ସୋଶାଲ ମିଡ଼ିଆ ଆକାଉଣ୍ଟ ରଦ୍ଦ କିମ୍ବା ଅଚଳ କରିପାରିବେ ସରକାର, ଗଠନ ହେବ ଅଭିଯୋଗ କିମିଟି
ସରକାର ବିଭିନ୍ନ ସୋଶାଲ ମିଡିଆ କମ୍ପାନି ଫେସବୁକ, ଇନଷ୍ଟାଗ୍ରାମ, ଟ୍ୱିଟର ଆଦିର ନିଷ୍ପତ୍ତିକୁ ବଦଳାଇ କୌଣସି ପୋଷ୍ଟ ବା କଣ୍ଟେଣ୍ଟକୁ ହଟାଇ ପାରିବେ । ଏପରିକି କୌଣସି ସୋଶାଲ ମିଡିଆ ଆକାଉଣ୍ଟକୁ ଅଚଳ, ରଦ୍ଦ କରିପାରିବେ ।
ନୂଆଦିଲ୍ଲୀ : ସୋଶାଲ ମିଡ଼ିଆ ଆକାଉଣ୍ଟକୁ ନେଇ ନିୟମ କଡ଼ାକ଼ଡ଼ି କରିଛନ୍ତି ସରକାର । ଏନେଇ ସରକାର ଶୁକ୍ରବାର ସୂଚନା ପ୍ରଯୁକ୍ତି ଆଇନ ଅଧିନରେ କେତେକ ନୂଆ ନିୟମ ଘୋଷଣା କରିଛନ୍ତି । ଏହା ପରେ ସୋଶାଲ ମିଡିଆ ଉପରେ ସରକାରଙ୍କ ଅଧିକ ନିୟନ୍ତ୍ରଣ ଆସିଯିବ । ସରକାର ବିଭିନ୍ନ ସୋଶାଲ ମିଡିଆ କମ୍ପାନି ଫେସବୁକ, ଇନଷ୍ଟାଗ୍ରାମ, ଟ୍ୱିଟର ଆଦିର ନିଷ୍ପତ୍ତିକୁ ବଦଳାଇ କୌଣସି ପୋଷ୍ଟ ବା କଣ୍ଟେଣ୍ଟକୁ ହଟାଇ ପାରିବେ । ଏପରିକି କୌଣସି ସୋଶାଲ ମିଡିଆ ଆକାଉଣ୍ଟକୁ ଅଚଳ, ରଦ୍ଦ କରିପାରିବେ । ଅପରପକ୍ଷରେ ସରକାରଙ୍କ ଏହି ନିୟମକୁ ସୋଶାଲ ମିଡିଆ କମ୍ପାନି ବିରୋଧ କରି କୋର୍ଟଙ୍କ ଦ୍ୱାରସ୍ଥ ହୋଇପାରନ୍ତି ।
ଆସନ୍ତା ତିନି ମାସ ମଧ୍ୟରେ ସରକାରଙ୍କ ପକ୍ଷରୁ ଏକ ସୋଶାଲ ମିଡିଆ ଅଭିଯୋଗ ଶୁଣାଣି କମିଟି ଗଠନ କରାଯିବ । ଏହି କମିଟିରେ ଜଣେ ଅଧ୍ୟକ୍ଷ ଏବଂ ଅନ୍ ଦୁଇ ଜଣ ସଦସ୍ୟ ରହିବେ । ସେମାନଙ୍କୁ ସରକାର ନିଯୁକ୍ତ କରିବେ ।
