ବାଇଡେନ-କମଳା ହାରିସଙ୍କ ସହ ସାକ୍ଷାତ, ମିଳିତ ଜାତିସଂଘରେ ସମ୍ବୋଧନ, ବ୍ୟସ୍ତ ବହୁଳ ରହିବ ପ୍ରଧାନମନ୍ତ୍ରୀ ମୋଦୀଙ୍କ ଆମେରିକା ଗସ୍ତ

ତିନି ଦିନିଆ ବ୍ୟସ୍ତବହୁଳ ଗସ୍ତରେ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆମେରିକା ଗସ୍ତ କରିବାକୁ ଯାଉଛନ୍ତି । ଏହି ଗସ୍ତ ସମୟରେ ସେ ଆମେରିକାର ରାଷ୍ଟ୍ରପତି ଜୋ ବାଇଡେନ୍, ଉପରାଷ୍ଟ୍ରପତି କମଳା ହାରିସଙ୍କୁ ଭେଟିବେ ।

Published: Tuesday, September 21, 2021, 13:19 [IST]

ନୂଆଦିଲ୍ଲୀ : ତିନି ଦିନିଆ ବ୍ୟସ୍ତବହୁଳ ଗସ୍ତରେ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆମେରିକା ଗସ୍ତ କରିବାକୁ ଯାଉଛନ୍ତି । ଏହି ଗସ୍ତ ସମୟରେ ସେ ଆମେରିକାର ରାଷ୍ଟ୍ରପତି ଜୋ ବାଇଡେନ୍, ଉପରାଷ୍ଟ୍ରପତି କମଳା ହାରିସଙ୍କୁ ଭେଟିବେ । କମଲା ହାରିସଙ୍କ ସହ ସାକ୍ଷାତ ସମୟରେ ଆପଲ୍ ସିଇଓ ଟମ୍ କୁକ୍ ମଧ୍ୟ ଉପସ୍ଥିତ ରହିବେ । ବିଶେଷକରି କ୍ୱାଡ ବୈଠକକୁ ଦୃଷ୍ଟିରେ ରଖି ପିଏମ ମୋଦୀଙ୍କ ଏହି ଆମେରିକୀୟ ଗସ୍ତ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଇଛି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କର ତିନି ଦିନିଆ ଗସ୍ତ ସମୟରେ 24 ସେପ୍ଟେମ୍ବରରେ ଆମେରିକାର ରାଷ୍ଟ୍ରପତି ଜୋ ବାଇଡେନ ଏବଂ 23 ସେପ୍ଟେମ୍ବରରେ ଉପରାଷ୍ଟ୍ରପତି କମଲା ହାରିସଙ୍କ ସହ ଦ୍ୱିପାକ୍ଷିକ ବୈଠକ କରିବେ । ଏହା ପରେ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ 25 ସେପ୍ଟେମ୍ବରରେ ମିଳିତ ଜାତିସଂଘର ସାଧାରଣ ସଭାକୁ ସମ୍ବୋଧିତ କରିବେ । ଆମେରିକାର ରାଷ୍ଟ୍ରପତି ଏବଂ ପ୍ରଧାନମନ୍ତ୍ରୀ ମୋଦୀଙ୍କ ବୈଠକ ବିଷୟରେ ହ୍ୱାଇଟ ହାଉସ ପକ୍ଷରୁ ଘୋଷଣା କରାଯାଇଛି ।

ଆମେରିକାର ରାଷ୍ଟ୍ରପତି ଜୋ ବାଇଡେନ ଏବଂ କମଲା ହାରିସଙ୍କ ସହ ନରେନ୍ଦ୍ର ମୋଦୀଙ୍କ ଏହା ପ୍ରଥମ ବ୍ୟକ୍ତିଗତ ସାକ୍ଷାତ ହେବ । ସେ 2014 ରେ ପ୍ରଧାନମନ୍ତ୍ରୀ ଭାବରେ ତାଙ୍କର ପ୍ରଥମ ଗସ୍ତରେ ଜୋ ବାଇଡେନଙ୍କୁ ଭେଟିଥିଲେ । ଜୋ ବାଇଡେନ ସେତେବେଳେ ରାଷ୍ଟ୍ରପତି ବାରାକ ଓବାମାଙ୍କ ପ୍ରଶାସନରେ ଉପରାଷ୍ଟ୍ରପତି ଥିଲେ । ନରେନ୍ଦ୍ର ମୋଦୀ ଏବଂ କମଳା ହାରିସ୍ କେବେ ସାକ୍ଷାତ କରିନାହାଁନ୍ତି, ଏହା ସେମାନଙ୍କର ପ୍ରଥମ ସାକ୍ଷାତ ହେବ ।

ଦ୍ୱିପାକ୍ଷିକ ଆଲୋଚନା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଜୋ ବାଇଡେନ, ଅଷ୍ଟ୍ରେଲିଆର ସ୍କଟ ମୋରିସନ୍ ଏବଂ ଜାପାନର ୟୋସିହିଡେ ସୁଗାଙ୍କ ସହ ହ୍ୱାଇଟ ହାଉସରେ ଆମେରିକାର ରାଷ୍ଟ୍ରପତିଙ୍କ ଦ୍ୱାରା ଆୟୋଜିତ କ୍ୱାଡ ନେତାଙ୍କ ପ୍ରଥମ ବ୍ୟକ୍ତିଗତ ସମ୍ମିଳନୀରେ ଯୋଗଦେବେ ।
ରାଜନୈତିକ ବୈଠକ ପରେ ଭାରତୀୟ ପ୍ରଧାନମନ୍ତ୍ରୀ ଆମେରିକାର ଶୀର୍ଷ କମ୍ପାନୀଗୁଡିକର ସିଇଓମାନଙ୍କୁ ମଧ୍ୟ ଭେଟିବେ । ଆମେରିକା ଏବଂ ଭାରତୀୟ କୂଟନୈତିକ ସର୍କଲର ଲୋକମାନଙ୍କ କହିବାନୁସାରେ, ସେପ୍ଟେମ୍ବର 23 ରେ ମୋଦୀ ଆମେରିକାର ପ୍ରମୁଖ କମ୍ପାନୀଗୁଡିକର ପାଞ୍ଚ ଜଣ ସିଇଓଙ୍କ ସହିତ ମଧ୍ୟ ସାକ୍ଷାତ କରିବେ ।

Published On September 21, 2021