ବ୍ରିଟିଶ ଯାତ୍ରୀମାନଙ୍କ ପାଇଁ ସଂଶୋଧିତ ନିର୍ଦ୍ଦେଶାବଳୀ ଜାରି କଲା ଭାରତ
ବର୍ତ୍ତମାନ ବ୍ରିଟିଶ ଯାତ୍ରୀମାନଙ୍କୁ 17 ଫେବୃଆରୀ 2021 ରେ ଜାରି କରାଯାଇଥିବା (ପୁରୁଣା) ଗାଇଡଲାଇନକୁ ଅନୁସରଣ କରିବାକୁ ପଡିବ । ଏଥିରେ କ୍ୱାରେଣ୍ଟିନକୁ ଛାଡ ଦିଆଯାଇଥିଲା ।
ନୂଆଦିଲ୍ଲୀ : ନିକଟରେ ବ୍ରିଟେନ ତାର ଯାତ୍ରା ନିର୍ଦ୍ଦେଶାବଳୀ ଜାରି କରିଥିଲା । ଯାହା ଅଧୀନରେ ଭାରତରେ କୋଭିଶିଲ୍ଡ ନେଇଥିବା ଲୋକଙ୍କୁ ମଧ୍ୟ କ୍ୱାରେଣ୍ଟିନରେ ରଖାଯାଉଥିଲା । ଏହା ପରେ ଭାରତ ସରକାର ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରି ବ୍ରିଟିଶ ନାଗରିକଙ୍କ ପାଇଁ ଏକ କଠୋର ନିର୍ଦ୍ଦେଶାବଳୀ ଜାରି କରିଥିଲେ । ଯେଉଁଥିରେ ନିଜ ଖର୍ଚ୍ଚରେ 2ଥର ଆରଟି- PCR ପରୀକ୍ଷା ସହ କ୍ୱାରେଣ୍ଟିନରେ ରହିବାରେ ଥିଲା । ଏହି କଠୋର ଆଭିମୁଖ୍ୟ ପରେ ବ୍ରିଟିଶ ସରକାର ଏଥିରେ ପରିବର୍ତ୍ତନ କରି ଟିକା ନେଇଥିବା ଭାରତୀୟ ଲୋକଙ୍କୁ ଛାଡ ପ୍ରଦାନ କରିଥିଲେ । ଯାହା ଉପରେ ବର୍ତ୍ତମାନ ଭାରତ ସରକାର ମଧ୍ୟ ଏକ ନିର୍ଦ୍ଦେଶନାମା ଜାରି କରିଛନ୍ତି ।
ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁଯାୟୀ, ଅକ୍ଟୋବର 1 ରେ ବ୍ରିଟିଶ ନାଗରିକଙ୍କ ପାଇଁ ଏକ ନୂତନ ଗାଇଡଲାଇନ ଜାରି କରାଯାଇଥିଲା । ଯେଉଁଥିରେ ଅଧିକ କଠୋର ନିୟମ ଥିଲା । ବର୍ତ୍ତମାନ ଏହାକୁ ସଂଶୋଧନ କରାଯାଇଛି । ବର୍ତ୍ତମାନ ବ୍ରିଟିଶ ଯାତ୍ରୀମାନଙ୍କୁ 17 ଫେବୃଆରୀ 2021 ରେ ଜାରି କରାଯାଇଥିବା (ପୁରୁଣା) ଗାଇଡଲାଇନକୁ ଅନୁସରଣ କରିବାକୁ ପଡିବ । ଏଥିରେ କ୍ୱାରେଣ୍ଟିନକୁ ଛାଡ ଦିଆଯାଇଥିଲା ।
କ'ଣ ଥିଲା ବିବାଦର କାରଣ ?
ବାସ୍ତବରେ, ଭାରତର ଅଧିକାଂଶ ଲୋକଙ୍କୁ ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର କୋଭେଶିଲ୍ଡ ଦିଆଯାଉଛି । ବ୍ରିଟେନର ଲୋକଙ୍କୁ ଅନ୍ୟ ନାମରେ ସମାନ ଟିକା ଦିଆଯାଉଛି । ଏହି ଟିକା ନେଇ ବ୍ରିଟିଶ ସରକାରଙ୍କର କୌଣସି ଅସୁବିଧା ନାହିଁ । ସେ ଭାରତର କରୋନା ଟୀକାକରଣ ପ୍ରମାଣପତ୍ରକୁ ବିଶ୍ୱସ୍ତ ବୋଲି ବିବେଚନା କରୁନଥିଲେ, ଯେଉଁଥିପାଇଁ ସେ ଭାରତରୁ ଯାଉଥିବା ଯାତ୍ରୀମାନଙ୍କ ପାଇଁ କ୍ୱାରେଣ୍ଟିନ୍ ନିୟମ କରିଥିଲେ । ତେବେ ବ୍ରିଟେନ ପରେ କୋୱିନ୍ ଉତ୍ପାଦକଙ୍କ ସହ ଆଲୋଚନା କରିଥିଲା । ତେବେ ବର୍ତ୍ତମାନ ଏହି ପ୍ରସଙ୍ଗରେ ଦୁଇ ଦେଶ ମଧ୍ୟରେ ଏକ ଚୁକ୍ତିନାମା ହୋଇଛି ।