ଯଦି କୌଣସି ବ୍ୟକ୍ତି ସୋଶାଲ ମିଡିଆରେ ପୋଷ୍ଟ ହୋଇଥିବା କୌଣସି କଣ୍ଟେଣ୍ଟ ପ୍ରସଙ୍ଗରେ ଅସନ୍ତୁଷ୍ଟ ହୁଅନ୍ତି, ତେବେ ସେ ଏହି ପ୍ୟାନେଲ ନିକଟରେ ଅଭିଯୋଗ କରିପାରିବେ । ଗ୍ରିଭାନ୍ସ ଆପେଲେଟ କମିଟି ଅଭିଯୋଗର ଶୁଣାଣି କରି ତାଙ୍କର ନିଷ୍ପତ୍ତି ୱେବସାଇଟରେ ଅପଲୋଡ କରିବ । ନିୟମ ଅନୁସାରେ ଯେ କୌଣସି ଆବେଦନର ସମାଧାନ ୩୦ ଦିନ ମଧ୍ୟରେ କରାଯିବ ।
ସୂଚନା ପ୍ରଯୁକ୍ତି ସଂଶୋଧନ ନିୟମାବଳୀ-2022 ଅନୁସାରେ ସରକାର ଏହି ନିଷ୍ପତ୍ତି ନେଇଛନ୍ତି । ନୂଆ ନିୟମ ଅନୁସାରେ, କୌଣସି ଅଭିଯୋଗକୁ କମ୍ପାନିର ଗ୍ରିଭାନ୍ସ ଅଫିସର 24 ଘଣ୍ଟା ମଧ୍ୟରେ ଗ୍ରହଣ କରିବେ ଏବଂ 15 ଦିନ ମଧ୍ୟରେ ଅଭିଯୋଗର ସମାଧାନ କରିବେ । ଯଦି କମ୍ପାନିର ଗ୍ରିଭାନ୍ସ ଅଫିସରଙ୍କ ଉତ୍ତରରେ ଜଣେ ସନ୍ତୁଷ୍ଟ ନହୁଅନ୍ତି, ତେବେ ସେ ଆପେଲେଟ କମିଟି ନିକଟରେ ଅଭିଯୋଗ କରିବେ ।
ଏହି କ୍ଷେତ୍ରରେ କରିହେବ ଅଭିଯୋଗ
- ଅଶ୍ଳୀଳ, ଯୌନତା, ଯୌନମାନସିକତା, ପ୍ରାଇଭାସି, ଲିଙ୍ଗ, ବର୍ଣ୍ଣ, ଜାତିକୁ ଆକ୍ଷେପ କରିବା ଭଳି ପୋଷ୍ଟ
- ଶିଶୁଙ୍କ ଲାଗି କ୍ଷତିକାରକ ପ୍ରସଙ୍ଗ
- ମେସେଜର ଉତ୍ପତ୍ତି ସମ୍ପର୍କରେ ଭ୍ରମାତ୍ମକ ତଥ୍ୟ ଦେବା ସହ ଜାଣିଶୁଣି ସୂଚନାକୁ ପ୍ରସାର କରିବା
- ଅନ୍ୟ ଜଣେ ବ୍ୟକ୍ତିଙ୍କ ଜାଲ ପରିଚୟ ଦେଇ ସୋଶାଲ ମିଡିଆ ବ୍ୟବହାର କରିବା
- ଦେଶର ଏକତା, ସଂହତି, ପ୍ରତିରକ୍ଷା, ନିରାପତ୍ତା ପ୍ରତି ବିପଦ ସୃଷ୍ଟି କରୁଥିବା ପ୍ରସଙ୍ଗ ତଥା ଅନ୍ୟ ଦେଶ ପ୍ରତି ଆକ୍ଷେପ କଲା ଭଳି ପୋଷ୍ଟ
- କମ୍ପ୍ୟୁଟର ପ୍ରତି କ୍ଷତି ପହଞ୍ଚାଉଥିବା ସଫ୍ଟଓ୍ବେର ଭାଇରସ, କମ୍ପ୍ୟୁଟର କୋଡ, ଫାଇଲ ବା ପ୍ରୋଗ୍ରାମର ପ୍ରସାରଣ
Click it and Unblock the Notifications
Sign in with Google