ପେଗାସସ୍ ଗୁପ୍ତଚର ମାମଲାର ତଦନ୍ତ ପାଇଁ ଅନୁମୋଦନ, ଆସନ୍ତା ସପ୍ତାହରୁ ଶୁଣାଣି କରିବେ ସୁପ୍ରିମକୋର୍ଟ

ପେଗାସସ୍ ସ୍ପାଏୱେୟାର ମାମଲାରେ କାର୍ଯ୍ୟରତ କିମ୍ବା ଅବସରପ୍ରାପ୍ତ ବିଚାରପତିଙ୍କ ଦ୍ୱାରା ଯାଞ୍ଚ ପାଇଁ ଏକ ଆବେଦନ ଉପରେ ଶୁଣାଣି କରିବାକୁ ସୁପ୍ରିମକୋର୍ଟ ସହମତି ପ୍ରକାଶ କରିଛନ୍ତି । ଆସନ୍ତା ସପ୍ତାହରୁ ସୁପ୍ରିମକୋର୍ଟରେ ଏହି ମାମଲାର ଶୁଣାଣି ଆରମ୍ଭ ହେବ ।

Published: Friday, July 30, 2021, 12:49 [IST]

ନୂଆଦିଲ୍ଲୀ : ସଂସଦ ଠାରୁ ଆରମ୍ଭ କରି ସାରା ଦେଶରେ ପେଗାସସ୍ ସ୍ପାଏୱେୟାର ବିବାଦକୁ ନେଇ ଚର୍ଚ୍ଚା ଜୋର ଧରିଛି । ଏହି ସମୟରେ ଗୁପ୍ତଚର ମାମଲାରେ ସୁପ୍ରିମକୋର୍ଟରୁ ବଡ ଖବର ଆସୁଛି । ମିଳିଥିବା ସୂଚନା ଅନୁଯାୟୀ, ପେଗାସସ୍ ସ୍ପାଏୱେୟାର ମାମଲାରେ କାର୍ଯ୍ୟରତ କିମ୍ବା ଅବସରପ୍ରାପ୍ତ ବିଚାରପତିଙ୍କ ଦ୍ୱାରା ଯାଞ୍ଚ ପାଇଁ ଏକ ଆବେଦନ ଉପରେ ଶୁଣାଣି କରିବାକୁ ସୁପ୍ରିମକୋର୍ଟ ସହମତି ପ୍ରକାଶ କରିଛନ୍ତି । ଆସନ୍ତା ସପ୍ତାହରୁ ସୁପ୍ରିମକୋର୍ଟରେ ଏହି ମାମଲାର ଶୁଣାଣି ଆରମ୍ଭ ହେବ ।

ଆପଣଙ୍କୁ କହିରଖୁଛୁ ଯେ ପେଗାସସ୍ ଗୁପ୍ତଚର ମାମଲାର ଯାଞ୍ଚ ପାଇଁ ପ୍ରଧାନ ବିଚାରପତି ଏନ.ଭି ରମନାଙ୍କ ନେତୃତ୍ୱରେ ଏକ ବେଞ୍ଚ ଆଗରେ କଂଗ୍ରେସ ନେତା ତଥା ବରିଷ୍ଠ ଓକିଲ କପିଲ ସିବଲ ଶୁକ୍ରବାର ଦିନ ଯୁକ୍ତି ବାଢିଛନ୍ତି । କପିଲ ସିବଲଙ୍କ ଯୁକ୍ତି ଶୁଣି ବେଞ୍ଚ କହିଛନ୍ତି ଯେ ଗୁପ୍ତଚର କାର୍ଯ୍ୟର ବୃହତ ପ୍ରଭାବକୁ ଦୃଷ୍ଟିରେ ରଖି ଶୁଣାଣି ଜରୁରୀ । ବରିଷ୍ଠ ସାମ୍ବାଦିକ ଏନ ରାମଙ୍କ ଦ୍ୱାରା ସୁପ୍ରିମକୋର୍ଟରେ ପେଗାସସ୍ ଗୁପ୍ତଚର ମାମଲାର ଯାଞ୍ଚ ପାଇଁ ଆବେଦନ କରାଯାଇଥିଲା । ଏହାକୁ ଗ୍ରହଣ କରି ପ୍ରଧାନ ବିଚାରପତି କହିଛନ୍ତି ଯେ ଆସନ୍ତା ସପ୍ତାହରୁ ସେ ଏହି ମାମଲାର ଶୁଣାଣି କରିବେ ।

ସୂଚନାଯୋଗ୍ୟ ଯେ ସମଗ୍ର ବିଶ୍ୱରେ ଗଣମାଧ୍ୟମ ସଂଗଠନ ଦ୍ୱାରା କରାଯାଇଥିବା ଅନୁସନ୍ଧାନରେ ଏହା ଜଣାପଡିଛି ଯେ ଇସ୍ରାଏଲର ଗୁପ୍ତଚର ପେଗାସସ୍ ଦେଶର ବିଶିଷ୍ଟ ନାଗରିକ, ରାଜନେତା ଏବଂ ସାମ୍ବାଦିକଙ୍କ ଉପରେ ଗୁପ୍ତଚର କାର୍ଯ୍ୟ କରୁଛି । ଭାରତରେ ସରକାରୀ ଏଜେନ୍ସି ଦ୍ୱାରା ଗୁପ୍ତଚର ପାଇଁ ପେଗାସସ୍ ବ୍ୟବହାର କରାଯାଉଥିବା ଜଣାଯାଇଛି । ଏହି ମାମଲାରେ ଆବେଦନକାରୀ ଏନ ରାମ ସୁପ୍ରିମକୋର୍ଟର କାର୍ଯ୍ୟରତ କିମ୍ବା ଅବସରପ୍ରାପ୍ତ ବିଚାରପତିଙ୍କ ଦ୍ୱାରା ନିରପେକ୍ଷ ତଦନ୍ତ ମାଗିଛନ୍ତି । ସରକାର କିମ୍ବା ଏହାର କୌଣସି ଏଜେନ୍ସି ପେଗାସସ୍ ସ୍ପାଏୱେୟାର ପାଇଁ ଲାଇସେନ୍ସ ନେଇଛନ୍ତି କି ନାହିଁ ଏବଂ ଏହା ପ୍ରତ୍ୟକ୍ଷ କିମ୍ବା ପରୋକ୍ଷ ଭାବରେ କାହା ଉପରେ ନଜର ରଖିବା ପାଇଁ ବ୍ୟବହୃତ ହୋଇଛି କି ନାହିଁ ତାହା ଜଣାଇବାକୁ କେନ୍ଦ୍ରକୁ ନିର୍ଦ୍ଦେଶ ଦେବାକୁ ଆବେଦନରେ କୁହାଯାଇଛି ।

Published On July 30, 2021