ଆଜିଠାରୁ ସଂସଦର ଶୀତକାଳୀନ ଅଧିବେଶନ, 16 ଟି ନୂତନ ବିଲ୍ ଆଣିବାକୁ ପ୍ରସ୍ତୁତ ହେଉଛନ୍ତି ସରକାର

ସଂସଦର ଶୀତକାଳୀନ ଅଧିବେଶନ ବୁଧବାର ଠାରୁ ଅର୍ଥାତ୍ 7 ଡିସେମ୍ବରରୁ ଆରମ୍ଭ ହେଉଛି । ସଂସଦର ଏହି ଶୀତକାଳୀନ ଅଧିବେଶନରେ 17 କାର୍ଯ୍ୟଦିବସ ରହିବ । ଅଧିବେଶନ ଆରମ୍ଭ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଗଣମାଧ୍ୟମ ସହ ଆଲୋଚନା କରିପାରନ୍ତି ।

Published: Wednesday, December 7, 2022, 10:12 [IST]

ନୂଆଦିଲ୍ଲୀ: ସଂସଦର ଶୀତକାଳୀନ ଅଧିବେଶନ ବୁଧବାର ଠାରୁ ଅର୍ଥାତ୍ 7 ଡିସେମ୍ବରରୁ ଆରମ୍ଭ ହେଉଛି । ସଂସଦର ଏହି ଶୀତକାଳୀନ ଅଧିବେଶନରେ 17 କାର୍ଯ୍ୟଦିବସ ରହିବ । ଅଧିବେଶନ ଆରମ୍ଭ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଗଣମାଧ୍ୟମ ସହ ଆଲୋଚନା କରିପାରନ୍ତି । ପ୍ରଥମ ଦିନରେ ଚଳିତ ବର୍ଷ ପ୍ରାଣ ହରାଇଥିବା ସଦସ୍ୟଙ୍କୁ ଶ୍ରଦ୍ଧାଞ୍ଜଳି ଦିଆଯିବ । ଅକ୍ଟୋବରରେ ସମାଜବାଦୀ ପାର୍ଟିର ମୁଖ୍ୟ ମୁଲାୟମ ସିଂହ ଯାଦବଙ୍କ ଦେହାନ୍ତ ହୋଇଥିଲା । 29 ଡିସେମ୍ବର 2022 ପର୍ଯ୍ୟନ୍ତ ଏହି ଶୀତ ଅଧିବେଶନ ଜାରି ରହିବ । ଉପରାଷ୍ଟ୍ରପତି ଜଗଦୀପ ଧନଖର ମଧ୍ୟ ପ୍ରଥମ ଥର ପାଇଁ ରାଜ୍ୟସଭା ଅଧ୍ୟକ୍ଷତା କରିବେ । ଏହି ସମୟ ମଧ୍ୟରେ ସରକାର 16 ଟି ବିଲ୍ ଆଗତ କରିବାକୁ ପ୍ରସ୍ତୁତ ହେଉଛନ୍ତି ।

ଟ୍ରେଡ୍ ମାର୍କ (ସଂଶୋଧନ) ବିଲ୍, 2022 ଏବଂ ମଲ୍ଟି ଷ୍ଟେଟ୍ କୋଅପରେଟିଭ୍ ସୋସାଇଟିସ୍ (ସଂଶୋଧନ) ବିଲ୍, 2022 ସହିତ କେନ୍ଦ୍ର ସରକାର ଏହି ଶୀତକାଳୀନ ଅଧିବେଶନରେ 16 ଟି ନୂତନ ବିଲ୍ ଆଗତ କରିବେ । କିଛି ବିଲ୍ ଗୃହ ଦ୍ୱାରା ପାରିତ ହୋଇସାରିଛି କିମ୍ବା ସଂସଦୀୟ କମିଟି ଦ୍ୱାରା ମୂଲ୍ୟାଙ୍କନ କରାଯାଇଛି । ଏସବୁ ପରବର୍ତ୍ତୀ ପର୍ଯ୍ୟାୟକୁ ଯିବ ।

ଏହା ପୂର୍ବରୁ ସର୍ବଦଳୀୟ ବୈଠକରେ ଅଧିବେଶନ ସମୟରେ ମହିଳା ସଂରକ୍ଷଣ ବିଲ୍‌କୁ ପାରିତ କରିବା ଉପରେ ବିଜେଡି ଜୋର୍‌ ଦେଇଛି । ବୈଠକରେ ବିଜେଡିର ଲୋକସଭା ନେତା ପିନାକୀ ମିଶ୍ର ଏବଂ ରାଜ୍ୟସଭା ନେତା ସସ୍ମିତ ପାତ୍ର କହିଛନ୍ତି ଯେ ମହିଳା ସଂରକ୍ଷଣ ବିଲକୁ ସଂସଦରେ ପାରିତ କରିବ‌ା ପାଇଁ ସଂସଦର ବିଭିନ୍ନ ଅଧିବେଶନରେ ବିଜେଡି ପକ୍ଷରୁ ଦାବି କରାଯାଇଛି । ଏହି ବିଲ୍‌କୁ ପାରିତ କରିବା ପାଇଁ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବାରମ୍ବାର କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି । ଏହାକୁ କାର୍ଯ୍ୟକାରୀ କରାଯାଇନାହିଁ । ଏହି ବିଲ୍ କୁ ଯଥାଶୀଘ୍ର ପାରିତ କରାଯାଉ ବୋଲି ବିଜେଡି ନେତା ବୈଠକରେ ଦାବି କରିଥିଲେ ।