ଗୁରୁତର ଅପରାଧ କହି ଆଶିଷ ମିଶ୍ରଙ୍କ ଜାମିନ ଆବେଦନକୁ ବିରୋଧ କଲେ ଉତ୍ତର ପ୍ରଦେଶ ସରକାର

ୟୁପି ସରକାର ଆଶିଷ ମିଶ୍ରଙ୍କ ଜାମିନକୁ ବିରୋଧ କରିଛନ୍ତି । ଏହା ଏକ ଗୁରୁତର ଅପରାଧ ଓ ଏଭଳି ପରପିସ୍ଥିତିରେ ଅଭିଯୁକ୍ତଙ୍କୁ ଜାମିନ ପ୍ରଦାନ କଲେ ଲୋକଙ୍କ ଉପରେ ଖରାପ ପ୍ରଭାବ ପଡ଼ିବ ବୋଲି କହିଛନ୍ତି ଉତ୍ତର ପ୍ରଦେଶ ସରକାର ।

Published: Thursday, January 19, 2023, 15:32 [IST]

ନୂଆଦିଲ୍ଲୀ: ଲକ୍ଷ୍ମୀପୁର ଖେରୀ ହିଂସା ମାମଲାରେ ଅଭିଯୁକ୍ତ ଆଶିଷ ମିଶ୍ରଙ୍କ ଜାମିନ ଆବେଦନକୁ ବିରୋଧ କରିଛନ୍ତି ଉତ୍ତର ପ୍ରଦେଶ ସରକାର । ଏହା ଏକ ଗୁରୁତର ଅପରାଧ ଓ ଏଭଳି ପରପିସ୍ଥିତିରେ ଅଭିଯୁକ୍ତଙ୍କୁ ଜାମିନ ପ୍ରଦାନ କଲେ ଲୋକଙ୍କ ଉପରେ ଖରାପ ପ୍ରଭାବ ପଡ଼ିବ ବୋଲି କହିଛନ୍ତି ଉତ୍ତର ପ୍ରଦେଶ ସରକାର ।

ଅଜୟ ମିଶ୍ରଙ୍କ ଜାମି ଆବେଦନ ଉପରେ ଆଜି ସୁପ୍ରିମକୋର୍ଟରେ ଶୁଣାଣି ହୋଇଥିଲା । ଏହି ସମୟରେ, ୟୁପି ସରକାର ଆଶିଷ ମିଶ୍ରଙ୍କ ଜାମିନକୁ ବିରୋଧ କରିଛନ୍ତି । ସରକାର କୋର୍ଟରେ କହିଛନ୍ତି ଯେ ଏହି ମାମଲାରେ ବିଚାର ପ୍ରକ୍ରିୟା ଆରମ୍ଭ ହୋଇଛି । ଅନ୍ୟ କେତେକ ଅଭିଯୁକ୍ତ ମଧ୍ୟ ଜେଲରେ ଅଛନ୍ତି ।

ଆଶିଷ ମିଶ୍ରଙ୍କ ଜାମିନ ଆବେଦନକୁ ବିରୋଧ କରୁଥିବା ଲୋକଙ୍କ ପକ୍ଷରୁ ବରିଷ୍ଠ ଆଡଭୋକେଟ୍ ଦୁଶ୍ୟନ୍ତ ଦୱେ କୋର୍ଟରେ ହାଜର ହୋଇଥିଲେ । ଦୁଶ୍ୟନ୍ତ ଏହା ମଧ୍ୟ କହିଛନ୍ତି ଯେ ଅଭିଯୁକ୍ତଙ୍କୁ ଜାମିନ ଦେବା ସମାଜକୁ ଭୁଲ ବାର୍ତ୍ତା ଦେବ । ତେବେ ସୁପ୍ରିମକୋର୍ଟ ଏହି ପ୍ରସଙ୍ଗରେ କଡା ଆଭିମୁଖ୍ୟ ଗ୍ରହଣ କରି କହିଛନ୍ତି ଯେ ଆମେ ମୂକ ଦର୍ଶକ ହୋଇ ବସି ରହିବା କି ? ଏହା ପରେ ଆଶିଷ ମିଶ୍ରଙ୍କ ଜାମିନ ଆବେଦନ ଉପରେ ସୁପ୍ରିମକୋର୍ଟ ତାଙ୍କ ନିଷ୍ପତ୍ତି ସଂରକ୍ଷିତ ରଖିଛନ୍ତି ।

