ବିମୁଦ୍ରୀକରଣ ନିଷ୍ପତ୍ତିକୁ ସୁପ୍ରିମକୋର୍ଟଙ୍କ କ୍ଲିନଚିଟ୍, 5 ପଏଣ୍ଟରେ ଜାଣନ୍ତୁ କୋର୍ଟଙ୍କ ରାୟ

କେନ୍ଦ୍ରର ନରେନ୍ଦ୍ର ମୋଦୀ ସରକାର 8 ନଭେମ୍ବର 2016 ରେ ନେଇଥିବା ବିମୁଦ୍ରୀକରଣ ନିଷ୍ପତ୍ତି ସପକ୍ଷରେ ରାୟ ଦେଇଛନ୍ତି ସର୍ବୋଚ୍ଚ ନ୍ୟାୟାଳୟ ।

Published: Monday, January 2, 2023, 13:33 [IST]

ନୂଆଦିଲ୍ଲୀ: କେନ୍ଦ୍ରର ନରେନ୍ଦ୍ର ମୋଦୀ ସରକାର 8 ନଭେମ୍ବର 2016 ରେ ନେଇଥିବା ବିମୁଦ୍ରୀକରଣ ନିଷ୍ପତ୍ତି ସପକ୍ଷରେ ରାୟ ଦେଇଛନ୍ତି ସର୍ବୋଚ୍ଚ ନ୍ୟାୟାଳୟ । ସୁପ୍ରିମକୋର୍ଟର ସମ୍ବିଧାନ ବେଞ୍ଚ କେବଳ 1000 ଏବଂ 500 ଟଙ୍କା ନୋଟବନ୍ଦୀ କରିବାକୁ ସରକାରଙ୍କ ନିଷ୍ପତ୍ତିକୁ ସମର୍ଥନ କରିନାହିଁ, ବରଂ ଏହା ବିରୋଧରେ ଦାଖଲ ହୋଇଥିବା 58 ଟି ଆବେଦନକୁ ମଧ୍ୟ ଖାରଜ କରିଦେଇଛି । ସୁପ୍ରିମକୋର୍ଟର ଏକ ପାଞ୍ଚ ଜଣିଆ ସମ୍ବିଧାନ ବେଞ୍ଚ ଏହି ନିଷ୍ପତ୍ତି ସପକ୍ଷରେ ରାୟ ଦେଇଛନ୍ତି । କେନ୍ଦ୍ରର ନିଷ୍ପତ୍ତିକୁ ବେଞ୍ଚର ସଂଖ୍ୟା ଗରିଷ୍ଠତା ସମର୍ଥନ ମିଳିଛି । ଏହା ପରେ 6 ବର୍ଷ ଧରି ବିମୁଦ୍ରୀକରଣକୁ ନେଇ ଦେଶରେ ଉଠିଥିବା ବିବାଦ ମଧ୍ୟ ଶେଷ ହୋଇଛି । ଏହି ଶୁଣାଣି ସମୟରେ ସୁପ୍ରିମକୋର୍ଟ ଦେଇଥିବା ରାୟକୁ ଆସନ୍ତୁ 5 ଟି ପଏଣ୍ଟରେ ବୁଝିବା ।

ଆରବିଆଇ ନିୟମ ଅନୁସାରେ ଏହା ବୈଧ

ଆବେଦନକାରୀଙ୍କ ବିବାଦକୁ ପ୍ରତ୍ୟାଖ୍ୟାନ କରି ସୁପ୍ରିମକୋର୍ଟ କହିଛନ୍ତି ଯେ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ଆକ୍ଟର ଧାରା 26 ରେ 'ଯେକୌଣସି' ଶବ୍ଦକୁ ପ୍ରତିବନ୍ଧକମୂଳକ ଅର୍ଥ ଦିଆଯାଇପାରିବ ନାହିଁ । ଏହା ଆବେଦନକାରୀଙ୍କ ଯାଚିକା ସହ ଜଡିତ ଯେ ସମସ୍ତ ମୁଦ୍ରା ବାତିଲ ହୋଇପାରିବ ନାହିଁ, କାରଣ ଆରବିଆଇ ଆକ୍ଟର ଧାରା 26 "ଯେକୌଣସି" ଶବ୍ଦ ବ୍ୟବହାର କରାଯାଇଛି ।

