ଓଡ଼ିଆ ଭାଷାରେ ହେବ ସିବିଏସ୍ଇ ପାଠପଢା

Published: Saturday, July 22, 2023, 13:52 [IST]

ଭୁବନେଶ୍ୱର: ଓଡ଼ିଆ ଭାଷାରେ ସିବିଏସ୍ଇ ସ୍କୁଲରେ ପଢ଼ାଯିବ ପାଠ । ସିବିଏସ୍ଇ ସ୍କୁଲରେ ପଢୁଥିବା ଛାତ୍ରଛାତ୍ରୀ ଏଣିକି ଓଡ଼ିଆ ଭାଷାରେ ନିଜର ପାଠ୍ୟକ୍ରମ ପଢିପାରିବେ । ଏ ନେଇ ସିବିଏସ୍ଇ ପକ୍ଷରୁ ବିଜ୍ଞପ୍ତି ପ୍ରକାଶ କରାଯାଇଛି ।

କେବଳ ଓଡ଼ିଆ ନୁହଁ ଅନ୍ୟ 22 ଟି ମାତୃଭାଷାରେ ସିବିଏସ୍ଇ ସ୍କୁଲରେ ପାଠ ପଢ଼ି ପାରିବେ ଛାତ୍ରଛାତ୍ରୀ । ସିବିଏସ୍ଇ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିବା କହିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

ବିଜ୍ଞପ୍ତି ଅନୁସାରେ ପ୍ରଥମରୁ ଦ୍ୱାଦଶ ଶ୍ରେଣୀ ଯାଏଁ ଓଡ଼ିଆ ଭାଷାରେ ପାଠ ପଢ଼ାଯିବ । ଏପରିକି ଦେଶରେ 22 ଟି ଆଞ୍ଚଳିକ ଭାଷାରେ ସିବିଏସ୍ଇ ପାଠ୍ୟକ୍ରମ ଉପଲବ୍ଧ ହେବ । ଏନେଇ ଏନସିଇଆରଟିକୁ ପାଠ୍ୟ ପୁସ୍ତକ ପ୍ରସ୍ତୁତ ପାଇଁ ନିର୍ଦ୍ଦେଶ ଦିଆଯାଇଛି । ଆଞ୍ଚଳିକ ଭାଷାରେ ପାଠ ପଢ଼ାଯିବା ସହ ପରୀକ୍ଷା କରିବାକୁ ପ୍ରସ୍ତୁତି ମଧ୍ୟ ଚାଲିଛି ।

ଛାତ୍ରଛାତ୍ରୀ ଇଂରାଜୀ, ହିନ୍ଦୀ ମିଡିୟମ ସହ ଓଡ଼ିଆ ଭାଷାରେ ବି ପଢ଼ି ପାରିବେ । ଯେଉଁ ପିଲାମାନେ ଓଡ଼ିଆରେ ପଢ଼ିବାକୁ ଚାହିଁବେ ସେ ନେଇ ସ୍କୁଲ ବ୍ୟବସ୍ଥା କରିବ ବୋଲି କହିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏହା ଦ୍ୱାରା ପିଲାମାନେ ସହଜରେ ପାଠ ବୁଝିପାରିବେ । ସିବିଏସଇ ଅନୁବନ୍ଧିତ ସବୁ ସ୍କୁଲରେ ଆଞ୍ଚଳିକ ଭାଷାରେ ପାଠପଢ଼ା ଯିବ ବୋଲି ସୂଚନା ଦେଇଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ।

Published On July 22, 2023