20 ଟଙ୍କାରେ 80 ଟଙ୍କାର ପିଆଜ ଦେଲା ଛାତ୍ର କଂଗ୍ରେସ, କୃଷି ମନ୍ତ୍ରୀଙ୍କ ବାସଭବନ ଘେରାଉ

Published: Tuesday, October 31, 2023, 16:11 [IST]

ଭୁବନେଶ୍ୱର: କାର୍ତ୍ତିକ ମାସରେ ବି ପିଆଜ କିଲୋ 80 ଟଙ୍କା । ପିଆଜ ଦରରେ ନିଆଁ ଲାଗିବା ପରେ ଖାଉଟିଙ୍କ ପକେଟ୍ ଉପରେ ବୋଝ ବଢିବାରେ ଲାଗିଛି । ରୋଷେଇ ଘରେ ପଡ଼ିଛି ମହଙ୍ଗା ଭାଳେଣି । ଦର ବୃଦ୍ଧିକୁ ନେଇ ଜନଅସନ୍ତୋଷ ବୃଦ୍ଧି ପାଇବାରେ ଲାଗିଛି ।
ଏହି ସମୟରେ ଏହାକୁ ନେଇ ପ୍ରତିବାଦ କରିଛି ଛାତ୍ର କଂଗ୍ରେସ । ବଜାରରେ 80 ଟଙ୍କାରେ ମିଳୁଥିବା ପିଆଜକୁ 20 ଟଙ୍କାରେ ବିକ୍ରି କରୁଛି ଛାତ୍ର କଂଗ୍ରେସ । ପିଆଜ ଦର ବୃଦ୍ଧିକୁ ବିରୋଧ କରି ଏପରି ଅଭିନବ ପ୍ରତିବାଦ କରିଛି ରାଜ୍ୟ ଛାତ୍ର କଂଗ୍ରେସ ।

ଏହି ପିଆଜ କିଣିବାକୁ ମଧ୍ୟ ଲୋକଙ୍କ ଭିତରେ ନାହିଁ ନଥିବା ଭିଡ ଦେଖିବାକୁ ମିଳିଛି । ପିଆଜ ଦରବୃଦ୍ଧି ନେଇ ଛାତ୍ର କଂଗ୍ରେସ ପକ୍ଷରୁ କୃଷି ମନ୍ତ୍ରୀଙ୍କ ବାସଭବନ ଘେରାଉ କରା ଯାଇଛି । ପିଆଜ ଦର ନିୟନ୍ତ୍ରଣ ଏବଂ କଳାବଜାରୀ ରୋକିବାରେ ସରକାର ଫେଲ ମାରିଥିବା ଅଭିଯୋଗ କରିଛି ଦଳ । ଭୁବନେଶ୍ୱରର ପ୍ରଶାନ୍ତି ବିହାର ଚିରଗାଲଟୋଲା ବସ୍ତିରେ ପିଆଜ ବଣ୍ଟନ କରାଯାଉଛି । ପ୍ରତି ଲୋକଙ୍କୁ 2 କେଜି ହିସାବରେ ପିଆଜ ଦିଆଯାଉଛି । ଏଠାରେ ମଧ୍ୟ ପିଆଜ କିଣିବାକୁ ଲୋକଙ୍କ ମଧ୍ୟରେ ପ୍ରତିଯୋଗିତା ଦେଖିବାକୁ ମିଳିଛି ।

ରାଜ୍ୟ ସରକାର ପିଆଜ ପାଇଁ କାହିଁକି ଅନ୍ୟ ରାଜ୍ୟ ଉପରେ ନିର୍ଭର କରୁଛନ୍ତି ? ରାଜ୍ୟ ସରକାର କାହିଁକି ରାଜ୍ୟରେ ଶୀତଳ ଭଣ୍ଡାର କରୁନାହାଁନ୍ତି ବୋଲି କଂଗ୍ରେସ ପ୍ରଶ୍ନ କରିଛି । ଅପରପକ୍ଷରେ ଏନେଇ କେନ୍ଦ୍ରକୁ ଦାୟୀ କରିଛି ବିଜେଡି । ଦର ନିୟନ୍ତ୍ରଣ କରିବା ଦାୟିତ୍ୱ ହେଉଛି କେନ୍ଦ୍ରର ବୋଲି ବିଜେଡି କହିଛି । ନାସିକରେ ପିଆଜ ମହଙ୍ଗା କାରଣରୁ ଓଡ଼ିଶାରେ ଏହାର ପ୍ରଭାବ ପଡ଼ୁଥିବା ନେଇ କୁହାଯାଉଛି । ବର୍ତ୍ତମାନ ସବୁ ପରିବା ଦର ଉପରମୁହାଁ ଥିବା ବେଳେ ହଠାତ୍‌ ପିଆଜ ଦର ବୃଦ୍ଧି ଗ୍ରାହକଙ୍କ ପକେଟ୍ କୁ ନଳିତା ଉପରେ ବୋଝ ସୃଦୃଶ ହୋଇଛି ।

ଚାହିଦା ମୁତାବକ ଯୋଗାଣ ସମ୍ଭବ ହେଉନଥିବାରୁ ଦର ବଢିଥିବା ବ୍ୟବସାୟୀ କହିଛନ୍ତି । ନୂଆ ପିଆଜ ଅମଳରେ ବିଳମ୍ବ ଘଟୁଥିବାରୁ ଏପରି ସ୍ଥିତି ଦେଖାଦେଇଛି । ତେବେ ନଭେମ୍ବର ମଧ୍ୟଭାଗରେ ବଜାରକୁ ନୂଆ ପିଆଜ ଆସିଲେ ଦର କମିଯିବ ବୋଲି କୁହାଯାଉଛି । ଏପଟେ ପିଆଜ ମୂଲ୍ୟ ବୃଦ୍ଧିର ସିଧାସଳଖ ପ୍ରଭାବ ଖୁଚୁରା ବଜାରରେ ପଡିଥିବା ବେଳେ ସେପଟେ ପିଆଜ ଦର ବୃଦ୍ଧିକୁ ନେଇ ଚିନ୍ତାରେ ପଡିଛନ୍ତି ଗ୍ରାହକ ।

Published On October 31, 2023