ସଞ୍ଜିବନୀ ସାଜିଲା ବିଏସକେୱାଇ, ଯୁବତୀଙ୍କ ପେଟରୁ ବାହାରିଲା 12 କେଜିର ଟ୍ୟୁମର

Updated: Wednesday, November 15, 2023, 16:20 [IST]

ଭୁବନେଶ୍ୱର: ଅସହାୟ ଗରିବଙ୍କ ସାହା ପାଲଟିଛି ବିଏସକେୱାଇ । ଗରିବଙ୍କୁ ବିନା ମୂଲ୍ୟରେ ଉନ୍ନତ ମାନର ଚିକିତ୍ସା ଯୋଗାଇ ଦେଉଛି ରାଜ୍ୟ ସରକାରଙ୍କ ବିଏସକେୱାଇ । ସରକାରଙ୍କ ଏହି ମହତ୍ୱକାଂକ୍ଷୀ ଯୋଜନାର ଲାଭ ପାଇଛନ୍ତି ଜଣେ ଗରିବ ଆଦିବାସୀ ଯୁବତୀ ।

ମୟୁରଭଞ୍ଜର 25 ବର୍ଷୀୟ ଆଦିବାସୀ ମହିଲା ତୁଳସୀ ହୋ । ତୁଳସୀ ଦୀର୍ଘ ଦିନ ଧରି ପେଟରେ ଯନ୍ତ୍ରଣା ଅନୁଭବ କରୁଥିଲେ । ବିଭିନ୍ନ ସ୍ଥାନରେ ଚିକିତ୍ସା ସତ୍ତ୍ବେ ଯନ୍ତ୍ରଣାରୁ ଉପଶମ ମିଳୁନଥିଲା । ଅତ୍ୟଧିକ ଯନ୍ତ୍ରଣା ପରେ ଭୁବନେଶ୍ଵର ଏକ ଘରୋଇ ହସ୍ପିଟାଲ ବିବେକାନନ୍ଦ ହସ୍ପିଟାଲକୁ ଚିକିତ୍ସା ପାଇଁ ଆସିଥିଲେ । ତେବେ ସେଠାରେ ତାଙ୍କର ବିଭିନ୍ନ ପରୀକ୍ଷା କରାଯାଇଥିଲା । ସିଟି ସ୍କାନରେ ଜଣାପଡ଼ିଥିଲା କି ପେଟରେ 12 କେଜିର ଏକ ଟ୍ୟୁମର ରହିଛି । ଏହା ପରେ ବିଏସକେୱାଇ ଅଧିନରେ ଆରମ୍ଭ ହୋଇଥିଲା ଚିକିତ୍ସା ।

ଜଟିଳ ଅସ୍ତ୍ରୋପଚାର ପାଇଁ ଗଠନ ହୋଇଥିଲା ଡାକ୍ତରୀ ଟିମ୍ । ସଫଳତା ସହ ଅସ୍ତ୍ରୋପଚାର ନେଇ ସମସ୍ତ ବ୍ୟବସ୍ଥା ମଧ୍ୟ କରାଯାଇଥିଲା । ଦୀର୍ଘ 8 ଘଣ୍ଟାର ଅପରେସନ୍ ପରେ ଯୁବତୀଙ୍କ ପେଟରୁ 12 କେଜିର ଟ୍ୟୁମର ବାହାରିଥିଲା ।

ଚଳିତ ମାସ 11 ତାରିଖରେ ଯୁବତୀଙ୍କର ଅସ୍ତ୍ରୋପଚାର କରାଯାଇଥିଲା । ପେଟରେ ଟ୍ୟୁମରଟି କିଡନୀ ଏବଂ ଅନ୍ତଃନଳୀକୁ ଲାଗି ରହିଥିଲା । ଏହାର ଓଜନ ପାଖାପାଖି 12 କେଜି ଓ ଏହାର ଆକାର 40 ସେମି ହେବ ବୋଲି ଜଣାପଡିଛି । ଏହି ସଫଳ ଅସ୍ତ୍ରୋପଚାର ଟିମରେ ଡାକ୍ତର ପି.ଆଚାର୍ଯ୍ୟ (ସର୍ଜନ), ଡକ୍ଟର ଏସ ସାହୁ (ଆନାସ୍ଥେସିଆ) ଏବଂ ପାରାମେଡିକ୍ସ ରହିଥିଲେ । ଅପରେସନ ପରେ ରୋଗୀ ଜଣଙ୍କର ସ୍ୱାସ୍ଥ୍ୟବସ୍ଥା ସ୍ଥିର ରହିଛି । ବିଏସକେୱାଈ ଯୋଜନାରେ ଏକ ଘରୋଇ ହସ୍ପିଟାଲରେ ଏହି ଅସ୍ତ୍ରୋପଚାର କରାଯାଇଛି ।