କେନ୍ଦ୍ରରୁ ପ୍ରସ୍ତାବ ଆସିବା ଭୁଲ୍ ନୁହଁ

ବିମୁଦ୍ରୀକରଣକୁ ଉଚିତ୍ ଦର୍ଶାଇ ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ବିଷୟ ଦର୍ଶାଇଛନ୍ତି । ଏହି ପ୍ରସ୍ତାବ କେନ୍ଦ୍ରରୁ ଆସିଥିବାରୁ ନିଷ୍ପତ୍ତି ଗ୍ରହଣ ପ୍ରକ୍ରିୟା ଭୁଲ ବୋଲି କୁହାଯାଇପାରିବ ନାହିଁ ବୋଲି କହିଛନ୍ତି ସୁପ୍ରିମ କୋର୍ଟ । ଅଭିଯୋଗ କରାଯାଉଥିଲା ଯେ କେନ୍ଦ୍ର ସରକାର ଏହି ନିଷ୍ପତ୍ତି ମନଇଛା ନେଇଛନ୍ତି, କିନ୍ତୁ ଏଥିରେ ରିଜର୍ଭ ବ୍ୟାଙ୍କ ଆଗରେ ରହିବା ଉଚିତ୍ । ଅର୍ଥ, କେନ୍ଦ୍ର ସରକାର ଯାହା ନିଷ୍ପତ୍ତି ନେଲେ, ତାହା ସମ୍ପୂର୍ଣ୍ଣ ଅଧିକାର କ୍ଷେତ୍ର ଅଧୀନରେ ନେଇଛନ୍ତି ।

କେନ୍ଦ୍ରର ଉଦ୍ଦେଶ୍ୟ ଠିକ୍ ଥିଲା

ସୁପ୍ରିମକୋର୍ଟଙ୍କ ରାୟର ଏକ ବଡ଼ କଥା ହେଉଛି ଯେ, ସୁପ୍ରିମକୋର୍ଟ କହିଛନ୍ତି ଲକ୍ଷ୍ୟ ହାସଲ କରିବା ଦିଗରେ କେନ୍ଦ୍ରର ଏହି ନିଷ୍ପତ୍ତିର ଯୁକ୍ତିଯୁକ୍ତ ସମ୍ପର୍କ ଅଛି । ଏହା ଏହିପରି ସମସ୍ତ ଅଭିଯୋଗକୁ ହଟାଇ ଦେଇଛି ଯେ ଏହି ନିଷ୍ପତ୍ତିରେ କେନ୍ଦ୍ର ସରକାର ମନଇଚ୍ଛା କାର୍ଯ୍ୟ କରିଛନ୍ତି ଏବଂ ଏହାର ଏକ ନିର୍ଦ୍ଦିଷ୍ଟ ଉଦ୍ଦେଶ୍ୟ ନାହିଁ କିମ୍ବା ଏହା କେବେ ହାସଲ ହୋଇପାରିବ ନାହିଁ । ସରକାର ଗ୍ରହଣ କରିଥିବା ପଦକ୍ଷେପର ଉଦ୍ଦେଶ୍ୟ ସ୍ଥିର ଥିଲା ବୋଲି କୋର୍ଟ ନିଜ ରାୟରେ କହିଛନ୍ତି ।

ଆନୁପାତିକ ହିସାବରେ ଏହାକୁ ରଦ୍ଦ କରାଯାଇପାରିବ ନାହିଁ

ସୁପ୍ରିମକୋର୍ଟର ସମ୍ବିଧାନ ବେଞ୍ଚର ପାଞ୍ଚଜଣ ବିଚାରପତିଙ୍କ ମଧ୍ୟରୁ ଚାରିଜଣ କହିଛନ୍ତି ଯେ ଆନୁପାତିକତା ଆଧାରରେ ବିମୁଦ୍ରୀକରଣ ପ୍ରକ୍ରିୟା ରଦ୍ଦ ହୋଇପାରିବ ନାହିଁ । ଏହି ସାମ୍ମୁଖ୍ୟରେ ବିମୁଦ୍ରୀକରଣକୁ ବିରୋଧ କରୁଥିବା ଆବେଦନକାରୀଙ୍କୁ ବଡ଼ ଝଟକା ଲାଗିଛି । କାରଣ, ଏହି କ୍ଷେତ୍ରରେ, ବିମୁଦ୍ରୀକରଣ ପ୍ରକ୍ରିୟା ସମ୍ବନ୍ଧରେ ଆନୁପାତିକତାର ପ୍ରଶ୍ନ ସେମାନଙ୍କ ନିବେଦନଗୁଡିକର ଏକ ପ୍ରମୁଖ ଆଧାର ଥିଲା ।

