ମଧ୍ୟପ୍ରଦେଶରେ କଂଗ୍ରେସକୁ ମିଳିବ 150 ଆସନ, ସ୍ୱତନ୍ତ୍ର ରଣନୀତି ପ୍ରସ୍ତୁତ କରିଛି ଦଳ - ରାହୁଲ ଗାନ୍ଧୀ

ଭୋପାଳ : କର୍ଣ୍ଣାଟକରେ ପ୍ରଚଣ୍ଡ ବହୁମତ ହାସଲ କରିବା ପରେ କଂଗ୍ରେସର ମନୋବଳ ବହୁଗୁଣିତ ହୋଇଯାଇଛି । କର୍ଣ୍ଣାଟକ ଭଳି ଅନ୍ୟ ରାଜ୍ୟରେ ହେବାକୁ ଥିବା ନିର୍ବାଚନରେ ମଧ୍ୟ ବାଜି ମାରିବାକୁ ରଣନୀତି କରୁଛି । ରାଜସ୍ଥାନ, ମଧ୍ୟପ୍ରଦେଶ ଏବଂ ଛତିଶଗଡରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ କଂଗ୍ରେସ ଦଳ ପ୍ରସ୍ତୁତି ଆରମ୍ଭ କରିଦେଇଛି । ମଧ୍ୟପ୍ରଦେଶ ନିର୍ବାଚନ ସମ୍ପର୍କରେ ଦଳ ଆଜି ଏକ ଗୁରୁତ୍ୱପୂର୍ଣ୍ଣ ବୈଠକ କରିଛି । କଂଗ୍ରେସ ସଭାପତି ମଲ୍ଲିକାର୍ଜୁନ ଖାଡ଼ଗେ, ସାଧାରଣ ସମ୍ପାଦକ କେ.ସି ଭେନୁଗୋପାଲ ଏବଂ କଂଗ୍ରେସ ନେତା ରାହୁଲ ଗାନ୍ଧୀ ମଧ୍ୟପ୍ରଦେଶର ଦଳର ନେତାଙ୍କ ସହ ଦିଲ୍ଲୀର ପାର୍ଟି ମୁଖ୍ୟାଳୟରେ ଏକ ବୈଠକ କରିଥିଲେ ।

ବୈଠକ ପରେ ରାହୁଲ ଗାନ୍ଧୀ କହିଛନ୍ତି ଯେ ଆମର ଦୀର୍ଘ ଆଲୋଚନା ହୋଇଛି, ଆମର ଆଭ୍ୟନ୍ତରୀଣ ମୂଲ୍ୟାଙ୍କନ ହେଉଛି ଯେ କର୍ଣ୍ଣାଟକରେ ଆମେ 136 ଟି ସିଟ୍ ପାଇଛୁ, ମଧ୍ୟପ୍ରଦେଶରେ ଆମେ 150 ଟି ସିଟ୍ ପାଇବାକୁ ଯାଉଛୁ । କର୍ଣ୍ଣାଟକରେ ଯାହା କରାଯାଇଥିଲା ତାହା ପୁନରାବୃତ୍ତି କରାଯିବ । 150 ଟି ସିଟ୍ ଆସିବାକୁ ଯାଉଛି ।

ମିଶନ 66 ରେ ଦିଗବିଜୟ

ବିଜେପିକୁ ହରାଇବା ନେଇ କଂଗ୍ରେସ ରଣନୀତି ପ୍ରସ୍ତୁତ କରିବା ଆରମ୍ଭ କରିଛି । ବିଜେପିର ଅସନ୍ତୁଷ୍ଟ ନେତାଙ୍କ ଉପରେ କଂଗ୍ରେସ ନଜର ରଖିଥିବାବେଳେ ଦଳର ନେତାମାନଙ୍କୁ ସକ୍ରିୟ କରିବା ପାଇଁ ସମସ୍ତ ପ୍ରକାର ପ୍ରୟାସ କରାଯାଉଛି । ଦିଗବିଜୟ ସିଂହ ମିଶନ୍ 66 ରେ ନିୟୋଜିତ ଅଛନ୍ତି । ଦୀର୍ଘ ଦିନ ଧରି କଂଗ୍ରେସ ପରାଜୟର ସମ୍ମୁଖୀନ ହେଉଥିବା 66 ଆସନ ଉପରେ ନଜର ରଖି ଦିଗବିଜୟ ସକ୍ରିୟ ହୋଇ ଉଠିଛନ୍ତି । ଏଥିପାଇଁ 16 ଜଣ ନେତାଙ୍କ ଏକ ଟିମ୍ ନିଯୁକ୍ତ କରାଯାଇଛି ।

