ଡ୍ରିମ୍ ସିଟି ପ୍ରକଳ୍ପ ସମାପ୍ତ ହେବା ପରେ ସୁରଟ ଦୁନିଆର ସବୁଠାରୁ ସୁରକ୍ଷିତ ହୀରା ବାଣିଜ୍ୟ ହବରେ ବିକଶିତ ହେବ : ପିଏମ ମୋଦୀ

ପ୍ରଧାନମନ୍ତ୍ରୀ ମୋଦୀ ଗୁରୁବାର ରାଜ୍ୟର ସୁରଟ ଏବଂ ଭାବନଗରରେ 3400 କୋଟି ମୂଲ୍ୟର ପ୍ରକଳ୍ପ ଉପସ୍ଥାପନ କରିଛନ୍ତି ।

ନୂଆଦିଲ୍ଲୀ : ଦୁଇ ଦିନିଆ ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁଜରାଟର ସୁରଟରେ ପହଞ୍ଚିଛନ୍ତି । ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୁରଟରେ ଏକ ରୋଡ୍ ସୋରେ ଭାଗ ନେଇଥିଲେ । ପ୍ରଧାନମନ୍ତ୍ରୀ ମୋଦୀ ଗୁରୁବାର ରାଜ୍ୟର ସୁରଟ ଏବଂ ଭାବନଗରରେ 3400 କୋଟି ମୂଲ୍ୟର ପ୍ରକଳ୍ପ ଉପସ୍ଥାପନ କରିଛନ୍ତି ।

ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାଧାରଣ ସଭାକୁ ସମ୍ବୋଧିତ କରି କହିଛନ୍ତି ଯେ ନବରାତ୍ରୀରେ ଏଠାକୁ ଆସିବା ମୋର ସୌଭାଗ୍ୟ । ସୁରଟ ହେଉଛି ଶ୍ରମ ସହର । ପ୍ରତିଭା ଏଠାରେ ମୂଲ୍ୟବାନ । ସୁରଟରେ ବିକାଶ ପ୍ରତ୍ୟେକ ଘରେ ପହଞ୍ଚିଛି । ସୁରଟ ଏପରି ଏକ ସହର ଯେଉଁଠାରେ ଦେଶର କୋଣ ଅନୁକୋଣରୁ ଲୋକମାନେ ଆସି ରୋଜଗାର ପାଉଛନ୍ତି । ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ସୁରଟ ସହର ଉଭୟ ଏକତା ଏବଂ ଜନସାଧାରଣଙ୍କ ଅଂଶଗ୍ରହଣର ଏକ ଅଦ୍ଭୁତ ଉଦାହରଣ । ଭାରତର ଏପରି କୌଣସି ଅଞ୍ଚଳ ନ ଥିବ ଯାହାର ଲୋକମାନେ ସୁରଟରେ ରହୁ ନଥିବେ । ସୁରଟର ସବୁଠାରୁ ବଡ ବୈଶିଷ୍ଟ୍ୟ ହେଉଛି ଏହି ସହର ଶ୍ରମକୁ ସମ୍ମାନ କରୁଥିବା ସହର ।

ସାଧାରଣ ସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦୀ ଆହୁରି କହିଛନ୍ତି ଯେ ଏହି ଶତାବ୍ଦୀର ପ୍ରାରମ୍ଭରେ ଯେତେବେଳେ ବିଶ୍ୱରେ 3-P ଅର୍ଥାତ୍ ପବ୍ଲିକ୍ ପ୍ରାଇଭେଟ ପାର୍ଟନରସିପ୍ ବିଷୟରେ ଆଲୋଚନା ହୋଇଥିଲା, ସେତେବେଳେ ମୁଁ କହିଥିଲି ଯେ ସୁରଟ 4-P ର ଏକ ଉଦାହରଣ । 4-P ପିପୁଲ, ପବ୍ଲିକ୍, ପ୍ରାଇଭେଟ୍, ପାର୍ଟନରସିପ୍ । ଏହି ମଡେଲ୍ ସୁରଟକୁ ସ୍ୱତନ୍ତ୍ର କରିଥାଏ । ପ୍ରଧାନମନ୍ତ୍ରୀ କହିଛନ୍ତି ଯେ ସୁରଟର ବୟନ ଏବଂ ହୀରା ବ୍ୟବସାୟରୁ ସମଗ୍ର ଦେଶରେ ଅନେକ ପରିବାରର ଜୀବନ ଚଳୁଛି । ଯେତେବେଳେ ଡ୍ରିମ୍ ସିଟି ପ୍ରକଳ୍ପ ସମାପ୍ତ ହେବ, ସୁରଟ ଦୁନିଆର ସବୁଠାରୁ ସୁରକ୍ଷିତ ଏବଂ ସୁବିଧାଜନକ ହୀରା ବାଣିଜ୍ୟ ହବରେ ପରିଣତ ହେବ ।

ପ୍ରଧାନମନ୍ତ୍ରୀ ମୋଦୀ ସାଧାରଣ ସଭାରେ ଉଦବୋଧନ ଦେଇ କହିଛନ୍ତି ଯେ ଗତ 2 ଦଶନ୍ଧି ମଧ୍ୟରେ ଆମେ ସୁରଟରେ ଗରିବ ଲୋକଙ୍କ ପାଇଁ ପ୍ରାୟ 80,000 ଘର ନିର୍ମାଣ କରିଛୁ । ସେମାନଙ୍କର ଜୀବନଧାରଣ ମାନ ଉନ୍ନତ କରିଛୁ । ଆୟୁଷ୍ମାନ ଭାରତ ଯୋଜନା ଅଧୀନରେ ଦେଶରେ ପ୍ରାୟ 4 କୋଟି ଗରିବ ରୋଗୀ ମାଗଣାରେ ଚିକିତ୍ସା ପାଇଲେ, ସେଥିମଧ୍ୟରୁ 32 ଲକ୍ଷରୁ ଅଧିକ ରୋଗୀ ଗୁଜୁରାଟର ଏବଂ 1.25 ଲକ୍ଷ ସୁରଟର । ସେ କହିଛନ୍ତି ଯେ ସୁରଟକୁ ବିମାନବନ୍ଦର ସହିତ ସଂଯୋଗ କରୁଥିବା ରାସ୍ତା ସହରର ସଂସ୍କୃତି, ସମୃଦ୍ଧତା ଏବଂ ଆଧୁନିକତାକୁ ପ୍ରତିଫଳିତ କରିଥାଏ ।

English summary

Prime Minister Narendra Modi 2 days Gujarat Visit