ନୋଟ ବିନିମୟର ସମୟସୀମା ଅଯୌକ୍ତିକ ନୁହଁ

ସୁପ୍ରିମକୋର୍ଟ ତାଙ୍କ ନିଷ୍ପତ୍ତିରେ ଆଉ ଏକ ଗୁରୁତ୍ୱପୂର୍ଣ୍ଣ କଥା କହିଛନ୍ତି । ଆବେଦନକାରୀମାନେ ଯୁକ୍ତି ବାଢିଥିଲେ ଯେ ବିମୁଦ୍ରୀକରଣ ସମୟରେ 1000 ଏବଂ 500 ଟଙ୍କା ନୋଟ ବିନିମୟ ପାଇଁ ସରକାର ସ୍ଥିର କରିଥିବା 52 ଦିନର ସମୟ ସୀମା ଅଯୌକ୍ତିକ ଅଟେ । କିନ୍ତୁ, କୋର୍ଟ କହିଛନ୍ତି ଯେ ନୋଟ୍ ବିନିମୟ ପାଇଁ ଦିଆଯାଇଥିବା 52 ଦିନର ସମୟକୁ ଅଯୌକ୍ତିକ କୁହାଯାଇପାରିବ ନାହିଁ ।

ଉଲ୍ଲେଖଯୋଗ୍ୟ, 8ନଭେମ୍ବର 2016 ରାତି 8 ଟାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିମୁଦ୍ରୀକରଣ ଘୋଷଣା କରିଥିଲେ । ସେହି ସମୟରେ ଦେଶରେ ପ୍ରଚଳିତ 1000 ଏବଂ 500 ଟଙ୍କା ମୂଲ୍ୟର ନୋଟ ସେହି ଦିନ 12 ଟାରୁ ବନ୍ଦ ହୋଇଯାଇଥିଲା । ସରକାରଙ୍କ ଏହି ନିଷ୍ପତ୍ତି ପରେ ରାତାରାତି 10 ଲକ୍ଷ ଟଙ୍କା ମୂଲ୍ୟର ନୋଟ ପ୍ରତ୍ୟାହାର କରାଯାଇଥିଲା । ନୂତନ ମୁଦ୍ରା ସହିତ ନୋଟ୍ ବିନିମୟ ପାଇଁ ସାଧାରଣ ଜନତାଙ୍କୁ ପର୍ଯ୍ୟାପ୍ତ ସମୟ ଦିଆଯାଇଥିଲା । ଅବଶ୍ୟ, ଏହା ମଧ୍ୟ ଲୋକଙ୍କ ପାଇଁ ବହୁତ କଷ୍ଟ ଦେଇଥିଲା । କିନ୍ତୁ, ସାଧାରଣ ଅନୁଭବ ହେଉଛି ଯେ କଳା ଟଙ୍କା ହଟାଇବା ଏବଂ ଦୁର୍ନୀତିଗ୍ରସ୍ତଙ୍କ ଉପରେ ଆକ୍ରମଣ ପାଇଁ ଏହି ପଦକ୍ଷେପ ନିଆଯାଇଥିଲା । କିନ୍ତୁ, ବିରୋଧୀ ଦଳ ଏହି ନିଷ୍ପତ୍ତିକୁ ବିରୋଧ କରିଥିଲେ । କିନ୍ତୁ, ସୋମବାର ଅର୍ଥାତ୍ ଜାନୁୟାରୀ 2, 2023 ରେ ଜଷ୍ଟିସ୍ ଏସ୍ ନଜିରଙ୍କ ନେତୃତ୍ୱରେ ଦେଶର ସର୍ବୋଚ୍ଚ ନ୍ୟାୟାଳୟର ଏକ ପାଞ୍ଚ ଜଣିଆ ସମ୍ବିଧାନ ବେଞ୍ଚ କେନ୍ଦ୍ରର ନିଷ୍ପତ୍ତିକୁ ଆଇନଗତ ବୋଲି ଘୋଷଣା କରିଛି ।

Published On January 2, 2023