ଗଣତନ୍ତ୍ର ଦିବସ ପରେଡର ସାକ୍ଷୀ ହେବ ନୂଆ ରାଜପଥ, ନଭେମ୍ବର ସୁଦ୍ଧା ସରିବ କାର୍ଯ୍ୟ

ସେଣ୍ଟ୍ରାଲ୍ ଭିଷ୍ଟା ଆଭେନ୍ୟୁର ପୁନଃ ନିର୍ମାଣ ନଭେମ୍ବର ସୁଦ୍ଧା ଶେଷ ହେବ ଏବଂ ଆସନ୍ତା ବର୍ଷର ଗଣତନ୍ତ୍ର ଦିବସ ପରେଡ ନୂତନ ବିକଶିତ ରାଜପଥରେ ଅନୁଷ୍ଠିତ ହେବ ।

Published: Saturday, July 17, 2021, 13:16 [IST]

ନୂଆଦିଲ୍ଲୀ : ଆସନ୍ତା ବର୍ଷର ଗଣତନ୍ତ୍ର ଦିବସ ପରେଡ ନୂତନ ରାଜପଥରେ ଅନୁଷ୍ଠିତ ହେବ । କାରଣ ରାଷ୍ଟ୍ରପତି ଭବନରୁ ଇଣ୍ଡିଆ ଗେଟ୍ ପର୍ଯ୍ୟନ୍ତ ସେଣ୍ଟ୍ରାଲ୍ ଭିଷ୍ଟା ଆଭେନ୍ୟୁର ପୁନଃ ନିର୍ମାଣ କାର୍ଯ୍ୟ ନଭେମ୍ବର ସୁଦ୍ଧା ଶେଷ ହେବ ବୋଲି ଆଶା କରାଯାଉଛି । ଅଧିକାରୀମାନେ ଶୁକ୍ରବାର ଏ ସମ୍ପର୍କରେ ସୂଚନା ଦେଇଛନ୍ତି । ନିର୍ମାଣ କାର୍ଯ୍ୟ ସମୀକ୍ଷା କରିବା ପରେ କେନ୍ଦ୍ର ଗୃହ ଓ ନଗର ବ୍ୟାପାର ମନ୍ତ୍ରୀ ହାର୍ଦ୍ଦିକ ସିଂ ପୁରୀ କହିଛନ୍ତି ଯେ ନାଗରିକମାନେ ଏପରି ଏକ ସୁଯୋଗ ପାଇବେ ଯେଉଁଥିରେ ସେମାନେ ଗର୍ବିତ ହେବେ ।

ଏକ ଟୁଇଟ୍ ମାଧ୍ୟମରେ ଏହି ସୂଚନା ଦେଇ ସେ କହିଛନ୍ତି ଯେ "ଗୃହ ଓ ନଗର ମନ୍ତ୍ରଣାଳୟର ସଚିବ, ମନ୍ତ୍ରଣାଳୟରଏବଂ ସିପିଡବ୍ଲ୍ୟୁଡି ଅଧିକାରୀ, କଣ୍ଟ୍ରାକ୍ଟର ଏବଂ ବାସ୍ତୁକାର ବିମଲ ପଟେଲଙ୍କ ସହ ସେଣ୍ଚ୍ରାଲ ଭିଷ୍ଟା ପ୍ରକଳ୍ପର ନିର୍ମାଣ କାର୍ଯ୍ୟର ସ୍ଥିତି ସମୀକ୍ଷା କରିଛି । ଏପର୍ଯ୍ୟନ୍ତ ଅଗ୍ରଗତି ସନ୍ତୋଷଜନକ ଏବଂ କାର୍ଯ୍ୟ ଠିକ୍ ସମୟରେ କରାଯାଉଛି । ନାଗରିକମାନେ ଏପରି ଏକ ସୁଯୋଗ ପାଇବେ ଯେଉଁଥିରେ ସେମାନେ ଗର୍ବିତ ହେବେ ।"

ମନ୍ତ୍ରଣାଳୟର ଜଣେ ଅଧିକାରୀ କହିଛନ୍ତି ଯେ ରାଜପଥ ପୁନଃ ବିକାଶ ପ୍ରକଳ୍ପରେ ବୃହତ ପଥର କାର୍ଯ୍ୟ, ଅଣ୍ଡରପାସ୍ ନିର୍ମାଣ, ଭୂତଳ ସୁବିଧା ବ୍ଲକ ଏବଂ ଉଦ୍ୟାନ କୃଷି କାର୍ଯ୍ୟ ଏବଂ ପାର୍କିଂ ପାଇଁ ପର୍ଯ୍ୟାପ୍ତ ସ୍ଥାନ ରହିଛି । କୃତ୍ରିମ ପୋଖରୀରେ ବାରଟି ସେତୁ ନିର୍ମାଣ କରାଯାଉଛି ବୋଲି ସେ କହିଛନ୍ତି । ରାଜପଥ ପରିଦର୍ଶନ କରୁଥିବା ଲୋକମାନେ ଏକ ଅଦ୍ଭୁତ ଅନୁଭୂତି ପାଇବେ । ସେଣ୍ଟ୍ରାଲ୍ ଭିଷ୍ଟା ଆଭେନ୍ୟୁର ପୁନଃ ନିର୍ମାଣ ନଭେମ୍ବର ସୁଦ୍ଧା ଶେଷ ହେବ ଏବଂ ଆସନ୍ତା ବର୍ଷର ଗଣତନ୍ତ୍ର ଦିବସ ପରେଡ ନୂତନ ବିକଶିତ ରାଜପଥରେ ଅନୁଷ୍ଠିତ ହେବ ।

ଉଲ୍ଲେଖନୀୟ ବିଷୟ ହେଉଛି, ସେଣ୍ଟ୍ରାଲ ଭିଷ୍ଟା ପ୍ରକଳ୍ପରେ ଏକ ନୂତନ ସଂସଦ ଗୃହ, କେନ୍ଦ୍ରୀୟ ସଚିବାଳୟ, ରାଷ୍ଟ୍ରପତି ଭବନରୁ ଇଣ୍ଡିଆ ଗେଟ୍ ପର୍ଯ୍ୟନ୍ତ ତିନି କିଲୋମିଟର ଦୀର୍ଘ ରାଜପଥର ନବୀକରଣ, ନୂତନ ପ୍ରଧାନମନ୍ତ୍ରୀଙ୍କ ବାସଭବନ ଏବଂ ପିଏମଓ ଏବଂ ନୂତନ ଉପରାଷ୍ଟ୍ରପତି ଗୃହ ଅନ୍ତର୍ଭୁକ୍ତ ରହିଛି ।

Published On July 17, 2021