଛନ୍ତି । ଏହାସହ କୋଷ୍ଟଗାର୍ଡ ଏବଂ ନୌସେନାର ଜାହାଜ ଏବଂ ଏୟାରକ୍ରାଫ୍ଟ ସଜାଗ ରହିଛି ।