ଅନ୍ୟପକ୍ଷରେ ଆଶିଷ ମିଶ୍ରଙ୍କ ଓକିଲ ମୁକୁଲ ରୋହତଗୀ କହିଛନ୍ତି ଯେ ଆଶିଷ ଗତ ଏକ ବର୍ଷ ଧରି ଜେଲରେ ଅଛନ୍ତି । ଥରେ ସେ ଜାମିନ ପାଇବା ପରେ ସୁପ୍ରିମକୋର୍ଟ ଏହି ଜାମିନକୁ ପ୍ରତ୍ୟାଖ୍ୟାନ କରିଥିଲେ । ଏହି ମାମଲାରେ 400 ରୁ ଅଧିକ ସାକ୍ଷୀ ଅଛନ୍ତି ଯାହାର ବିବୃତ୍ତି ଏପର୍ଯ୍ୟନ୍ତ ରେକର୍ଡ ହୋଇ ନାହିଁ । ଏଭଳି କ୍ଷେତ୍ରରେ ବିଚାର ପାଞ୍ଚ ବର୍ଷ ପର୍ଯ୍ୟନ୍ତ ଚାଲିବ, ତେବେ ମୋର ମହକିଲଙ୍କ ସହ କ'ଣ ହେବ ? ଦ୍ୱିତୀୟ ଏଫ୍ଆଇଆରରେ ହୋଇଥିବା ଅଭିଯୋଗ ଅତ୍ୟଧିକ ହୋଇଛି ଏବଂ ଏ ପର୍ଯ୍ୟନ୍ତ କୌଣସି ପ୍ରତ୍ୟକ୍ଷଦର୍ଶୀ ଆଗକୁ ଆସିନାହାଁନ୍ତି ।

ଏହି ମାମଲାରେ ୟୁପି ସରକାରଙ୍କ ଅତିରିକ୍ତ ଆଡଭୋକେଟ୍ ଜେନେରାଲ୍ ଗରିମା ପ୍ରସାଦ ଜଷ୍ଟିସ୍ ସୂର୍ଯ୍ୟକାନ୍ତ ଏବଂ ଜଷ୍ଟିସ୍ ଜେ.କେ ମହେଶ୍ୱରୀଙ୍କ ବେଞ୍ଚକୁ କହିଛନ୍ତି ଯେ ଏହି 4 ଅଭିଯୁକ୍ତଙ୍କ ଜାମିନ ଶୁଣାଣି ଟ୍ରାଏଲ କୋର୍ଟରେ ଚାଲିଛି । ଆଶିଷ ମିଶ୍ରଙ୍କୁ ଜାମିନରେ ମୁକ୍ତ କରାଯିବା ଉଚିତ ନୁହେଁ ବୋଲି କହିଛନ୍ତି । ଏହା ଉପରେ ଜଷ୍ଟିସ ସୂର୍ଯ୍ୟକାନ୍ତ ପ୍ରଶ୍ନ କରିଛନ୍ତି ଯେ ଜାମିନ ବିରୋଧ ପଛରେ ଆପଣଙ୍କ ଆଶଙ୍କା କ'ଣ ? ଏହା ଉପରେ ୟୁପି ସରକାରଙ୍କ ଓକିଲ କହିଛନ୍ତି ଯେ ଅପରାଧ ଏକ ଗୁରୁତର ବର୍ଗର ଏବଂ ଅଭିଯୁକ୍ତଙ୍କୁ ଜାମିନ ପ୍ରଦାନ କରିବା ସମାଜକୁ ଭୁଲ ବାର୍ତ୍ତା ଦେବ ।

ଉଲ୍ଲେଖଯୋଗ୍ୟ, 3 ଅକ୍ଟୋବର 2021 ରେ ଲକ୍ଷ୍ମୀପୁର ଖେରୀରେ କୃଷକଙ୍କ ଉପରେ ଗାଡ଼ି ଚଢାଇ ହତ୍ୟା କରିଥିବା ନେଇ ଅଭିଯୋଗ ହୋଇଥିଲା । ଅଭିଯୋଗ ହୋଇଛି ଯେ କେନ୍ଦ୍ର ମନ୍ତ୍ରୀ ଅଜୟ ମିଶ୍ର ଟେନିଙ୍କ ପୁଅ ଆଶିଷ ମିଶ୍ର ଟିକୋନିଆରେ ବିରୋଧୀ ଚାଷୀଙ୍କ ଉପରେ ଜିପ୍ ଚଢାଇଦେଇଥିଲେ । ଏହି ହିଂସା ଆରମ୍ଭ ହେବା ପରେ ଚାରି ଜଣ କୃଷକଙ୍କ ସମେତ ମୋଟ ଆଠ ଜଣଙ୍କର ମୃତ୍ୟୁ ହୋଇଥିଲା । ଏହି ମାମଲାରେ ଅଭିଯୁକ୍ତ ଆଶିଷ ମିଶ୍ର ଜେଲରେ ଅଛନ୍ତି ।

Published On January 19, 2023