ମଣିପୁର ହିଂସା, ଆଜି ଇସ୍ତଫା ଦେଇପାରନ୍ତି ମୁଖ୍ୟମନ୍ତ୍ରୀ ଏନ ବିରେନ ସିଂହ

Updated: Friday, June 30, 2023, 12:37 [IST]

ଇମ୍ଫାଲ : ପ୍ରାୟ ଦୁଇ ମାସ ଧରି ପାହାଡ଼ି ରାଜ୍ୟ ମଣିପୁରରେ ଲାଗି ରହିଛି ହିଂସା । ରାଜ୍ୟ ସରକାର ଏହାକୁ ନିୟନ୍ତ୍ରଣ କରିବାରେ ବିଫଳ ହୋଇଛନ୍ତି । ଏହି କ୍ରମରେ ଆଜି ଇସ୍ତଫା ଦେଇ ପାରନ୍ତି ମଣିପୁର ମୁଖ୍ୟମନ୍ତ୍ରୀ ବିରେନ ସିଂହ ।

ଆଜି ଦିନ ପ୍ରାୟ 1 ଟା ସମୟରେ ମଣିପୁର ରାଜ୍ୟପାଳଙ୍କୁ ତାଙ୍କ ଇସ୍ତଫା ପ୍ରଦାନ କରିପାରନ୍ତି ବୋଲି ମିଡ଼ିଆ ରିପୋର୍ଟରୁ ଜଣାପଡ଼ିଛି ।

ମୈଟେଇ ଏବଂ କୁକି ମଧ୍ୟରେ ହୋଇଥିବା ସଂଘର୍ଷରେ ପ୍ରାୟ 130 ଜଣଙ୍କର ମୃତ୍ୟୁ ହୋଇଛି । ଅନେକ ଲୋକ ବାସହୀନ ହୋଇ ଅନ୍ୟତ୍ର ଆଶ୍ରୟ ନେଇଛନ୍ତି ।

ବିରେନ ସିଂହ ନିକଟରେ ଦିଲ୍ଲୀ ଗସ୍ତରେ ଯାଇ ସେଠାରେ ବହୁ ବରିଷ୍ଠ ନେତାଙ୍କ ବ୍ୟତୀତ ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହମନ୍ତ୍ରୀ ଅମିତ ଶାହା ଏବଂ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କୁ ଭେଟିଥିଲେ । ହିଂସା ପାଇଁ ଆବଶ୍ୟକ ପଦକ୍ଷେପ ବିଷୟରେ ସେମାନଙ୍କୁ ମଧ୍ୟ କହିଥିଲେ ।

ତାଙ୍କ ଦଳର ବିଧାୟକମାନେ ବିରୋଧୀଦଳ ଅପେକ୍ଷା ସିଏମ ବିରେନ ସିଂହଙ୍କ ସମସ୍ୟାକୁ ଅଧିକ ବୃଦ୍ଧି କରିଛନ୍ତି । ଆଦିବାସୀ ସମ୍ପ୍ରଦାୟରୁ ଆସୁଥିବା ଅନେକ ବିଧାୟକ ସିଏମଙ୍କୁ ମୈତେଇ ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବା ଅଭିଯୋଗ କରୁଛନ୍ତି । ମଣିପୁରରୁ ଆସିଥିବା କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରୀ ରାଜ କୁମାର ରଂଜନ ସିଂହ ନିକଟରେ ସିଏମ ଏବଂ ରାଜ୍ୟର ଆଇନ ଶୃଙ୍ଖଳା ପରିସ୍ଥିତି ଉପରେ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି ଯେ ସିଏମଙ୍କ ନେତୃତ୍ୱରେ ଆଇନ ଶୃଙ୍ଖଳା ବିଫଳ ହୋଇଛି । ବିକ୍ଷୋଭକାରୀ ମାନେ ମଧ୍ୟ ତାଙ୍କ ଘରେ ନିଆଁ ଲଗାଇ ଦେଇଥିଲେ ।

ଆପଣଙ୍କୁ କହି ରଖୁଛୁ 62 ବର୍ଷିୟ ସିଏମ୍ ବିରେନ୍ ସିଂହ ନିଜେ ମୈତେଇ ସମ୍ପ୍ରଦାୟରୁ ଆସିଛନ୍ତି । 2016 ମସିହାରେ ସେ କଂଗ୍ରେସରୁ ବିଜେପିକୁ ଯାଇଥିଲେ । ଏହା ପରେ, ଯେତେବେଳେ 2017 ରେ ବିଜେପି କ୍ଷମତା ପାଇଲା, ସେତେବେଳେ ତାଙ୍କୁ ସିଏମ୍ କରାଯାଇଥିଲା । ଗତ ବର୍ଷର ନିର୍ବାଚନରେ ମଧ୍ୟ ଦଳ ପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରିଥିଲା, ତେଣୁ ଦଳ ତାଙ୍କ ଉପରେ ବିଶ୍ୱାସ ରଖିଥିଲା ।