କରମଣ୍ଡଳ ଦୁର୍ଘଟଣା : ଏମ୍ସରେ ଏବେବି ଅଛି 82 ମୃତଦେହ, 111 ଜଣଙ୍କ ମୃତଦେହ ପଠାଯାଇଛି

Published: Thursday, June 8, 2023, 12:34 [IST]

ଭୁବନେଶ୍ୱର: ବାହାନଗାରେ ହୋଇଥିବା କରମଣ୍ଡଳ ଦୁର୍ଘଟଣାରେ ପ୍ରାଣ ହରାଇଥିବା ମୃତକଙ୍କ ମଧ୍ୟରୁ 111 ଜଣଙ୍କ ପରିବାରକୁ ମୃତଦେହ ହସ୍ତାନ୍ତର କରାଯାଇଛି । ଏହା ପରେ ଏବେ ବି ଏମ୍ସ ଭୁବନେଶ୍ୱରରେ 82 ମୃତଦେହ ଅଛି । କେତେକ ମୃତ ଦେହ ପାଇଁ ଅନେକ ଦାବିଦାର ଥିବାରୁ ଏହାର ଡିଏନ୍ଏ ଟେଷ୍ଟକୁ ଅପେକ୍ଷା କରାଯାଇଛି । 50 ଟି ମୃତ ଦେହର ଡିଏନ୍ଏ ଟେଷ୍ଟ ପାଇଁ ନମୁନା ଦିଲ୍ଲୀ ପଠାଯାଇଛି ।

ବିଏମସି କମିଶନର ବିଜୟ ଅମୃତା କୁଲାଙ୍ଗେ ଗୁରୁବାର ଗଣମାଧ୍ୟମକୁ ଏ ନେଇ ସୂଚନା ଦେଇଛନ୍ତି । ଚିହ୍ନଟ ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ବିଏମସି ଅନ୍ୟ ରାଜ୍ୟ ସରକାରଙ୍କ ଅଧିକାରୀଙ୍କ ସହ ସହଯୋଗ କରୁଛି । ଦାବିଦାରଙ୍କ ଯାଞ୍ଚ ଏବଂ ଚିହ୍ନଟ ପ୍ରକ୍ରିୟାକୁ ଶୃଙ୍ଖଳିତ କରିବା ପାଇଁ ଆମେ ସେମାନଙ୍କ ସହ ସକ୍ରିୟ ଭାବେ କାମ କରୁଛୁ ବୋଲି କୁଲାଙ୍ଗେ କହିଛନ୍ତି ।

ବର୍ତ୍ତମାନ ମଧ୍ୟ ବହୁ ପରିବାର ଲୋକ ଫଟୋ ଏବଂ ପରିଚୟ ପତ୍ର ଦେଖାଇ ମୃତ ଶରୀର ଚିହ୍ନଟ କରିବାକୁ ପ୍ରୟାସ କରୁଛନ୍ତି । ମୃତ ବ୍ୟକ୍ତିଙ୍କ ଶେଷ କଲର ଭେରିଫିକେସନ କରାଯାଉଛି ।

ବାହାନଗାରେ କରମଣ୍ଡଳ ଏକ୍ସପ୍ରେସ ଦୁର୍ଘଟଣା ପୂର୍ବରୁ ମୃତକ କାହା ସହିତ କଥା ହୋଇଥିଲେ ଏବଂ କେଉଁ ଠିକଣାରେ ଥିଲେ ଆଦି ମଧ୍ୟ ଯାଞ୍ଚ କରାଯାଉଛି । କାରଣ ଗୋଟିଏ ଶବ ପାଇଁ ଅନେକ ପରିବାର ଦାବି କରୁଛନ୍ତି । ଶବ ଯେପରି ନିଜ ପରିବାରକୁ ହସ୍ତାନ୍ତର ହେବ ତାକୁ ଗୁରୁତ୍ୱ ଦେବାକୁ ଯାଇ ପରିଚୟ ପତ୍ର ବ୍ୟତୀତ ଏହିସବୁ ଦିଗକୁ ଗୁରୁତ୍ୱ ଦିଆଯାଉଛି ବୋଲି ମେୟର ସୁଲୋଚନା ଦାସ କହିଛନ୍ତି । ବିଭିନ୍ନ ପର୍ଯ୍ୟାୟ ଯାଞ୍ଚ ପରେ ହିଁ ମୃତ ଶରୀର ହସ୍ତାନ୍ତର ହେଉଛି ।

ବିଏମସି ରେଳବାଇ ଏବଂ ଏମ୍ସ-ଭୁବନେଶ୍ୱର ମଧ୍ୟରେ ସମନ୍ୱୟ ରକ୍ଷା କରୁଛି । ମୃତକଙ୍କ ସମ୍ପର୍କୀୟଙ୍କୁ ସହାୟତା ଦେବା ପାଇଁ ଏକ ସ୍ୱତନ୍ତ୍ର କଣ୍ଟ୍ରୋଲ ରୁମ୍ ପ୍ରତିଷ୍ଠା କରାଯାଇଥିବା ବେଳେ ଯେଉଁମାନେ ମୃତଦେହ ନେବା ପାଇଁ ଆସୁଛନ୍ତି ସେମାନଙ୍କ ପାଇଁ ଖାଇବା ଓ ରହିବାର ବ୍ୟବସ୍ଥା ମଧ୍ୟ କରାଯାଇଛି ।
ଅପରପକ୍ଷରେ ବାହାନଗାରେ ରେଳ ଦୁର୍ଘଟଣା ପଛର କାରଣକୁ ନେଇ ଛାନଭିନ୍ କରୁଛି ସିବିଆଇ । ସିବିଆଇର ଏକ ଟିମ ଭୁବନେଶ୍ୱର ଆସି ଦୁର୍ଘଟଣାଗ୍ରସ୍ତ ଟ୍ରେନ୍ ର ଲୋକୋ ପାଇଲଟ ସହ କିଛି ଅଧିକାରୀଙ୍କୁ ମଧ୍ୟ ପଚରାଉଚରା କରିପାରେ । ସିବିଆଇର ଆଉ ଏକ ଟିମ ଘଟଣାସ୍ଥଳ ଓ ଷ୍ଟେସନରେ କରିବ ତନାଘନା ।

Published On June 8, 2023