ମେଟ୍ରୋ ଏବଂ ଡାକ୍ତରଖାନାକୁ ବିଦ୍ୟୁତ୍ ଯୋଗାଣରେ ଦେଖାଦେଇଛି ସଙ୍କଟ, କେନ୍ଦ୍ରକୁ ଚିଠି ଲେଖିଲେ ସତ୍ୟେନ୍ଦ୍ର ଜୈନ୍

ଆଗାମୀ ଦିନରେ ଦିଲ୍ଲୀ ମେଟ୍ରୋ, ଡାକ୍ତରଖାନା ଏବଂ ଅନ୍ୟାନ୍ୟ ଜରୁରୀ ସେବାକୁ 24 ଘଣ୍ଟିଆ ବିଦ୍ୟୁତ୍ ଯୋଗାଣରେ ସମସ୍ୟା ହୋଇପାରେ ବୋଲି ଦିଲ୍ଲୀ ସରକାର କହିଛନ୍ତି ।

Published: Friday, April 29, 2022, 10:56 [IST]

ନୂଆଦିଲ୍ଲୀ : ରାଜଧାନୀ ଦିଲ୍ଲୀରେ ବିଦ୍ୟୁତ ସଙ୍କଟ ବଢିପାରେ । ଗୁରୁବାର ଦିନ ଦିଲ୍ଲୀ ସରକାର କହିଛନ୍ତି ଯେ ଦାଦ୍ରି-ନ୍ୟାସନାଲ କ୍ୟାପିଟାଲ ପାୱାର ଷ୍ଟେସନ ଏବଂ ଫିରୋଜ ଗାନ୍ଧୀ ଉଞ୍ଚାହାର ଥର୍ମାଲ ପାୱାର ପ୍ଲାଣ୍ଟରୁ ବିଦ୍ୟୁତ ଯୋଗାଣ ବ୍ୟାହତ ହେଉଛି । ଏହି କାରଣରୁ, ଜରୁରୀକାଳୀନ ସେବାକୁ ନିରବଚ୍ଛିନ୍ନ ବିଦ୍ୟୁତ୍ ଯୋଗାଣ ଏକ ସମସ୍ୟା ହୋଇଗଲାଣି ।

ଆଗାମୀ ଦିନରେ ଦିଲ୍ଲୀ ମେଟ୍ରୋ, ଡାକ୍ତରଖାନା ଏବଂ ଅନ୍ୟାନ୍ୟ ଜରୁରୀ ସେବାକୁ 24 ଘଣ୍ଟିଆ ବିଦ୍ୟୁତ୍ ଯୋଗାଣରେ ସମସ୍ୟା ହୋଇପାରେ ବୋଲି ଦିଲ୍ଲୀ ସରକାର କହିଛନ୍ତି । ଦିଲ୍ଲୀ ଶକ୍ତି ମନ୍ତ୍ରୀ ସତ୍ୟେନ୍ଦ୍ର ଜୈନ ମଧ୍ୟ ଏ ସମ୍ପର୍କରେ କେନ୍ଦ୍ର ସରକାରଙ୍କୁ ଏକ ଚିଠି ଲେଖିଛନ୍ତି । ଏହି ପ୍ରସଙ୍ଗରେ ସମୀକ୍ଷା ବୈଠକ ଡକାଇବାକୁ ଏବଂ ପର୍ଯ୍ୟାପ୍ତ କୋଇଲା ଯୋଗାଣ ନିଶ୍ଚିତ କରିବାକୁ ଜୈନ କେନ୍ଦ୍ରକୁ କହିଛନ୍ତି ।

କେବଳ ଦିଲ୍ଲୀରେ ନୁହେଁ ଦେଶର ଅନେକ ରାଜ୍ୟରେ ବିଦ୍ୟୁତ୍ ସଙ୍କଟ ଆହୁରି ଗଭୀର ହେବାର ଆଶଙ୍କା ବୃଦ୍ଧି ପାଇଛି । ଉତ୍ତାପ ଏବଂ କୋଇଲା ଅଭାବ ହେତୁ ଦେଶର ଅନେକ ରାଜ୍ୟରେ ବିଦ୍ୟୁତ୍ ସଙ୍କଟ ଦେଖାଦେଇଛି । ବିଦ୍ୟୁତ୍ ଉତ୍ପାଦନ କେନ୍ଦ୍ରରେ ସ୍ୱଳ୍ପ ଉତ୍ପାଦନ ମଧ୍ୟରେ ବିପୁଳ ଚାହିଦା ପୂରଣ କରିବାକୁ ରାଜ୍ୟମାନେ ସଂଘର୍ଷ କରୁଛନ୍ତି । ଦେଶରେ ମୋଟ ବିଦ୍ୟୁତ୍ ଅଭାବ 623 ନିୟୁତ ୟୁନିଟରେ ପହଞ୍ଚିଛି । କୋଇଲା ଅଭାବ ଏହା ପଛର କାରଣ ବୋଲି ଜଣାପଡିଛି । ଦେଶର ପାୱାର ପ୍ଲାଣ୍ଟରେ କୋଇଲା ଭଣ୍ଡାର ନଅ ବର୍ଷ ମଧ୍ୟରେ ସର୍ବନିମ୍ନ ସ୍ତରରେ ରହିଛି ।

Published On April 29, 2022