କାଜିରଙ୍ଗାରେ ସଦଗୁରୁଙ୍କ ନାଇଟ୍ ସଫାରୀ ବିବାଦ, ସିଏମ୍ କହିଲେ - କୌଣସି ନିୟମ ଉଲ୍ଲଂଘନ କରାଯାଇ ନାହିଁ
ଦୁଇଜଣ ସାମାଜିକ କାର୍ଯ୍ୟକର୍ତ୍ତା ଅଭିଯୋଗ କରିଛନ୍ତି ଯେ ସଦଗୁରୁ, ମୁଖ୍ୟମନ୍ତ୍ରୀ ଶର୍ମା ଏବଂ ପର୍ଯ୍ୟଟନ ମନ୍ତ୍ରୀ ଜୟନ୍ତ ମଲ୍ଲା ବରୁଆ ଜାତୀୟ ଉଦ୍ୟାନରେ ନାଇଟ୍ ସଫାରୀ କରିଛନ୍ତି । ଏହା ନିୟମର ସିଧାସଳଖ ଉଲ୍ଲଂଘନ ଅଟେ ।
ଗୌହାଟି : ଆସାମର କାଜିରଙ୍ଗା ଜାତୀୟ ଉଦ୍ୟାନରେ ସଦଗୁରୁ ଜଗ୍ଗୀ ବସୁଦେବଙ୍କ ଗସ୍ତକୁ ନେଇ ବିବାଦ ଉଠିଛି । ଦୁଇଜଣ ସାମାଜିକ କାର୍ଯ୍ୟକର୍ତ୍ତା ଅଭିଯୋଗ କରିଛନ୍ତି ଯେ ସଦଗୁରୁ, ମୁଖ୍ୟମନ୍ତ୍ରୀ ଶର୍ମା ଏବଂ ପର୍ଯ୍ୟଟନ ମନ୍ତ୍ରୀ ଜୟନ୍ତ ମଲ୍ଲା ବରୁଆ ଜାତୀୟ ଉଦ୍ୟାନରେ ନାଇଟ୍ ସଫାରୀ କରିଛନ୍ତି । ଏହା ନିୟମର ସିଧାସଳଖ ଉଲ୍ଲଂଘନ ଅଟେ । ଏହି ମାମଲାରେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ୍ । ତେବେ ଜାତୀୟ ଉଦ୍ୟାନର ନିୟମ ଅନୁଯାୟୀ ସବୁକିଛି ହୋଇଛି ବୋଲି ଆସାମ ମୁଖ୍ୟମନ୍ତ୍ରୀ ଦାବି କରିଛନ୍ତି ।
ସୂଚନାନୁସାରେ, ସାମାଜିକ କାର୍ଯ୍ୟକର୍ତ୍ତା ସୋନେଶ୍ୱର ନାରା ଏବଂ ପ୍ରବୀଣ ପେଗୁ ସଦଗୁରୁ, ହିମନ୍ତ ବିଶ୍ୱ ଶର୍ମା ଏବଂ ବରୁଆଙ୍କ ବିରୋଧରେ ଗୋଲାଘାଟ ଜିଲ୍ଲା ପୋଲିସ ନିକଟରେ ଅଭିଯୋଗ କରିଛନ୍ତି । ସେ ଅଭିଯୋଗ କରିଛନ୍ତି ଯେ ଶନିବାର ରାତିରେ ନିର୍ଦ୍ଧାରିତ ସମୟ ପରେ ଭିଆଇପିମାନେ କାଜିରଙ୍ଗା ଜାତୀୟ ଉଦ୍ୟାନରେ ପ୍ରବେଶ କରିଛନ୍ତି । ଏକ ଶିଙ୍ଗ ବିଶିଷ୍ଟ ଗେଣ୍ଡା ପାଇଁ ଏହି ପାର୍କ ପ୍ରସିଦ୍ଧ । ଏହା କରି ସେମାନେ ବନ୍ୟଜନ୍ତୁ ସୁରକ୍ଷା ଆଇନ 