ମଧ୍ୟପ୍ରଦେଶରେ ପ୍ରତିଶ୍ରୁତି ବର୍ଷା

ଏଥି ସହିତ ରାଜ୍ୟ ସଭାପତି କମଲ ନାଥ କ୍ରମାଗତ ଭାବରେ ବୈଠକ କରୁଛନ୍ତି । ସେମାନେ ନିଜେ ବିଭିନ୍ନ ସ୍ଥାନରେ ପହଞ୍ଚି କର୍ମୀ ମାନଙ୍କ ସହିତ ଯୋଗାଯୋଗ କରୁଛନ୍ତି । କାର୍ଯ୍ୟକ୍ରମରେ କମଲ ନାଥ ତାଙ୍କର ପ୍ରତିଶୃତି ନେଇ ଘୋଷଣା କରିବା ଆରମ୍ଭ କରି ଦେଇଛନ୍ତି । ଶସ୍ତା ବିଦ୍ୟୁତ୍, ସିଲିଣ୍ଡର 500 ଟଙ୍କା, ପୁରୁଣା ପେନସନ୍ ଏବଂ ଋଣ ଛାଡ ଏବଂ ଓବିସି (ଅନ୍ୟାନ୍ୟ ପଛୁଆ ଶ୍ରେଣୀ) ପାଇଁ 27 ପ୍ରତିଶତ ସଂରକ୍ଷଣ ଭଳି ପ୍ରତିଶ୍ରୁତି ଦେଇଛନ୍ତି । କଂଗ୍ରେସ କ୍ରମାଗତ ଭାବରେ ବିଜେପି ସରକାରକୁ ଘେରି ରହିଛି ।

2018 ତୁଳନାରେ ମଧ୍ୟପ୍ରଦେଶ କଂଗ୍ରେସ ଏଥର ଏକଜୁଟ୍ ଥିବା ମନେ ହେଉଛି । ଗତ ନିର୍ବାଚନରେ ସିନ୍ଧିଆ ଏବଂ କମଲ ନାଥଙ୍କ ମଧ୍ୟରେ ଅନେକ ଥର ପାର୍ଥକ୍ୟ ଦେଖାଯାଇଥିଲା । ଯାହାର ଫଳାଫଳ - ରାଜ୍ୟରେ କଂଗ୍ରେସ ସରକାର ଭାଙ୍ଗିଗଲା ।

ଏଥର ଉଭୟ ଭେଟେରାନ କଂଗ୍ରେସ ନେତା କମଲ ନାଥ ଏବଂ ଦିଗବିଜୟଙ୍କୁ ଏକାଠି ଦେଖିବାକୁ ମିଳିଛି । ଦଳ ମଧ୍ୟ ଚାହୁଁଛି ଯେ ସେମାନଙ୍କ ଏକତାର ବାର୍ତ୍ତା ଜନସାଧାରଣଙ୍କ ମଧ୍ୟରେ ଯିବା ଉଚିତ୍ । କଂଗ୍ରେସ ଏକ ସ୍ୱତନ୍ତ୍ର ଅଭିଯାନ ଚଳାଉଛି । ଜିଲ୍ଲା ତଥା ବ୍ଲକ ସ୍ତରରେ ଘର ଘର ବୁଲି ଲୋକମାନଙ୍କୁ ତାଙ୍କ ଯୋଜନା ବିଷୟରେ ସୂଚନା ଦେଉଛନ୍ତି ।

2 ମାସ ଆଗରୁ ହେବ ପ୍ରାର୍ଥୀ ଘୋଷଣା

ଅନ୍ୟପକ୍ଷରେ ଏଥର କଂଗ୍ରେସ ଦଳ ଅଧିକାଂଶ ପ୍ରାର୍ଥୀଙ୍କୁ ଦୁଇ ମାସ ପୂର୍ବରୁ ଘୋଷଣା କରିବ । ଯେଉଁଥିପାଇଁ ପ୍ରାର୍ଥୀମାନେ ତୃଣମୂଳ ସ୍ତରରେ କାର୍ଯ୍ୟ ଏବଂ ପ୍ରଚାର ପାଇଁ ପର୍ଯ୍ୟାପ୍ତ ସମୟ ପାଇବେ । କେବଳ ଏତିକି ନୁହେଁ, କିଛି ନେତାଙ୍କୁ ଟିକେଟ୍ ନ ମିଳଇଲେ ସେମାନେ ବିଦ୍ରୋହ କରିପାରନ୍ତି । ଦଳ ସେମାନଙ୍କୁ ମନାଇବା ପାଇଁ ମଧ୍ୟ ସମୟ ପାଇବ ।

