ଇନ୍ଦ୍ରାବତୀ ଦକ୍ଷିଣ ମୁଖ୍ୟ କେନାଲରେ ଘାଇ, ଘରେ ପଶିଲା ପାଣି

Published: Monday, March 4, 2024, 10:21 [IST]

କଳାହାଣ୍ଡି: ଭାଙ୍ଗିଲା ଇନ୍ଦ୍ରାବତୀ ଦକ୍ଷିଣ ମୁଖ୍ୟ କେନାଲର ବନ୍ଧ । କଲମପୁର ବ୍ଲକ ଦେପୁର ନିକଟରେ 40 ଫୁଟ ଘାଇ ସୃଷ୍ଟି ହୋଇଛି । ଫଳରେ ଗାଁ ଭିତରେ କେନାଲ ପାଣି ପଶିଯାଇଛି । ଲୋକଙ୍କ ଘରେ ମଧ୍ୟ ପାଣି ପଶିଯାଇଛି । ଶହ ଶହ ହେକ୍ଟର ଚାଷ ଜମି ମଧ୍ୟ ଜଳମଗ୍ନ ହୋଇଛି ।

ଖବର ଅନୁଯାୟୀ, ରବିବାର ବିଳମ୍ବିତ ରାତିରେ ଦେପୁର ଗାଁ ନିକଟରେ ଇନ୍ଦ୍ରାବତୀ ଦକ୍ଷିଣ କେନାଲରେ ଘାଇ ହୋଇଥିଲା । ରାତିରେ ସମସ୍ତେ ଶୋଇଥିବା ବେଳେ ହଠାତ୍‌ ଗାଁ ଭିତରେ ପାଣି ପଶିଯାଇଥିଲା । ଘର ଭିତରେ ପାଣି ଦେଖି ଲୋକମାନେ କୌଣସିକ୍ରମେ ଘର ବାହାରକୁ ବାହାରିଥିଲେ । ଏପିରିକି ଘରର ଆଜବେଷ୍ଟ ଭାଙ୍ଗି ବାହାରକୁ ଆସିଥିଲେ ।

ସେପଟେ କେନାଲ ବନ୍ଧ ଭାଙ୍ଗିବା ପରେ ଗାଁ ରାସ୍ତାରେ 5 ଫୁଟ୍‌ ପାଣି ଚାଲିଛି । ଲୋକଙ୍କ ଘରେ ପାଣି ପଶି ଅନେକ ସାମଗ୍ରୀ ଏବଂ ଆସବାବପତ୍ର ନଷ୍ଟ ହୋଇଛି । ଘଟଣା ସ୍ଥଳରେ ଉପର ଇନ୍ଦ୍ରାବତୀ ଜଳ ସେଚନ ବିଭାଗର ବରିଷ୍ଠ ଅଧିକାରୀ, ସ୍ଥାନୀୟ ବିଡ଼ିଓ ଓ ତହସିଲଦାର ପହଞ୍ଚି କ୍ଷୟ କ୍ଷତିର ଆକଳନ କରୁଛନ୍ତି l

ଅନ୍ୟପଟେ କଲମପୁର ଅଗ୍ନିଶମ ବିଭାଗର ର୍କମଚାରୀ ପହଞ୍ଚି ଗାଁରେ ଜଳ ନିସ୍କାସନ ସହିତ ଜଳ ବନ୍ଦୀ ପରିବାର ମାନଙ୍କୁ ଉଦ୍ଧାର କରାଯାଉଛି । ରାଜସ୍ୱ ବିଭାଗର ତଦନ୍ତ ପରେ ପ୍ରକୃତ କ୍ଷୟ କ୍ଷତି ଜଣା ପଡ଼ିବ । ବର୍ତ୍ତମାନ କେନାଲର ମୁଖ୍ୟ ଗେଟକୁ ବନ୍ଦ କରି ଦିଆ ଯାଇଛି । ବର୍ତ୍ତମାନ ସ୍ଥିତି ନିୟନ୍ତ୍ରଣ ରହିଛି ।
ପ୍ରାୟ 300 କୋଟି ଟଙ୍କା ବ୍ୟୟରେ ଦକ୍ଷିଣ ମୁଖ୍ୟ କେନାଲ ଦୁଇବର୍ଷ ଧରି ମରାମତି ଚାଲିଛି । ହେଲେ ସମ୍ପୃକ୍ତ ସ୍ଥାନରେ ଆଦୌ ମରାମତି ହୋଇନାହିଁ । ଫଳରେ ପୁରୁଣା ହୁଡ଼ା ରେ ନିୟମିତ ପାଣି ଝରି ଝରି କେନାଲ ବନ୍ଧ ଭାଙ୍ଗିଥିବା ଗାଁ ଲୋକେ ଅଭିଯୋଗ କରିଛନ୍ତି । ଅନ୍ୟପକ୍ଷରେ କେନାଲ ରେ ଗେଟ ବନ୍ଦ କରି ପାଣି ଉଠାଇ କିଛି ଚାଷୀ ନିଜ ଜମି କୁ ପାଣି ନେଉଛନ୍ତି । ଏଣୁ ଆବଶ୍ୟକତା ରୁ ଅଧିକ ପାଣି ରହିବା ଯୋଗୁଁ ପାଣି ଝରିବା ସ୍ଥାନରେ ଘାଇ ସୃଷ୍ଟି ହେଇଥିବା ବିଭାଗୀୟ ସୂତ୍ରରୁ ପ୍ରକାଶ ପାଇଛି । ତେବେ ଆସନ୍ତା ଦିନ ଦୁଇ ଦିନ ମଧ୍ୟରେ ଘାଇ ମରାମତି କରାଯାଇ କେନାଲ ରେ ଜଳସେଚନ ର ବ୍ୟବସ୍ଥା କରାଯିବ ବୋଲି ସୂଚନା ମିଳିଛି ।

Published On March 4, 2024