1972 କୁ ଉଲ୍ଲଂଘନ କରିଛନ୍ତି । ଯେଉଁଥିରେ ଧାର୍ଯ୍ୟ ସମୟ ପରେ ପଶୁଙ୍କ ଘର (ଜଙ୍ଗଲ) ରେ ପ୍ରବେଶ ନକରିବାକୁ କୁହାଯାଇଛି । ଏହା ବ୍ୟତୀତ ସୋଶାଲ ମିଡିଆରେ କିଛି ଭିଡିଓ ଭାଇରାଲ ହେବାରେ ଲାଗିଛି ଯେଉଁଥିରେ ସଦଗୁରୁ ଏକ ଖୋଲା ସଫାରି ଏସୟୁଭି ଚଳାଉଥିବାର ନଜର ଆସିଛନ୍ତି, ଯେଉଁଥିରେ ମୁଖ୍ୟମନ୍ତ୍ରୀ ଏବଂ ବରୁଆ ବସିଛନ୍ତି ।
ଗଣମାଧ୍ୟମ ସହ କଥାବାର୍ତ୍ତା କରି ମୁଖ୍ୟମନ୍ତ୍ରୀ କହିଛନ୍ତି ଯେ କୌଣସି ନିୟମର ଉଲ୍ଲଂଘନ ହୋଇ ନାହିଁ । ୱାଇଲ୍ଡ ଲାଇଫ ଆକ୍ଟ ଅନୁଯାୟୀ ୱାର୍ଡେନ ରାତିରେ ମଧ୍ୟ ସଂରକ୍ଷିତ ଅଞ୍ଚଳରେ ପ୍ରବେଶ କରିବାକୁ ଅନୁମତି ଦେଇ ପାରିବେ । କୌଣସି ନିୟମ ଲୋକଙ୍କୁ ରାତିରେ ପ୍ରବେଶ କରିବାକୁ ବାରଣ କରେ ନାହିଁ । ଆମେ ଆନୁଷ୍ଠାନିକ ଭାବେ ଉଦ୍ୟାନର ଉଦଘାଟନ କରିଥିଲୁ । ସଦଗୁରୁ ଏବଂ ଶ୍ରୀ ଶ୍ରୀ ରବି ଶଙ୍କରଙ୍କର ଲକ୍ଷ ଲକ୍ଷ ଅନୁଗାମୀ ଅଛନ୍ତି, ତେଣୁ ଏହା ପର୍ଯ୍ୟଟନ ପାଇଁ ବହୁତ ଭଲ ହେବ ।
କଣ କହିଲେ ଅଧିକାରୀ ?
ଏଥି ସହିତ ଆସାମର ମୁଖ୍ୟ ବନ ସଂରକ୍ଷକ ଏମ.କେ ଯାଦବ କହିଛନ୍ତି ଯେ ବନ ବିଭାଗ ସଦଗୁରୁ ଏବଂ ମୁଖ୍ୟମନ୍ତ୍ରୀଙ୍କୁ ନିମନ୍ତ୍ରଣ କରିଥିଲା । ଏଭଳି ପରିସ୍ଥିତିରେ ସଦଗୁରୁ ଏବଂ ଆମ ମୁଖ୍ୟମନ୍ତ୍ରୀ ବିଳମ୍ବିତ ରାତିରେ ପାର୍କରେ ପ୍ରବେଶ କରି ନିୟମ ଉଲ୍ଲଂଘନ କରିଛନ୍ତି ବୋଲି କହିବା ଭୁଲ । ସେମାନଙ୍କ ପାଇଁ ସମସ୍ତ ବ୍ୟବସ୍ଥା କରାଯାଇଥିଲା, ଯେଉଁଥିପାଇଁ ଅନ୍ଧାର ହୋଇଥିଲେ ମଧ୍ୟ ତାହା ବାତିଲ କରାଯାଇ ନଥିଲା ।
Click it and Unblock the Notifications
Sign in with Google