କରୋନାରୁ ସୁସ୍ଥ ହୋଇଥିବା ଲୋକଙ୍କ ପାଇଁ ସ୍ପୁଟନିକ ଭି ଟିକାର ଗୋଟିଏ ଡୋଜ୍ ଯଥେଷ୍ଟ

ବୈଜ୍ଞାନିକମାନେ ଏକ ଅନୁସନ୍ଧାନରେ ଦାବି କରିଛନ୍ତି ଯେ କରୋନାରୁ ସୁସ୍ଥ ହୋଇଯାଇଥିବା ଲୋକଙ୍କ ପାଇଁ ସ୍ପୁଟ୍ନିକ୍ ଭି ଟିକାର ମାତ୍ର ଗୋଟିଏ ଡୋଜ୍ ଯଥେଷ୍ଟ ।

Published: Tuesday, July 13, 2021, 19:54 [IST]

ନୂଆଦିଲ୍ଲୀ : କରୋନା ଜୀବାଣୁ ମହାମାରୀର ତୃତୀୟ ଲହର ଭୟ ମଧ୍ୟରେ ରୁଷରେ ନିର୍ମିତ ସ୍ପୁଟନିକ୍ ଭି ଟିକା ବିଷୟରେ ଏକ ବଡ ସୂଚନା ସାମ୍ନାକୁ ଆସିଛି । ବୈଜ୍ଞାନିକମାନେ ଏକ ଅନୁସନ୍ଧାନରେ ଦାବି କରିଛନ୍ତି ଯେ କରୋନାରୁ ସୁସ୍ଥ ହୋଇଯାଇଥିବା ଲୋକଙ୍କ ପାଇଁ ସ୍ପୁଟ୍ନିକ୍ ଭି ଟିକାର ମାତ୍ର ଗୋଟିଏ ଡୋଜ୍ ଯଥେଷ୍ଟ । ଯେଉଁମାନେ କରୋନାରୁ ସୁସ୍ଥ ହୋଇଛନ୍ତି, ସେମାନଙ୍କ କ୍ଷେତ୍ରରେ ସ୍ପୁଟନିକ୍ ଭି ଟିକା 94 ପ୍ରତିଶତ ପ୍ରଭାବଶାଳୀ ବୋଲି ଜଣାପଡିଛି । ବୈଜ୍ଞାନିକମାନେ କହିଛନ୍ତି ଯେ କରୋନାରୁ ମୁକ୍ତି ପାଇଥିବା ଲୋକଙ୍କ ମଧ୍ୟରେ ସ୍ପୁଟ୍ନିକ୍ ଭି ର ଦ୍ୱିତୀୟ ଡୋଦ୍ ଗ୍ରହଣ କରିବାର କୌଣସି ଲାଭ ସ୍ପଷ୍ଟ ଭାବରେ ଜଣାପଡ଼ି ନାହିଁ ।

'ସାଇନ୍ସ ଡାଇରେକ୍ଟ'ରେ ପ୍ରକାଶିତ ଏହି ଅନୁସନ୍ଧାନରେ ବୈଜ୍ଞାନିକମାନେ କହିଛନ୍ତି ଯେ ସ୍ପୁଟନିକ୍ ଭି ଟିକା ର ପ୍ରଥମ ଡୋଜ୍ ଗ୍ରହଣ କରିବାର 21 ଦିନ ପରେ, ଅନୁସନ୍ଧାନରେ ଜଡିତ ଲୋକଙ୍କ ମଧ୍ୟରେ ଏକ ସ୍ୱତନ୍ତ୍ର ଆଣ୍ଟିବଡି ମିଳିଥିଲା । ଏହି ଅନୁସନ୍ଧାନ ଆର୍ଜେଣ୍ଟିନାର ସ୍ୱାସ୍ଥ୍ୟ କର୍ମଚାରୀଙ୍କ ଉପରେ କରାଯାଇଥିଲା । ଯେଉଁ ଲୋକମାନେ କରୋନା ଦ୍ୱାରା ସଂକ୍ରମିତ ହୋଇନଥିଲେ ଏବଂ ଉଭୟ ଟିକା ଦିଆଯାଇଥିଲା, ସେମାନଙ୍କ ତୁଳନାରେ ସଂକ୍ରମିତ ତଥା ସୁସ୍ଥ ହୋଇଥିବା ଲୋକ, ଯିଏକି ଏହାର ଗୋଟିଏ ଡୋଜ୍ ନେଇଥିଲେ ସେମାନଙ୍କ ଠାରେ ଆଣ୍ଟିବଡି ଏବଂ ଭାଇରସ ପ୍ରତିରୋଧକ କ୍ଷମତା ଅଧିକ ରହିଛି ବୋଲି ଦାବି କରାଯାଇଛି । ଏହା ମଧ୍ୟ କହିଛନ୍ତି ଯେ ସାଧାରଣ ଲୋକଙ୍କଠାରେ ସ୍ପୁଟନିକ୍ ଭି ର ଦ୍ୱିତୀୟ ଡୋଜ୍ ଆଣ୍ଟିବଡିଗୁଡ଼ିକୁ ଅଧିକ ଶକ୍ତିଶାଳୀ କରିଥାଏ ।

ହାଇଦ୍ରାବାଦ ଡାକ୍ତରଖାନା ମଧ୍ୟ ସମାନ ଦାବି କରିଛି

ଆମେ ଆପଣଙ୍କୁ କହି ରଖୁଛୁ ଯେ ପୂର୍ବରୁ ହାଇଦ୍ରାବାଦର ଏଆଇଜି ହସ୍ପିଟାଲ ଦ୍ୱାରା କରାଯାଇଥିବା ଏକ ଅଧ୍ୟୟନରେ ମଧ୍ୟ ଦାବି କରାଯାଇଥିଲା ଯେ ଯେଉଁମାନେ ସେମାନଙ୍କର ଶକ୍ତିଶାଳୀ ଆଣ୍ଟିବାଡି ଯୋଗୁଁ କରୋନାରୁ ମୁକ୍ତି ପାଇଛନ୍ତି ସେମାନଙ୍କ ପାଇଁ କେବଳ ଗୋଟିଏ ଡୋଜ୍ ଟିକା ଯଥେଷ୍ଟ । ଏହି ଅଧ୍ୟୟନରେ 260 ସ୍ୱାସ୍ଥ୍ୟ କର୍ମୀଙ୍କୁ ଅନ୍ତର୍ଭୁକ୍ତ କରାଯାଇଥିଲା ଏବଂ ସେମାନଙ୍କୁ ଜାନୁଆରୀ 16 ରୁ ଫେବୃଆରୀ 5 ମଧ୍ୟରେ କୋଭିଡଶିଲ୍ଡ ଟିକା ଦିଆଯାଇଥିଲା ।

Published On July 13, 2021