କରମଣ୍ଡଳ ଦୁର୍ଘଟଣା : ଟିଭିରେ ସାନ ଭାଇକୁ ଦେଖି ଖୋଜିବାକୁ ଧାଇଁ ଆସିଛି ବଡ଼ ଭାଇ

Updated: Wednesday, June 7, 2023, 16:05 [IST]

କଟକ : ବାଲେଶ୍ୱର ଟ୍ରେନ୍ ଦୁର୍ଘଟଣା ପରେ ଅନେକ ମୃତକଙ୍କ ପରିଚୟ ମିଳିପାରିନାହିଁ । ଏପରିକି ଅନ୍ୟ ରାଜ୍ୟର କେତେକ ଯାତ୍ରୀଙ୍କ ମୃତ୍ୟୁ ହୋଇଖିବା ନେଇ ମଧ୍ୟ ତାଙ୍କ ପରିବାର ଲୋକଙ୍କୁ ଜଣା ନାହିଁ । ମୃତଦେହର ପରିଚୟ ମିଳି ପାରୁନଥିବାରୁ ପରିବାର ଲୋକଙ୍କୁ ଖବର ଦେବାରେ ବାଧା ଉପୁଜିଛି ।
ଏହି ସମୟରେ ସାନ ଭାଇର ଫଟୋ ସୋଶାଲ ମିଡ଼ିଆ ଓ ଟିଭିରେ ଦେଖି ଧାଇଁ ଆସିଛନ୍ତି ବଡ଼ ଭାଇ । ଟିଭିରେ ସାନ ଭାଇକୁ ଦେଖିବା ପରେ ଘଟଣା ସ୍ଥଳ ଠାରୁ ଆରମ୍ଭ କରି ବିଭିନ୍ନ ଡାକ୍ତରଖାନାରେ ସାନ ଭାଇକୁ ଖୋଜୁଛନ୍ତି । ସାନଭାଇ ମହମ୍ମଦ ଅଲ୍ଲୀକୁ ଛଅ ଦିନ ହେବ ଖୋଜୁଛନ୍ତି ଦିଲ୍ଲୀ ନିବାସୀ ତଥା ତାଙ୍କ ବଡ଼ ଭାଇ ମହମ୍ମଦ ତନିଫ ।

ଗଣମାଧ୍ୟମରେ ସାନ ଭାଇର ଭିଜୁଆଲ ଦେଖିବା ପରେ ବଡ଼ ଭାଇ ସାଙ୍ଗେ ସାଙ୍ଗେ ଧାଇଁ ଆସିଥିଲେ ବାଲେଶ୍ୱର ହସ୍ପିଟାଲ । ସେଠାରେ ମେଡିକାଲରେ ତାଙ୍କ ଭାଇ ନଥିବା ଖବର ଜାଣି ପରେ ଭଦ୍ରକ ମେଡିକାଲ ଯାଇ ସେଠାରୁ ବି ନିରାଶ ହୋଇ ଖାଲି ହାତରେ ଫେରି ଏବେ ପହଞ୍ଚିଛନ୍ତି ଏସସିବି ମେଡିକାଲରେ । ହେଲେ ଏଠାରେ ଭାଇର କୌଣସି ଖବର ପାଇ ନଥିବା କହିଛନ୍ତି ମହମ୍ମଦ ତନିଫ । ସରକାର ଭାଇକୁ ଖୋଜିବାରେ ସହାୟତା କରିବା ପାଇ ଅନୁରୋଧ କରିଛନ୍ତି ସେ ।

ବାହାନଗା ଟ୍ରେନ୍ ଦୁର୍ଘଟଣାରେ ଅନେକ ବ୍ୟକ୍ତି ପ୍ରାଣ ହରାଇଥିବାବେଳେ ଏବେ ବି ଅନେକ ମେଡ଼ିକାଲରେ ଆହତଙ୍କୁ ଚିକିତ୍ସା କରାଯାଉଛି । ଅନେକ ଲୋକ ନିଖୋଜ ଥିବା ନେଇ ପରିବାର ଲୋକ ଅଭିଯୋଗ କରୁଛନ୍ତି । ତେବେ ଦିଲ୍ଲୀର ମହମ୍ମଦ ହନିଫ୍ ନାମକ ଜଣେ ବ୍ୟକ୍ତି ବିଭିନ୍ନ ରାଜ୍ୟରେ ପାଣି ପାଇପ କାମ କରନ୍ତି । ଦୁର୍ଘଟଣା ପରଠାରୁ ତାଙ୍କ ପରିବାର ତାଙ୍କର କୌଣସି ଖବର ପାଉନାହାନ୍ତି । ହନିଫଙ୍କ ପରିବାର ଲୋକ ବିଭିନ୍ନ ସ୍ଥାନରେ ଖୋଜାଖୋଜି କରୁଛନ୍ତି । ଏହାରି ଭିତରେ ହନିଫ ଏକ ମେଡ଼ିକାଲ ବେଡରେ ବସିଥିବାର ଟିଭିରେ ଦେଖିବା ପରେ ପରିବାର ଲୋକ କଟକ ଅସିଛନ୍ତି । ମୋବାଲରେ ଭାଇର ଫଟୋ ଦେଖାଇ ଖୋଜଖୋଜି କରୁଛନ୍ତି ପରିବାର ଲୋକ ।