ଖୋଲିଲା ବାହାନଗା ସ୍କୁଲ୍, ନୂତନ ଶ୍ରେଣୀ ଗୃହ ନିର୍ମାଣ ପରେ ଖୋଲା ହେଲା ସ୍କୁଲ୍

ବାଲେଶ୍ୱର : ଆଜି ଖୋଲିଛି ବାହାନଗା ସ୍କୁଲ୍ । ରାଜ୍ୟର ଅନେକ ଜିଲ୍ଲାର ସ୍କୁଲ ସହ ପୂର୍ବ ନିର୍ଦ୍ଧାରିତ ତାରିଖ ଅନୁସାରେ ବାହାନଗା ସ୍କୁଲ୍ ମଧ୍ୟ ଖୋଲିଛି । ନୂଆ ଶ୍ରେଣୀଗୃହ ନିର୍ମାଣ ପରେ ଖରା ଛୁଟି ଶେଷ ହେବା ପରେ ସ୍କୁଲ୍ ଖୋଲିଛି ।

ବାହାନଗା ଟ୍ରେନ୍ ଦୁର୍ଘଟଣାରେ ପ୍ରାଣ ହରାଇଥିବା ଶହ ଶହ ଯାତ୍ରୀଙ୍କ ମୃତଦେହ ଏହି ସ୍କୁଲରେ ରଖାଯାଇଥିଲା । ପରେ ମୃତଦେହ ଗୁଡ଼ିକୁ ସେଠାରୁ ସ୍ଥାନାନ୍ତର କରାଯିବା ପରେ ମଧ୍ୟ ଛାତ୍ରଛାତ୍ରୀ ଓ ଅଭିଭାବକଙ୍କ ମଧ୍ୟରେ ଭୟର ବାତାବରଣ ଦେଖାଦେଇଥିଲା । ଫଳରେ ପ୍ରଶାସନ ପକ୍ଷରୁ ସଂପୃକ୍ତ ଶ୍ରେଣୀଗୃହ ଗୁଡ଼ିକ ଭଙ୍ଗା ଯାଇ ନୂତନ ଶ୍ରେଣୀ ଗୃହ ନିର୍ମାଣ କରାଯାଇଛି ।

ସେହିପରି ଖରାଛୁଟି ସରିବା ପରେ ଆଜିଠାରୁ ଖୋଲିଛି ରାଜ୍ୟର ଅନେକ ଜିଲ୍ଲାର ସ୍କୁଲ । କିନ୍ତୁ ପଶ୍ଚିମ ଓଡ଼ିଶାରେ ପ୍ରବଳ ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି 7 ଜିଲ୍ଲାରେ ଯଥାକ୍ରମେ 22 ଓ 23 ରେ ସ୍କୁଲ୍ ଖୋଲାଯିବ । ଏପରିକି ଏହି 7 ଜିଲ୍ଲାରେ ସକାଳୁଆ ସ୍କୁଲ ହେବା ନେଇ ନିଷ୍ପତ୍ତି ନିଆଯାଇଛି ।

ସମ୍ବଲପୁର ଓ ଝାରସୁଗୁଡ଼ା ଜିଲ୍ଲାରେ ଆସନ୍ତାକାଲି ସ୍କୁଲ ଖୋଲିବ । ଏହି ଉଭୟ ଜିଲ୍ଲାରେ 22 ରୁ 24 ଯାଏଁ ସକାଳୁଆ ସ୍କୁଲ୍ ହେବ । ଏହା ପରେ 26 ତାରିଖରୁ ସ୍ୱାଭାବିକ ଭାବେ 10 ଟା ରୁ ସ୍କୁଲ୍ ହେବ ।

ସେହିପରି ସୁବର୍ଣ୍ଣପୁର ଜିଲ୍ଲାରେ 23 ତାରିଖରେ ଖୋଲିବ ସ୍କୁଲ । 23 ଓ 24 ଦୁଇ ଦିନ ସକାଳୁଆ ସ୍କୁଲ୍ ହେବ । ସକାଳ 6.30 ରୁ 9.30 ଯାଏ ଚାଲିବ ସ୍କୁଲ । ସେହିଭଳି ସୁନ୍ଦରଗଡ଼ ଓ ନୂଆପଡ଼ା ଜିଲ୍ଲାରେ ମଧ୍ୟ 23 ରେ ଖୋଲିବ ସ୍କୁଲ ଖୋଲିବ । 26 ତାରିଖ ଠାରୁ ନିୟମିତ ସମୟାନୁସାରେ 10 ଟାରେ ସ୍କୁଲ ଖୋଲିବ । ଅପରପକ୍ଷରେ ବଲାଙ୍ଗୀରରେ 22 ତାରିଖରେ ଖୋଲିବ ସ୍କୁଲ ।

English summary

Bahanaga School Reopen After reconstruction Of Class Room