ଯାଜପୁରରେ ଟ୍ରେନରେ କଟି ପ୍ରାଣ ହରାଇଥିବା 6 ଶ୍ରମିକଙ୍କ ପରିବାରକୁ ଅନୁକମ୍ପା ରାଶି ଘୋଷଣା କଲେ ମୁଖ୍ୟମନ୍ତ୍ରୀ
ଭୁବନେଶ୍ୱର: ଯାଜପୁର ରୋଡ ଷ୍ଟେସନରେ ଟ୍ରେନରେ କଟି ପ୍ରାଣ ହରାଇଥିବା 6 ଶ୍ରମିକଙ୍କ ମୃତ୍ୟୁ ଘଟଣାରେ ଶୋକ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଶୋକସନ୍ତପ ପରିବାର ବର୍ଗଙ୍କୁ ଗଭୀର ସମବେଦନା ଜଣାଇଛନ୍ତି ମୁଖ୍ୟମନ୍ତ୍ରୀ । ମୃତକଙ୍କ ପରିବାର ପାଇଁ 5 ଲକ୍ଷ ଟଙ୍କା ଲେଖାଏଁ ଅନୁକମ୍ପା ରାଶି ପ୍ରଦାନ କରିବାକୁ ଘୋଷଣା କରିଛନ୍ତି । ଏହି ଅନୁକମ୍ପା ରାଶି ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ପ୍ରଦାନ କରାଯିବ ।
ସୂଚନାଥାଉକି, ଆଜି ଅପରାହ୍ନରେ ଯାଜପୁର ରୋଡ ଷ୍ଟେସନ ନିକଟରେ ଟ୍ରେନ୍ ତଳେ ଚାପି ହୋଇ 6 ଜଣ ଶ୍ରମିକଙ୍କ ମୃତ୍ୟୁ ହୋଇଛି । ଏହା ସହିତ 2 ଜଣ ଗୁରୁତର ଆହତ ହୋଇଛନ୍ତି ।
ସୂଚନା ଅନୁସାରେ, ଶ୍ରମିକମାନେ ରେଲୱେ ଟ୍ରାକରେ କାର୍ଯ୍ୟ କରୁଥିଲେ । ଏହି ସମୟରେ କାଳବୈଶାଖୀ ବର୍ଷା ହେବାରୁ ସେମାନେ ଦୀର୍ଘ ଦିନରୁ ଛିଡ଼ାଥିବା ଇଞ୍ଜିନ ବିହୀନ ବଗି ତଳେ ଆଶ୍ରୟ ନେଇଥିଲେ । ପବନରେ ବଗି ଆଗକୁ ଗଡ଼ିଯାଇଥିଲା । ଏହି ସମୟରେ ଟ୍ରେନ୍ ତଳେ ରହିଥିବା ଶ୍ରମିକ ଟ୍ରେନ୍ ଚକରେ କଟି ପ୍ରାଣ ହରାଇଥିଲେ ।
ଗୁରୁତର ୩ଜଣଙ୍କୁ ହସ୍ପିଟାଲରେ ଭର୍ତ୍ତି କରା ଯାଇଛି । ଘଟଣାସ୍ଥଳରେ ଜିଆରପି ଓ ଆରପିଏଫ୍ ଅଧିକାରୀ ପହଞ୍ଚି ତଦନ୍ତ କରିଛନ୍ତି ।
Click it and Unblock the Notifications
Sign in with Google