ବାହାନଗା ଟ୍ରେନ୍ ଦୁର୍ଘଟଣାକୁ ପୁରିଲା ମାସେ, ସିବିଆଇ ହାତ ଖାଲି, ମୃତଦେହ ନେବାକୁ ଅପେକ୍ଷାରେ 52 ପରିବାର

Published: Sunday, July 2, 2023, 8:58 [IST]

ଭୁବନେଶ୍ୱର : ବାଲେଶ୍ୱର ଜିଲ୍ଲା ବାହାନଗା ଠାରେ ହୋଇଥିବା ଟ୍ରେନ୍ ଦୁର୍ଘଟଣାକୁ ଆଜି ମାସେ ପୁରିଛି । ଏହି ଭୟଙ୍କର ଦୁର୍ଘଟଣାର ଚିତ୍ର ଏବେବି ମନରୁ ଲିଭିନି । ଜୁନ୍ 2 ସନ୍ଧ୍ୟା ସମୟରେ ହୋଇଥିବା ଏହି ଦୁଃଖଦ ଘଟଣାରେ ଏପର୍ଯ୍ୟନ୍ତ 293 ଜଣଙ୍କର ମୃତ୍ୟୁ ହୋଇସାରିଲାଣି । ଅନେକ ଆହତ ଏବେ ବି ଚିକିତ୍ସିତ ହେଉଛନ୍ତି । ଆହୁରି 52 ପରିବାରକୁ ମିଳିନି ସେମାନଙ୍କ ସମ୍ପର୍କୀୟଙ୍କ ମୃତଦେହ । DNA ରିପୋର୍ଟ ଆସି ନଥିବାରୁ ଶବ ଚିହ୍ନଟରେ ସମସ୍ୟା ହେଉଛି । ମାସେ ଧରି ମୃତକଙ୍କ ପରିବାର ଲୋକ ଏମ୍ସ ନିକଟରେ ଅପେକ୍ଷା କରି ରହିଛନ୍ତି ।

ଏଥି ମଧ୍ୟରେ ଗୋଟିଏ ଦିନ ପୂର୍ବରୁ 29 ଜଣଙ୍କ DNA ରିପୋର୍ଟ ଆସିବା ପରେ ସେମାନଙ୍କ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯାଇଛି । ବାକି 52 ମୃତଦେହର ରିପୋର୍ଟ ଆସି ନଥିବାରୁ ଅପେକ୍ଷାରେ ରହିଛନ୍ତି ପରିବାର ଲୋକ ।

ଅପରପକ୍ଷରେ ଦୁର୍ଘଟଣାର କାରଣ ଖୋଜୁଥିବା ସିବିଆଇର ତଦନ୍ତକୁ ନେଇ ପ୍ରଶ୍ନ ଉଠିବା ଆରମ୍ଭ ହେଲାଣି । ମାସେ ପୁରି ଯାଇଥିଲେ ସୁଦ୍ଧା ଏବେବି ଖାଲି ରହିଛି ସିବିଆଇ ହାତ । ରେଳ କର୍ମଚାରୀଙ୍କୁ ପଚରାଉଚୁରାରେ ତଦନ୍ତ ସୀମିତ ରହିଯାଇଛି କି ବୋଲି ସାଧାରଣରେ ପ୍ରଶ୍ନ ଉଠୁଛି । ତଦନ୍ତର ଅଗ୍ରଗତି ସମ୍ପର୍କରେ କୌଣସି ସୂଚନା ନ ଦେବା ଏହି ସନ୍ଦେହକୁ ଆହୁରି ମଜବୁତ କରିଦେଉଛି ।

ସିଗନାଲ ତ୍ରୁଟି ଯୋଗୁଁ ଏହି ଦୁର୍ଘଟଣା ହୋଇଥିବା ନେଇ ପ୍ରଥମେ କୁହାଯାଉଥିବା ବେଳେ ଗତକାଲି CSR ଏହାର ରିପୋର୍ଟ ଦାଖଲ କରିଛି । ଏଥିରେ ସିଗନାସଲ ଏବଂ ଟ୍ରାଫିକ୍ ଅଧିକାରୀଙ୍କ ଭୁଲ୍ ଯୋଗୁଁ ଏହି ଦୁର୍ଘଟଣା ହୋଇଥିବା ଉଲ୍ଲେଖ କରାଯାଇଛି । କିନ୍ତୁ ସିବିଆଇ ଏପର୍ଯ୍ୟନ୍ତ କୌଣସି ପର୍ଦ୍ଦାଫାସ୍ କରିପାରି ନଥିବା ସାଧାରଣରେ ଆଲୋଚନାର ବିଷୟ ପାଲଟିଛି ।

Published On July 2, 2023