18 ରୁ 44 ବର୍ଷ ନାଗରିକଙ୍କୁ ମାଗଣା ଟିକା ନେଇ ମହାରାଷ୍ଟ୍ର ସରକାରଙ୍କ ଘୋଷଣା
ରାଜ୍ୟର ଉଦ୍ଧବ ଠାକରେ ସରକାର ବୁଧବାର ଏକ ବଡ଼ ଘୋଷଣା କରିଛନ୍ତି । 18 ବର୍ଷରୁ ଅଧିକ ଲୋକଙ୍କୁ କରୋନା ଟିକା ମାଗଣାରେ ଯୋଗାଇ ଦିଆଯିବା ନେଇ ମହାରାଷ୍ଟ୍ର ସରକାର ଘୋଷଣା କରିଛନ୍ତି ।
ମୁମ୍ବାଇ : ପ୍ରତ୍ୟେକ ଦିନ ଦେଶର ଅନ୍ୟତମ ପ୍ରଭାବିତ ରାଜ୍ୟ ମହାରାଷ୍ଟ୍ରରେ କରୋନା ସଂକ୍ରମିତଙ୍କ ସଂଖ୍ୟା ବଢିବାରେ ଲାଗିଛି । ଏଭଳି ପରିସ୍ଥିତିରେ ରାଜ୍ୟର ଉଦ୍ଧବ ଠାକରେ ସରକାର ବୁଧବାର ଏକ ବଡ଼ ଘୋଷଣା କରିଛନ୍ତି । 18 ବର୍ଷରୁ ଅଧିକ ଲୋକଙ୍କୁ କରୋନା ଟିକା ମାଗଣାରେ ଯୋଗାଇ ଦିଆଯିବା ନେଇ ମହାରାଷ୍ଟ୍ର ସରକାର ଘୋଷଣା କରିଛନ୍ତି ।
ବୁଧବାର, ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ନେତୃତ୍ୱରେ କ୍ୟାବିନେଟ୍ ମାଗଣା ଟିକା ଦେବାକୁ ନିଷ୍ପତ୍ତି ନେଇଛି । ଏହି ନିର୍ଦ୍ଦେଶ ଅନୁଯାୟୀ, 18-44 ବର୍ଷ ବୟସ ମଧ୍ୟରେ ସମସ୍ତ ନାଗରିକଙ୍କୁ ମାଗଣାରେ COVID -19 ଯୋଗାଇ ଦିଆଯିବ ବୋଲି କୁହାଯାଇଛି ।
ମହାରାଷ୍ଟ୍ର ସ୍ୱାସ୍ଥ୍ୟମନ୍ତ୍ରୀ ରାଜେଶ ଟୋପେ କହିଛନ୍ତି ଯେ, ଟୀକାକରଣ ପାଇଁ ଆମର ସମସ୍ତ ଭିତ୍ତିଭୂମି ଅଛି କିନ୍ତୁ ଆମ ପାଖରେ ପର୍ଯ୍ୟାପ୍ତ ପରିମାଣର ଟିକା ନାହିଁ । ବିଭିନ୍ନ ଟିକା ଉତ୍ପାଦନକାରୀଙ୍କ ସହ ମୁଖ୍ୟମନ୍ତ୍ରୀ ଲୋଚନା କରୁଛନ୍ତି । 18-44 ବର୍ଷ ବୟସର ଲୋକଙ୍କ ପାଇଁ ଟୀକାକରଣ କେନ୍ଦ୍ର ଅଲଗା ରହିବ ବୋଲି ମଧ୍ୟ ସେ କହିଛନ୍ତି ।
ସୂଚନାଯୋଗ୍ୟ, କରୋନା ମହାମାରୀ ମଧ୍ୟରେ ଜାନୁଆରୀ 16 ରେ ସାରା ଦେଶରେ କରୋନା ଟୀକାକରଣର ପ୍ରଥମ ପର୍ଯ୍ୟାୟ ଆରମ୍ଭ ହୋଇଥିଲା ଯେଉଁଥିରେ ଫ୍ରଣ୍ଟ ଲାଇନ କର୍ମଚାରୀ ଏବଂ ଡାକ୍ତରୀ କର୍ମଚାରୀ ଏବଂ 60 ବର୍ଷରୁ ଅଧିକ ଲୋକଙ୍କୁ ଟିକା ଦିଆଯାଇଥିଲା । ଦ୍ୱିତୀୟ ପର୍ଯ୍ୟାୟରେ, 45 ବର୍ଷରୁ ଅଧିକ ଲୋକଙ୍କୁ ଟିକା ପ୍ରୟୋଗ କରିବାକୁ ନିର୍ଦ୍ଦେଶ ଦିଆଯାଇଥିଲା । ବର୍ତ୍ତମାନ, ମେ 1 ତାରିଖରୁ ସମଗ୍ର ଦେଶରେ 18 ବର୍ଷରୁ ଅଧିକ ଲୋକଙ୍କୁ କରୋନା ଟିକା ଦେବାକୁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି । ଦେଶରେ ଚାଲିଥିବା ଟୀକାକରଣର ତୃତୀୟ ପର୍ଯ୍ୟାୟ ମେ 1 ତାରିଖରୁ ଆରମ୍ଭ ହେବ । ଯେଉଁଥିରେ 18 ବର୍ଷରୁ ଅଧିକ ଲୋକଙ୍କୁ କରୋନା ଟିକା ମିଳିବ ।