ସିଙ୍ଗୁ ସୀମାରେ ମିଳିଲା ପଞ୍ଜାବ ଚାଷୀଙ୍କ ଫାଶୀରେ ଝୁଲୁଥିବା ଶବ, ଚିହ୍ନଟ କଲା ପୋଲିସ୍

ସିଙ୍ଗୁ ସୀମାରେ ଥିବା କୁଣ୍ଡଲି ଅଞ୍ଚଳରେ ଚାଷୀଙ୍କ ମୃତଦେହ ଝୁଲୁଥିବା ଅବସ୍ଥାରେ ଦେଖିବାକୁ ମିଳିଥିଲା । ପୋଲିସ କହିଛି ଯେ ମୃତ କୃଷକ ପଞ୍ଜାବର ଫତେହଗଡ ସାହେବ ନିବାସୀ ଗୁରୁପ୍ରୀତ ସିଂହ ବୋଲି ଜଣାପଡିଛି ।

ନୂଆଦିଲ୍ଲୀ : କେନ୍ଦ୍ର ସରକାରଙ୍କ କୃଷି ଆଇନ ବିରୋଧରେ କୃଷକଙ୍କ ଆନ୍ଦୋଳନ ଏକ ବର୍ଷ ପୂରିବାକୁ ଯାଉଛି । ଏହି ଗୋଟିଏ ବର୍ଷରେ, ସରକାର ଚାଷୀଙ୍କ ଦାବି ଆଗରେ ନା ସରକାର ମୁଣ୍ଡ ନୁଆଁଇଛନ୍ତି ନା ଆନ୍ଦୋଳନରତ ଚାଷୀମାନେ ନିଜ ଜିଦ୍‌ ଛାଡିଛନ୍ତି । ଏହି ଆନ୍ଦୋଳନ ସମୟରେ ଅନେକ କୃଷକଙ୍କ ମୃତ୍ୟୁ ମାମଲା ମଧ୍ୟ ସାମ୍ନାକୁ ଆସିଥିଲା । ଏହି ଆନ୍ଦୋଳନରେ କିଛି କୃଷକଙ୍କ ମୃତ୍ୟୁ ହୋଇଥିବା ବେଳେ କେତେକ ନିଜେ ଆତ୍ମହତ୍ୟା କରିଥିଲେ । ଅପରପକ୍ଷରେ ବୁଧବାର ଦିନ ପଞ୍ଜାବର ଜଣେ କୃଷକଙ୍କ ମୃତଦେହ ସିଙ୍ଗୁ ସୀମାରେ ଝୁଲୁଥିବା ଦେଖିବାକୁ ମିଳିଛି ଯାହା ଚାଷୀଙ୍କ ମଧ୍ୟରେ ଆତଙ୍କ ସୃଷ୍ଟି କରିଛି ।

ମିଳିଥିବା ସୂଚନାନୁସାରେ, ସିଙ୍ଗୁ ସୀମାରେ ଥିବା କୁଣ୍ଡଲି ଅଞ୍ଚଳରେ ଚାଷୀଙ୍କ ମୃତଦେହ ଝୁଲୁଥିବା ଅବସ୍ଥାରେ ଦେଖିବାକୁ ମିଳିଥିଲା । ପୋଲିସ କହିଛି ଯେ ମୃତ କୃଷକ ପଞ୍ଜାବର ଫତେହଗଡ ସାହେବ ନିବାସୀ ଗୁରୁପ୍ରୀତ ସିଂହ ବୋଲି ଜଣାପଡିଛି । କୁହାଯାଉଛି ଯେ ଗୁରୁପ୍ରୀତ ସିଂହ ଭାରତ କିଷାନ ୟୁନିୟନ ସିଦ୍ଧୁପୁରର ଜଗଜିତ ସିଂହ ଦଲେୱାଲ ଦଳ ସହ ଜଡିତ ଥିଲେ । ପୋଲିସ ମୃତଦେହକୁ ପୋଷ୍ଟମର୍ଟମ ପାଇଁ ପଠାଇ ତଦନ୍ତ ଆରମ୍ଭ କରିଛି । ତେବେ ଗୁରୁପ୍ରୀତଙ୍କ ମୃତ୍ୟୁର କାରଣ ସମ୍ପର୍କରେ ପୋଲିସ ଏପର୍ଯ୍ୟନ୍ତ କିଛି କହିନାହିଁ ।

ଏହି ସମୟରେ କୃଷକ ଆନ୍ଦୋଳନର ଏକ ବର୍ଷ ପୁରିବା ଅବସରରେ କୃଷକମାନେ ସଂସଦକୁ ଘେରାଉ କରିବା ପାଇଁ ରଣନୀତି ପ୍ରସ୍ତୁତ କରିଛନ୍ତି । ମଙ୍ଗଳବାର ଦିନ ୟୁନାଇଟେଡ୍ କିଷାନ୍ ମୋର୍ଚ୍ଚା ଘୋଷଣା କରିଛି ଯେ ନଭେମ୍ବର 29 ରୁ ଶୀତ ଅଧିବେଶନ ଆରମ୍ଭ ହେବା ସହିତ ପ୍ରତ୍ୟେକ ଦିନ 500 କୃଷକ ସଂସଦ ପର୍ଯ୍ୟନ୍ତ ଟ୍ରାକ୍ଟର ଏବଂ ଟ୍ରଲି ସହ ଏକ ରାଲି କରିବେ । କୃଷକମାନଙ୍କର ଏହି ସମାବେଶ ସମ୍ପୂର୍ଣ୍ଣ ଶାନ୍ତିପୂର୍ଣ୍ଣ ଏବଂ ଶୃଙ୍ଖଳିତ ହେବ ବୋଲି ଏସକେଏମ୍ କହିଛି ।

English summary

Hanging Dead Body Of Farmer Found at Singhu Border