ଜାମ୍ମୁ କାଶ୍ମୀର : ଶ୍ରୀନଗରର ରାମବାଗରେ ଏନକାଉଣ୍ଟର, ସୁରକ୍ଷା ବାହିନୀ ଗୁଳିରେ ଟଳିଲେ ତିନି ଆତଙ୍କବାଦୀ

ଜାମ୍ମୁ କାଶ୍ମୀରରେ ଶ୍ରୀନଗରରେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଏକ ଏନକାଉଣ୍ଟର ହୋଇଛି । ପୋଲିସ ଏବଂ ସୁରକ୍ଷା ବାହିନୀର ମିଳିତ ଅପରେସନରେ ତିନି ଜଣ ଆତଙ୍କବାଦୀ ନିହତ ହୋଇଛନ୍ତି ।

ଶ୍ରୀନଗର : ଜାମ୍ମୁ କାଶ୍ମୀରରେ ଶ୍ରୀନଗରରେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଏକ ଏନକାଉଣ୍ଟର ହୋଇଛି । ପୋଲିସ ଏବଂ ସୁରକ୍ଷା ବାହିନୀର ମିଳିତ ଅପରେସନରେ ତିନି ଜଣ ଆତଙ୍କବାଦୀ ନିହତ ହୋଇଛନ୍ତି । ଜାମ୍ମୁ କାଶ୍ମୀର ପୋଲିସ କହିଛି ଯେ ଏହି ଏନକାଉଣ୍ଟର ଶ୍ରୀନଗରର ରାମବାଗ ଅଞ୍ଚଳରେ ହୋଇଛି । ଯେଉଁଥିରେ ତିନି ଜଣ ଆତଙ୍କବାଦୀ ନିହତ ହୋଇଥିବା ରାଜ୍ୟ ପୋଲିସ ଦାବି କରିଛି ।

ସୂଚନା ଅନୁଯାୟୀ, ବୁଧବାର ଅପରାହ୍ନରେ ରାମବାଗ ଅଞ୍ଚଳରେ ଆତଙ୍କବାଦୀଙ୍କ ଉପସ୍ଥିତି ସମ୍ପର୍କରେ ସୂଚନା ପାଇବା ପରେ ପୋଲିସ, CRPF କର୍ମଚାରୀଙ୍କ ସହ ସର୍ଚ୍ଚ ଅପରେସନ ଆରମ୍ଭ କରିଥିଲା । ସୁରକ୍ଷା ବାହିନୀ ଆତଙ୍କବାଦୀଙ୍କ ନିକଟକୁ ଯିବା ମାତ୍ରେ ଆତଙ୍କବାଦୀମାନେ ସୈନିକମାନଙ୍କ ଉପରକୁ ଗୁଳି ଚଳାଇବା ଆରମ୍ଭ କରିଥିଲେ । ଏହାର ପାଲଟା ଜବାବରେ ସୁରକ୍ଷା କର୍ମୀ ଗୁଳି ଚଳାଇଥିଲେ । ଉଭୟ ପାର୍ଶ୍ୱରୁ ଗୁଳି ବିନିମୟ ହୋଇଥିଲା, ଯେଉଁଥିରେ ତିନି ଜଣ ଆତଙ୍କବାଦୀ ନିହତ ହୋଇଥିଲେ ।

ସୂଚନାଯୋଗ୍ୟ, ଗତ ସପ୍ତାହରେ, ବୁଧବାର ଦିନ ଜାମ୍ମୁ କାଶ୍ମୀରର କୁଲଗାମ ଜିଲ୍ଲାରେ ଦୁଇଟି ଏନକାଉଣ୍ଟର ହୋଇଥିଲା । ଏହି ଏନକାଉଣ୍ଟରରେ ସୁରକ୍ଷା ବାହିନୀ 5 ଆତଙ୍କବାଦୀଙ୍କୁ ନିହତ କରିଥିବା ଦାବି କରିଛି । ଆଇଜିପି କାଶ୍ମୀର ବିଜୟ କୁମାର କହିଥିଲେ ଯେ କୁଲଗାମ ଜିଲ୍ଲାର ପୋମ୍ବାଇ ଏବଂ ଗୋପାଳପୋରା ଗ୍ରାମରେ ଏହି ଏନକାଉଣ୍ଟର ହୋଇଥିଲା ଯେଉଁଥିରେ 5 ଜଣ ଆତଙ୍କବାଦୀ ନିହତ ହୋଇଛନ୍ତି । ସେହି ଦିନ ପୁଲୱାମା ପୋଲିସ ଏବଂ ସୁରକ୍ଷା ବାହିନୀର ମିଳିତ ଟିମ୍ ଲଶ୍କର ଆତଙ୍କବାଦୀଙ୍କୁ ସମର୍ଥନ କରିବା ଅଭିଯୋଗରେ ଆମୀର ବଶୀର ଏବଂ ମୁଖତାର ଭଟଙ୍କୁ ଗିରଫ କରିଥିଲା ।

English summary

Three Terrorist Gun downed In Srinagar Rambagh Area of Jammu And Kashmir