ମହିଳା କୁସ୍ତିଯୋଦ୍ଧାଙ୍କ ସମର୍ଥନରେ ଆସି ନିଜ ଦଳକୁ ଘେରିଲେ ବିଜେପି ସାଂସଦ ପ୍ରୀତମ ମୁଣ୍ଡେ

Published: Thursday, June 1, 2023, 16:19 [IST]

କୁସ୍ତି ଫେଡେରେଶନର ପୂର୍ବତନ ସଭାପତି ତଥା ବିଜେପି ସାସଂଦ ବ୍ରିଜ ଭୂଷଣ ଶରଣ ସିଂହଙ୍କ ବିରୋଧରେ ଯୌନ ଉତ୍ପୀଡ଼ନ ଅଭିଯୋଗ କରି ମହିଳା କୁସ୍ତିଯୋଦ୍ଧାମାନେ ଏକ ମାସରୁ ଅଧିକ ସମୟ ଧରି ଧର୍ମଘଟ କରି ଆସୁଛନ୍ତି । ଏଭଳି ପରିସ୍ଥିତିରେ ବର୍ତ୍ତମାନ ବିଜେପି ମହିଳା ସାଂସଦ ପ୍ରୀତମ ମୁଣ୍ଡେ ମଧ୍ୟ କୁସ୍ତିଯୋଦ୍ଧାଙ୍କ ସମର୍ଥନରେ ଆସିଛନ୍ତି । ଏହି ପ୍ରସଙ୍ଗରେ ହସ୍ତକ୍ଷେପ କରିବାକୁ ସେ ସରକାରଙ୍କୁ ଅପିଲ୍ କରିଛନ୍ତି ।

ମହିଳା କୁସ୍ତିଯୋଦ୍ଧାଙ୍କ ବିରୋଧ ପ୍ରସଙ୍ଗ ସେତେବେଳେ ଆହୁରି ତୀବ୍ର ହେବାରେ ଲାଗିଲା ଯେତେବେଳେ ମେ 28 ରେ, ଜନ୍ତର ମନ୍ତରରେ ନୂତନ ସଂସଦ ଗୃହ ଆଡକୁ ଯାଉଥିବା କୁସ୍ତିଯୋଦ୍ଧାମାନଙ୍କୁ ପୋଲିସ୍ ଘୋଷାରି ନେବା ସହ ସେମାନଙ୍କୁ ଗିରଫ କରିଥିଲା । ଏପରିକି ସେମାନଙ୍କ ନାଁ ରେ ମାମଲା ରୁଜୁ ହୋଇଥିଲା । ଯାହା ପରେ ସାରା ଦେଶରେ ଲୋକମାନେ ସରକାରଙ୍କ ଉପରେ କ୍ରୋଧ ପ୍ରକାଶ କରିବା ଆରମ୍ଭ କରିଥିଲେ । ଏହା ପରେ ବିଜେପି ସାଂସଦ ପ୍ରୀତମ ମୁଣ୍ଡେ ବର୍ତ୍ତମାନ ନିଜ ଦଳ ବିରୋଧରେ ଯାଇ ମହିଳା ରେସଲରଙ୍କୁ ସମର୍ଥନ ଦେଇଛନ୍ତି ।

ମହାରାଷ୍ଟ୍ରର ବିଡରୁ ବିଜେପି ସାଂସଦ ପ୍ରୀତମ ମୁଣ୍ଡେ କୁସ୍ତିଯୋଦ୍ଧାମାନଙ୍କୁ ସମର୍ଥନ ଜଣାଇ ସେମାନଙ୍କ ଅଭିଯୋଗର ସମାଧାନ କରିବାକୁ ଦାବି କରିଛନ୍ତି । ଗଣମାଧ୍ୟମ ସହ କଥାବାର୍ତ୍ତା କରି ବିଜେପି ସାଂସଦ କହିଛନ୍ତି ଯେ ମହିଳା କୁସ୍ତିଯୋଦ୍ଧାଙ୍କ ଧର୍ମଘଟକୁ ନେଇ ସରକାର ଯଥାଶୀଘ୍ର ହସ୍ତକ୍ଷେପ କରନ୍ତୁ । ଗଣତନ୍ତ୍ରରେ ଯଦି ତାଙ୍କ ସ୍ୱର ଶୁଣାଯାଏ ନାହିଁ, ତେବେ ଏହା ଚିନ୍ତାର ବିଷୟ ହେବ ବୋଲି କହିଛନ୍ତି ।

ମହାରାଷ୍ଟ୍ରର ବିଡ୍ ଲୋକସଭା ଆସନରୁ ସାଂସଦ ପ୍ରୀତମ ମୁଣ୍ଡେ ହେଉଛନ୍ତି ସ୍ୱର୍ଗତ ବିଜେପି ଭେଟେରାନ ଗୋପୀନାଥ ମୁଣ୍ଡେଙ୍କ ଝିଅ ଏବଂ ବିଜେପି ସାଂସଦ ପଙ୍କଜା ମୁଣ୍ଡେଙ୍କ ଭଉଣୀ । ବୃତ୍ତିରେ ପ୍ରୀତମ ମୁଣ୍ଡେ ଜଣେ ଡାକ୍ତର । ଏହା ସହିତ ସେ ମହାରାଷ୍ଟ୍ରରେ ସର୍ବାଧିକ ଭୋଟ୍ ପାଇ ଲୋକସଭା ନିର୍ବାଚନରେ ଜିତିବାର ରେକର୍ଡ ମଧ୍ୟ ରଖିଛନ୍ତି । ମହିଳାମାନଙ୍କ ମଧ୍ୟରେ ପ୍ରୀତମ୍ ମଧ୍ୟ ବହୁତ ଲୋକପ୍ରିୟ ।

Published On June 1, 2023