70 କୋଟି ଅତିକ୍ରମ କଲା ଭାରତରେ କୋଭିଡ ଟୀକାକରଣ, 13 ଦିନରେ 10 କୋଟି ଡୋଜ ଟୀକାକରଣ

କରୋନା ଭାଇରସ ଟୀକାକରଣ ମାମଲାରେ ଭାରତ ଏକ ନୂଆ ରେକର୍ଡ ସୃଷ୍ଟି କରିଛି । ବର୍ତ୍ତମାନ ପର୍ଯ୍ୟନ୍ତ ଦେଶରେ 70 କୋଟି ଡୋଜ୍ ଟିକା ଦିଆଯାଇଛି ।

ନୂଆଦିଲ୍ଲୀ : କରୋନା ଭାଇରସ ଟୀକାକରଣ ମାମଲାରେ ଭାରତ ଏକ ନୂଆ ରେକର୍ଡ ସୃଷ୍ଟି କରିଛି । ବର୍ତ୍ତମାନ ପର୍ଯ୍ୟନ୍ତ ଦେଶରେ 70 କୋଟି ଡୋଜ୍ ଟିକା ଦିଆଯାଇଛି । ଗତ କିଛି ଦିନ ମଧ୍ୟରେ ଟୀକାକରଣର ଗତିକୁ ପ୍ରଶଂସା କରି ସ୍ୱାସ୍ଥ୍ୟ ମନ୍ତ୍ରଣାଳୟ ମଙ୍ଗଳବାର ଏହି ସୂଚନା ଦେଇଛି । ଏହି ନୂତନ ମାଇଲଖୁଣ୍ଟ ହାସଲ କରିଥିବାରୁ ସ୍ୱାସ୍ଥ୍ୟମନ୍ତ୍ରୀ ମାନସୁଖ ମାଣ୍ଡଭିୟ ଟ୍ୱିଟର ମାଧ୍ୟମରେ ସମସ୍ତ ସ୍ୱାସ୍ଥ୍ୟ କର୍ମୀଙ୍କୁ ଅଭିନନ୍ଦନ ଜଣାଇଛନ୍ତି । ସେ ଟ୍ୱିଟ୍ କରି କହିଛନ୍ତି ଯେ କରୋନା ଟୀକାକରଣ ପ୍ରସଙ୍ଗରେ ଆମେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ଏପର୍ଯ୍ୟନ୍ତ 70 କୋଟି ଡୋଜ ଟୀକାକରଣ କରିଛୁ । ଏହି ଗୁରୁତ୍ୱପୂର୍ଣ୍ଣ ସଫଳତା ପାଇଁ ସମସ୍ତ ସ୍ୱାସ୍ଥ୍ୟ କର୍ମୀ ଏବଂ ଲୋକଙ୍କୁ ଅଭିନନ୍ଦନ ।

ସୋମବାର ଦିନ ଭାରତରେ 1.13 କୋଟିରୁ ଅଧିକ ଡୋଜ ଦିଆଯାଇଥିଲା । ଗତ 11 ଦିନ ମଧ୍ୟରେ ଏହା ତୃତୀୟ ଥର ପାଇଁ ଭାରତ ଦିନକୁ 10 ମିଲିୟନରୁ ଅଧିକ ଡୋଜ ଟୀକାକରଣ ରେକର୍ଡ କରିଛି । ସୋମବାର ଦିନ 1 କୋଟି 13 ଲକ୍ଷ 53 ହଜାର 571 ଡୋଜ ଟୀକାକଣ ସହିତ ସୋମବାର ସକାଳ 7 ଟା ସୁଦ୍ଧା ଭାରତରେ ଟୀକାକରଣ 69.90 କୋଟିକୁ ବୃଦ୍ଧି ପାଇଛି । ଭାରତରେ ଟୀକାକରଣର ଗତି ଉପରେ ଆଲୋକପାତ କରି ମାଣ୍ଡଭିୟ କହିଛନ୍ତି ଯେ ଭାରତରେ ପ୍ରଥମ 10 କୋଟି ଡୋଜ 85 ଦିନରେ ଦିଆଯାଇଥିବାବେଳେ 20 କୋଟି ଛୁଇଁବାକୁ ଆମକୁ ଆହୁରି 45 ଦିନ ସମୟ ଲାଗିଛି । 30 କୋଟି ମାର୍କ ଛୁଇଁବାକୁ ଆମକୁ 29 ଦିନ ଲାଗିଲା । ସ୍ୱାସ୍ଥ୍ୟ ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ ଟୀକାକରଣର ଗତି କ୍ରମାଗତ ଭାବେ ବୃଦ୍ଧି କରିବାକୁ କେନ୍ଦ୍ର ସରକାର ପ୍ରତିବଦ୍ଧ । କେନ୍ଦ୍ର ଏବଂ ରାଜ୍ୟ /କେନ୍ଦ୍ର ଶାସିତ ଅଞ୍ଚଳର ନିରନ୍ତର ଏବଂ ସହଯୋଗୀ ପ୍ରୟାସ ହେତୁ କ୍ରମାଗତ 72 ଦିନ ପାଇଁ ଦୈନିକ କରୋନା ମାମଲା 50 ହଜାରରୁ କମ୍ ପଞ୍ଜିକୃତ ହୋଇଛି ।

ମାହାମାରୀ କରୋନା ଭାଇରସକୁ ନିୟନ୍ତ୍ରଣ କରିବା ପାଇଁ 16 ଜାନୁଆରୀରେ ଦେଶବ୍ୟାପୀ ଟୀକାକରଣ ଅଭିଯାନ ଆରମ୍ଭ ହୋଇଥିଲା । ପ୍ରଥମେ ଏହା ସ୍ୱାସ୍ଥ୍ୟ କର୍ମୀ ଏବଂ ଫ୍ରଣ୍ଟଲାଇନ କର୍ମଚାରୀଙ୍କ ପାଇଁ ଖୋଲା ଯାଇଥିଲା ଏବଂ ପରେ ଏହା ସମସ୍ତ ବୟସ୍କ ଏବଂ ଅସହାୟ ଲୋକଙ୍କ ପାଇଁ ବିସ୍ତାର କରାଯାଇଥିଲା ।

English summary

Vaccination Against Corona Virus In India Crosses 70 Crore Doses