ମାସ ଆରମ୍ଭରୁ କମିଲା କରୋନା ମାମଲା, ମୃତ୍ୟୁ ସଂଖ୍ୟାରେ ବି ହ୍ରାସ

Updated: Monday, May 1, 2023, 11:02 [IST]

ନୂଆଦିଲ୍ଲୀ : ଗତ କିଛି ଦିନ ଧରି ଦୈନିକ କରୋନା ମାମଲାରେ ଅହେତୁକ ବୃଦ୍ଧି ପରେ ଗତକାଲି ଏଥିରେ ଆଖିଦୃଶିଆ ହ୍ରାସ ହୋଇଛି । ଗତ କିଛି ଦିନ ହେବ ଦେଶରେ ଦୈନିକ କରୋନା ମାମଲାରେ ବୃଦ୍ଧି ହୋଇଆସୁଥିଲା । କିନ୍ତୁ ମେ' ମାସ ଆରମ୍ଭରୁ ଏଥିରେ ହ୍ରାସ ହୋଇଛି । ଆଶ୍ୱସ୍ତିକର ଖବର ହେଉଛି କରୋନାଜନିତ ମୃତ୍ୟୁ ସଂଖ୍ୟାରେ ମଧ୍ୟ ହ୍ରାସ ହୋଇଛି । ଗତ 24 ଘଣ୍ଟାରେ ଦୈନିକ ମାମଲା 5 ହଜାର ତଳକୁ ଖସିଥିବା ବେଳେ କରୋନାଜନିତ ମୃତ୍ୟୁ ସଂଖ୍ୟାରେ ମଧ୍ୟ ହ୍ରାସ ହୋଇଛି ।

ସ୍ୱାସ୍ଥ୍ୟ ମନ୍ତ୍ରଣାଳୟର ତଥ୍ୟ ଅନୁସାରେ ଗତ 24 ଘଣ୍ଟାରେ ସାରା ଦେଶରେ ମୋଟ 4 ହଜାର 276 ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏଥି ସହିତ 6 ହଜାର 037 ଜଣ ରୋଗୀ ସୁସ୍ଥ ହୋଇଛନ୍ତି । ଏହା ପରେ ଦେଶରେ ସକ୍ରିୟ ମାମଲା 47 ହଜାର 246 ରେ ପହଞ୍ଚିଛି । ଏହି ସମୟରେ 8 ଜଣ କରୋନା ଆକ୍ରାନ୍ତଙ୍କ ଦେହାନ୍ତ ହୋଇଛି ।

ଗତ 24 ଘଣ୍ଟାରେ ଚିହ୍ନଟ ହୋଇଥିବା କରୋନା ରୋଗୀଙ୍କୁ ମିଶାଇ ଦେଶରେ ବର୍ତ୍ତମାନ ମୋଟ 4 କୋଟି 49 ଲକ୍ଷ 49 ହଜାର 671 ରୋଗୀ ଚିହ୍ନଟ ହୋଇଛନ୍ତି । ସେଥିମଧ୍ୟରୁ ମୋଟ 4 କୋଟି 43 ଲକ୍ଷ 70 ହଜାର 878 ଜଣ କରୋନା ରୋଗୀ ସୁସ୍ଥ ହୋଇସାରିଛନ୍ତି । ଏହା ସହିତ କରୋନା କାରଣରୁ ମୋଟ 5 ଲକ୍ଷ 31 ହଜାର 547 ରୋଗୀ ପ୍ରାଣ ହରାଇଛନ୍ତି ।