ସୂଚନାନୁସାରେ, ମଧ୍ୟପ୍ରଦେଶର ପ୍ରମୁଖ ସ୍ଥାନୀୟ ପ୍ରସଙ୍ଗରେ କଂଗ୍ରେସ ହାଇକମାଣ୍ଡ ମଧ୍ୟପ୍ରଦେଶ କଂଗ୍ରେସରୁ ସୂଚନା ମାଗିଛନ୍ତି । କର୍ଣ୍ଣାଟକ ବିଧାନସଭା ନିର୍ବାଚନରେ ମଧ୍ୟ ଜାତୀୟ ସ୍ତରର ପ୍ରସଙ୍ଗ ଅପେକ୍ଷା କଂଗ୍ରେସ ସ୍ଥାନୀୟ ପ୍ରସଙ୍ଗକୁ ଅଧିକ ଗୁରୁତ୍ୱ ଦେଇଥିଲା । ସେହିଭଳି ମଧ୍ୟପ୍ରଦେଶରେ ମନ୍ତ୍ରୀଙ୍କ ଦୁର୍ନୀତି, ବିଧାୟକଙ୍କ ଦ୍ୱାରା କରାଯାଇଥିବା ଅନିୟମିତତା ସମ୍ପର୍କରେ ସୂଚନା ହାଇକମାଣ୍ଡଙ୍କୁ ହସ୍ତାନ୍ତର କରାଯାଇଛି । ଏହି ବୈଠକରେ ମଧ୍ୟପ୍ରଦେଶ ବିଧାନସଭା ନିର୍ବାଚନ ପାଇଁ ପ୍ରତିଶ୍ରୁତି ନୋଟ୍ ମଧ୍ୟ ହାଇକମାଣ୍ଡଙ୍କ ଆଗରେ ରଖାଯାଇଥିଲା । ଏଥିରେ ମୁଖ୍ୟତଃ ନାରୀ ସମ୍ମାନ ଯୋଜନା, 500 ଟଙ୍କାରେ ଏଲପିଜି ସିଲିଣ୍ଡର, ପୁରୁଣା ପେନସନ୍ ଯୋଜନା ଲାଗୁ, ଓବିସି ସଂରକ୍ଷଣ ଭଳି ବଡ଼ ପ୍ରସଙ୍ଗ ରହିଛି ।

ମଧ୍ୟପ୍ରଦେଶର ଦାୟିତ୍ୱରେ କର୍ଣ୍ଣାଟକ ବିଜୟର ମାଷ୍ଟରମାଇଣ୍ଡ

କର୍ଣ୍ଣାଟକ ବିଧାନସଭା ନିର୍ବାଚନରେ କଂଗ୍ରେସର ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିବା ନିର୍ବାଚନ ରଣନୀତିଜ୍ଞ ସୁନୀଲ କାନୁଗୁଲୁଙ୍କୁ ମଧ୍ୟପ୍ରଦେଶ ଦାୟିତ୍ୱ ମଧ୍ୟ ଦିଆଯାଇଛି । ସୁନୀଲଙ୍କୁ କଂଗ୍ରେସର 'ପ୍ରଶାନ୍ତ କିଶୋର' ମଧ୍ୟ କୁହାଯାଏ । ରାହୁଲ ଗାନ୍ଧୀଙ୍କ ଭାରତ ଯୋଡା ଯାତ୍ରାରେ ମଧ୍ୟ ସୁନୀଲ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ।

କୁହାଯାଏ ଯେ 2024 ଲୋକସଭାର ସମ୍ପୂର୍ଣ୍ଣ ଦାୟିତ୍ୱ ସୁନୀଲଙ୍କ ଦଳ ଉପରେ ରହିଛି । 40 ବର୍ଷର ସୁନୀଲ କର୍ଣ୍ଣାଟକର ବେଲାରୀ ଜିଲ୍ଲାର । ଏହା ପୂର୍ବରୁ ପି.କେ ସହିତ କାମ କରିଛନ୍ତି ସୁନୀଲ ମାଇଣ୍ଡଶେୟାର ଆନାଲିଟିକ୍ସ ନାମକ ଏକ ଫାର୍ମ ଚଳାଉଛନ୍ତି । କର୍ଣ୍ଣାଟକରେ 40% ସରକାର ଥିବା ପେସିଏମ୍, QR କୋଡ୍ ଅଭିଯାନ ସୁନୀଲଙ୍କ ରଣନୀତିର ଏକ ଅଂଶ ଥିଲା । ବର୍ତ୍ତମାନ ସୁନୀଲ ମଧ୍ୟପ୍ରଦେଶ କଂଗ୍ରେସ ପାଇଁ କାମ କରୁଛନ୍ତି । ମଧ୍ୟପ୍ରଦେଶରେ ତାଙ୍କ ଝଲକ ଦେଖିବାକୁ ମିଳିବ ।

English summary

Congress Preparing For Madhya Pradesh Assembly Election, Party To Get 150 Seats