କଟକଣା କୋହଳ ସହ ଜୁଲାଇ ପହିଲା ଯାଏଁ ବଢିଲା ପ୍ରତିବନ୍ଧକ

ପଶ୍ଚିମବଙ୍ଗର ମମତା ସରକାର ରାଜ୍ୟରେ ପ୍ରତିବନ୍ଧକକୁ ଜୁଲାଇ ପହିଲା ପର୍ଯ୍ୟନ୍ତ ବୃଦ୍ଧି କରିଛନ୍ତି ଏବଂ ଏଥି ସହିତ ଅତ୍ୟାବଶ୍ୟକ ସେବା ଉପରେ କଟକଣା ଛାଡ଼ କରିଛନ୍ତି ।

Published: Monday, June 14, 2021, 17:22 [IST]

କୋଲକାତା : ସାରା ଦେଶରେ କରୋନା ମହାମାରୀ ଦ୍ୱିତୀୟ ଲହର ହ୍ରାସ ପାଉଥିବା ବେଳେ କେତେକ ରାଜ୍ୟ ଲଗାଇଥିବା ଲକଡାଇନ୍ କଟକଣା କୋହଳ କରି ଅନଲକ୍ ପ୍ରକ୍ରିୟା ଆରମ୍ଭ କରିଲେଣି । ଏହି ସମୟରେ ପଶ୍ଚିମବଙ୍ଗର ମମତା ସରକାର ରାଜ୍ୟରେ ପ୍ରତିବନ୍ଧକକୁ ଜୁଲାଇ ପହିଲା ପର୍ଯ୍ୟନ୍ତ ବୃଦ୍ଧି କରିଛନ୍ତି ଏବଂ ଏଥି ସହିତ ଅତ୍ୟାବଶ୍ୟକ ସେବା ଉପରେ କଟକଣା ଛାଡ଼ କରିଛନ୍ତି । ସୋମବାର ଏହି ନିର୍ଦ୍ଦେଶ ଜାରି କରିବାବେଳେ ବଙ୍ଗଳାର ମୁଖ୍ୟମନ୍ତ୍ରୀ ମମତା ବାନାର୍ଜୀ ନିମ୍ନଲିଖିତ ନିର୍ଦ୍ଦେଶ ଦେଇଛନ୍ତି ।

ବଙ୍ଗଳା ସରକାରଙ୍କ ନୂଆ ନିର୍ଦ୍ଦେଶ ଅନୁସାରେ ସମସ୍ତ ସରକାରୀ କାର୍ଯ୍ୟାଳୟ 25% କର୍ମଚାରୀଙ୍କ ସହିତ କାର୍ଯ୍ୟ କରିବ । ସେହିପରି 25% କର୍ମଚାରୀ ନେଇ ବେସରକାରୀ ଏବଂ କର୍ପୋରେଟ୍ ଅଫିସ୍ ସକାଳ 10 ଟାରୁ 4 ଟା ପର୍ଯ୍ୟନ୍ତ ଖୋଲା ରହିବ । ଏହା ବ୍ୟତୀତ ସପିଂ ମଲ୍ ଏବଂ କମ୍ପ୍ଲେକ୍ସ ଗୁଡ଼ିକୁ ସକାଳ 11 ଟାରୁ ରାତି 6 ଟା ପର୍ଯ୍ୟନ୍ତ 50 ପ୍ରତିଶତ କର୍ମଚାରୀଙ୍କ ସହ ଖୋଲିବାକୁ ଅନୁମତି ଦିଆଯାଇଛି । ଏହା ସହିତ ବିନା କୌଣସି ଦର୍ଶକରେ ଷ୍ଟାଡିୟମରେ ଖେଳ ଆୟୋଜନ ହୋଇପାରିବ ।

ଅପରପକ୍ଷରେ ସମସ୍ତ ଶିକ୍ଷାନୁଷ୍ଠାନକୁ ଖୋଲିବାକୁ ଅନୁମତି ମିଳିନାହିଁ । ଜରୁରୀକାଳୀନ ପରିସ୍ଥିତି ବ୍ୟତୀତ ଘରୋଇ ଯାନବାହାନ ଚଳାଚଳ ସ୍ଥଗିତ ରହିବ । ଏହା ସହିତ 'ଗୋଟିଏ ଦେଶ, ଗୋଟିଏ ରାସନ' ଯୋଜନା କାର୍ଯ୍ୟକାରୀ କରିବାରେ କୌଣସି ଅସୁବିଧା ନାହିଁ । ଏହା ପ୍ରକ୍ରିୟା ଜାରି ରହିବ ବୋଲି ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।

Published On June 14, 2021